တမန်တော် 12

ညှဉ်းဆဲမှု နောက်ထပ်တိုးလာခြင်း

1အဲအချိန်ကာလနှိုက် ဘုရင် ဟေရုဒ်1ဟ အသင်းတော်ဝင် အချို့လို့ဟို စတင် ညှဉ်းဆဲရန် ကြံစည် အားထုတ်လေအယ်။ 2သူဟ ယောဟန်ရဲ့ အကိုဖြစ်သော ယာကုပ်ဟို ထားဖြင့် ကွပ်မျက်လေအယ်။ 3အဲအမှုဟို ယုဒအမျိုးသားလို့ နှစ်သက်ကြကျောန်း မျော်သောအခါ၊ သူဟ ထပ်ယွေ့ ပေတရုဟိုလည်း ဖမ်းဆီးရန် စီစဉ်ကြအယ်။ အဲအချိန်ဟ တဆေးမဲ့မုန့် ပွဲတော်အခါ ဖြစ်အယ်။ 4ဟေရုဒ်ဟ ပေတရုဟို ဖမ်းဆီးယွေ့ ထောင်ထဲ ထည့်ထားပင်းနောက်၊ အဲမှာ သူ့ဟို စောင့်ကျေ့ရန် အစောင့်တပ်သား လေးယောက်စီပါသော တပ်စုငယ် လေးစုလက်သို့ အပ်ထားအယ်။ ဟေရုဒ်ဟ ပသခါပွဲ လွန်သောအခါ သူ့ဟို လူထုဆေ့တွင် ထုတ်ရန် အကြံဆိအယ်။ 5အေးလိုမို့ ပေတရုဟ ထောင်ထဲမှာ ထိန်းသိမ်းထားခြင်း ခံရအယ်၊ အဲလိုလဲ အသင်းတော်ဝင် အပေါင်းလို့ဟ ပေတရုအတွက် စိတ်အားထက်သန်စွာ ဘုရားသခင်ဆေ ဆုတောင်းလျက် နေကြအယ်။

ပေတရု အကျဉ်းထောင်မှ လွတ်လာခြင်း

6ဟေရုဒ်မင်းဟ ပေတရုဟို လူလို့ဆေ့ဟို ခေါ်ထုတ်မယ့်နေ့ မရောက်ခင် ညနှိုက်၊ ပေတရုဟ အစောင့်တပ်သား နေယောက်ကြားတွင် အိပ်မွေလျက် နေအယ်။ သူ့ဟို သူလို့ နေယောက်နဲ့အတူ သံကြိုးနေချောင်းