မာကု 11:24

အောင်ပွဲခံယွေ့ ယေရုရှလင်မြို့ဟို ဝင်ခြင်း

(မဿဲ ၂၁.၁–၁၁; လုကာ ၁၉.၂၈–၄၀; ယောဟန် ၁၂.၁၂–၁၉)

1သူလို့ဟ ယေရုရှလင်မြို့သို့ ရောက်သောအခါ၊ ဗက်ဖာဂေမြို့နဲ့ ဗေသနိရွာအနီးဆိ သံလွင်တောင်ဟို သူလို့ ချဉ်းကပ်လာကြအယ်။ ယေရှုဟ သူရဲ့ တဘဲ့နေယောက်ဟို အဆေ့ဟို စေလွှတ်ယွေ့၊ 2ဟေ ညွှန်ကြားချက်များဖြင့် “နင်လို့ ဆေ့တွင်ဆိသော ရွာဟို သွားကြလော့။ နင်အဲဒီဟို ရောက်တာနဲ့၊ စသူမှ မစီးဖူးသေးသော မြည်းသငယ်တကောင်ဟို လံထားတာဟို နင်မျော်လိမ့်မယ်။ အေးဒါဟို ဖြေပင်း ဟေဟို ယူလာပါ။ 3ပင်းရင် တယောက်ယောက်ဟ နင်ပစာလို့ အေးလိုလုပ်လဲလို့ မေးရင်၊ အဲအရာဟို သခင်1အလိုဆိအယ်၊ အဲပင်း တခါထဲ တန်းပြန်ပို့ပေးပါလိမ့်မယ်” ဟု ပြောလော့။

4အဲကျောန့် သူလို့ဟ သွားယွေ့ နေအိုင်တအိုင်ရဲ့ ထင်ခါးမှာ လံထားသော လမ်းနှိုက် မြည်းသငယ်ဟို မျော်အယ်။ သူလို့ဟ အေးကြိုးဟို ဖြေနေအယ်၊ 5ဖေးမှ ရပ်ကျေ့နေသောသူ အချို့ဟ သူလို့ဟို “မြည်းကြိုးဟို ဖြေယွေ့၊ နင်လို့ ပစာလုပ်နေလုန်း” ဟု မေးကြအယ်။

6သူလို့ဟ ယေရှု မှာလိုက်ခဲ့လဲ့အတိုင်း ဖြေကြသဖြင့်၊ ရပ်ကျေ့နေသောသူလို့ဟ သူလို့ဟို သွားခွင့်ပြုကြအယ်။ 7သူလို့ဟ မြည်းသငယ်ဟို ယေရှုဆေသို့ ခေါ်ခဲ့ပင်းရင်၊ သူလို့ရဲ့ ဝတ်လုံများဟို မြည်းကျောပေါ်သို့ လွှားတင်ကြပင်း၊ ယေရှုဟ မြည်းဟို စီးလေအယ်။ 8ရမ်းဆာ့သော လူလို့ဟ မိမိလို့ရဲ့ ဝတ်လုံများဟို လမ်းပေါ်မှာ ဖြန့်ခင်းကြအယ်၊ အခြားသူများဟ လယ်ကွင်းများထဲမှ သစ်ကိုင်းများဟို ခုတ်ယွေ့ သူလို့ဟ လမ်းမှာ ဖြန့်ခင်းကြအယ်။ 9ဆေ့မှသွားသော လူများနဲ့ နောက်မှ လိုက်တဲ့ လူတွေဟ စတင်ပင်း အော်ကြအယ်၊ “ဘုရားဟို ချီးမွန်းကြလော့၊ သခင်ဘုရားရဲ့ နာမနဲ့ ကြွလာသောသူဟို ဘုရားသခင် ကောင်းချီးပေးပါစေ၊ 10လာမဲ့ ဘုရင်ဒါဝိဒ်ရဲ့ နိုင်ငံတော်ဟို ဘုရားသခင် ကောင်းချီးပေးပါစေ၊ ငါလို့ အဖ၊ ဘုရားသခင်ဟို ချီးမွန်းကြလော့၊”

11ယေရှုဟ ယေရုရှလင်မြို့ဟို ဝင်ယွေ့၊ ဗိမာန်တော်သို့ သွားကြအယ်၊ အေးပင်း အရာအားလုံးဟို လှည့်ပတ်ကျေ့အယ်။ အဲလိုလဲ အေးနေ့ဟ နောက်ကျနေသောကျောန့်၊ ကိုယ်တော်ဟ တဘဲ့တော် တဆယ့်နေဦးနဲ့အတူ ဗေသနိရွာဟို ထွက်သွားလေအယ်။

ယေရှုဟ သင်္ဘောသဖန်းပင်ဟို ကျိန်ခြင်း

(မဿဲ ၂၁.၁၈,၁၉)

12နောက်တနေ့နှိုက်၊ သူလို့ဟ ဗေသနိရွာမှ ပြန်လာကြစဉ်၊ ယေရှုဟ မွတ်လေအယ်။ 13ကိုယ်တော်ဟို အဝေးဟ အရွက်တွေနဲ့ အုပ်ထားလျက် သင်္ဘောသဖန်းပင်ဟို မျော်အယ်၊ အေးကျောန့် ကိုယ်တော်ဟ အသီးတွေ့လိုတွေ့နိုး အပင်နားသို့ သွားကျေ့လေအယ်။ အဲလိုလဲ အေးအပင်နားဟို ကိုယ်တော်လာသောအခါ၊ သဖန်းသီးပေါ်ချိန် မဟုတ်သောကျောန့် ကိုယ်တော်ဟ အရွက်များဟိုသာ မျော်ရအယ်။ 14ယေရှုဟ သင်္ဘောသဖန်းပင်အား “နင့်ဆေဟ သင်္ဘောသဖန်းသီးဟို စသူမှ နောက်တခါ မစားရဘူး” ဟု မိန့်လေအယ်။

ပင်းတော့ တဘဲ့တော်လို့ဟလည်း ကြားကြအယ်။

ယေရှု ဗိမာန်တော်ဟို ကြွလာခြင်း

(မဿဲ ၂၁.၁၂–၁၇; လုကာ ၁၉.၄၅–၄၈; ၂.၁၃–၂၂)

15သူလို့ဟ ယေရုရှလင်မြို့ဟို ရောက်ကြသောအခါ၊ ယေရှုဟ ဗိမာန်တော်သို့ သွားယွေ့ ဗိမာန်တော်အတွင်းမှာ ရောင်းဝယ်နေသူ အားလုံးလို့ဟို စတင်မောင်းထုတ်လေအယ်။ ကိုယ်တော်ဟ ငွေလဲလှယ်သူလို့ရဲ့ စားပွဲများနဲ့ ခိုငက် ရောင်းသူများရဲ့ ထိန်ခုံများဟို မှောက်လောပစ်လေအယ်၊ 16အဲပင်း ကိုယ်တော်ဟ ဗိမာန်တော်ဟို ဖြတ်ယွေ့ ပစာအရာဟိုမျှ ရောင်းဝယ်ရန် ခွင့်ပြုတော်မမူ။ 17ကိုယ်တော်ဟ “ဘုရားသခင် မိန့်လဲ့ ကျမ်းစာနှိုက်၊ ‘ငါရဲ့ အိုင်တော်ဟို လူမျိုးတကာလို့ရဲ့ ဆုတောင်းရာအိုင်တော်ဟု ခေါ်ဝေါ်ရလိမ့်မယ်’ ဟု ရေးထားအယ် မဟုတ်လော။ အဲလိုလဲ နင်လို့ဟ အဲအိုင်တော်ဟို ထားပြတွေအတွက် ခိုအောင်းရာတခုအဖြစ် ပြောင်းလိုက်ပီလော” ဟု လူလို့အား သွန်သင်လေအယ်။

18ယဇ်ပုရောဟိတ်ကြီးများနဲ့ ကျမ်းတတ်ဆရာများဟ ကြားယွေ့ ဟေသတင်းဟို ကြားသောအခါ သူလို့ဟ ယေရှုဟို သတ်ရန် နည်းလမ်းအချို့ဟို ဆာခဲ့ကြအယ်။ လူအုပ်အပေါင်းလို့ဟ ကိုယ်တော် သွန်သင်တာဟို ရမ်းဆာ့ အံ့ဩသောကျောန့်၊ သူလို့ဟ ကိုယ်တော်ဟို ကြောက်ရွံ့ကြအယ်။

19ညခင်းရောက်သောအခါ၊ ယေရှုနဲ့ သူရဲ့ တဘဲ့တော်လို့ဟ မြို့မှ ထွက်ခွာသွားကြအယ်။

သင်္ဘောသဖန်းပင်မှ သင်ခန်းစာ

(မဿဲ ၂၁.၂၀–၂၂)

20နောက်တနေ့ နက်စာစောစောအချိန်နှိုက် သူလို့ဟ လမ်းတလျှောက် လမ်းဆှောက်သွားကြစဉ်၊ သင်္ဘောသဖန်းပင်ဟို မျော်လေအယ်။ အဲအပင်ဟ အမြစ်မှစယွေ့ တပင်လုံး ညှိုးနွမ်းလျက်နေအယ်။ 21ပေတရုဟ ဖြစ်ပျက်ခဲ့တာတွေဟို သတိရပင်း “ကျေ့မန့်၊ ဆရာ၊ နင်ကျိန်ဆိုခဲ့သော သင်္ဘောသဖန်းပင်ဟ သေဆုံးသွားပီ” ဟု ယေရှုအား ပြောလေအယ်။

22ယေရှုဟ “ဘုရားသခင်ဟို ယုံကြည်ခြင်း ဆိလော့” ဟု သူလို့အား ပြန်ပြောလေအယ်။ 232“အမန်အကန် နင်လို့အား ငါဆိုတာဟ စသူမဆို ဟေတောင်အား ‘ရွေ့သွားယွေ့၊ ပင်လယ်ထဲဟို ဆင်းဝါးလော့’ ဟု ဆိုလျက် သူလို့ စိတ်နေလုံးအတွင်းတွင် ယုံမားခြင်းမဆိဘဲ သူလို့ ပြောဆိုလဲ့အတိုင်းဖြစ်မယ်ဟု ယုံကြည်ရင်၊ အဲသူလို့ပြောလဲ့အတိုင်း ဖြစ်လိမ့်မယ်။ 24ဟေအကျောန်းကျောန့် နင်လို့အား ငါဆိုတာဟ၊ နင်ဆုတောင်းသောအခါ တောင်းဆှောက်သမျှဟို ရဆိလိမ့်မယ်ဟု ယုံကြည်ကြလော့၊ နင်လို့ တောင်းသမျှဟို ပေးလိမ့်မယ်။ 253နင်လို့ဟ ရပ်လျက် ဆုတောင်းသောအခါ၊ တစုံတယောက်အပေါ် အပစ်တင်စရာ ဆိရင်၊ သူလို့ဟို ခွင့်လွှတ်မန့်၊ အေးလို့မှသာ ခေါန်းခင်ဘုံနှိုက် ဆိသော နင်လို့ အဖဟ နင်လို့ရဲ့ အပစ်များဟို ဖြေလွှတ်ပေးလိမ့်မယ်။” 264

ယေရှုရဲ့ အခွင့်အာဏာနဲ့ ပတ်သက်လဲ့ မေးခွန်းများ

(မဿဲ ၂၁.၂၃–၂၇; လုကာ ၂၀.၁–၈)

27သူလို့ဟ ယေရုရှလင်မြို့ဟို တခါရောက်ဆိလာကြပင်း၊ ယေရှုဟ ဗိမာန်တော်တွင် လမ်းဆှောက်နေစဉ်၊ ယဇ်ပုရောဟိတ်ကြီးများ၊ ကျမ်းတတ်ဆရာများနဲ့ အသက်ကြီးသူများဟ ကိုယ်တော်ဆေဟို လာကြအယ်။ 28သူလို့ဟ “ဟေအရာလို့ဟို နင် ပစာအခွင့်နဲ့ လုပ်ဆောင်နေလုန်း၊ ဟေလိုလုပ်ဖို့ စသူဟ နင့်ဟို အခွင့်အာဏာဟို ပေးထားလုန်း” ဟု မေးလေအယ်။

29ယေရှုဟ “ငါ နင်ဟို မေးခွန်းတခု မေးမယ်။ ငါ့ဟို ဖြေမန့်၊ ဟေအရာများဟို ငါလုပ်ပိုင်ခွင့် အာဏာအားဖြင့် ငါပြောမယ်။ 30ယောဟန်ရဲ့ နှစ်ခြင်းအခွင့်အာဏာဟ ခေါန်းခင်မှ ဖြစ်သလော၊ အဲဟာမဟုတ်ရင် လူလို့ဆေမှ ဖြစ်သလော။ ငါ့ဟို ဖြေလော့” ဟု ပြန်ပြောလေအယ်။

31သူလို့ဟ အချင်းချင်း ဆွေးနွေးပြောဆိုတာဟ “‘ခေါန်းခင်မှ ဖြစ်အယ်’ လို့ ငါလို့ဟ ပြောရင်၊ သူဟ ‘အဲဆိုနင်ဟ သူ့ဟို ပစာကျောန့် မယုံတာလုန်း’ ဟု မေးလိမ့်မယ်။ 32အဲလိုလဲ လူလို့ရဲ့ အခွင့်အာဏာအရဟု ငါလို့ဆိုမလော” ဟု အချင်းချင်း ဆွေးနွေးကြအယ်။ လူအပေါင်းလို့ဟ ယောဟန်ဟို ပရောဖက်ဖြစ်အယ်ဟု အမန်မှတ်ယူသောကျောန့်၊ သူလို့ဟ လူများဟို ကြောက်ရွံ့ခဲ့ကြအယ်။ 33အဲကျောန့် ယေရှုဟို “ငါလို့ သိဝူး” ဟု သူလို့ ပြန်ဖြေလေအယ်။

ယေရှုဟ “ဟေအရာလို့ဟို ငါလုပ်တာဟို ပစာအခွင့်အာဏာနဲ့ ငါလုပ်ကျောန်း နင်လို့ဟို ငါမပြော” ဟု ဆိုလေအယ်။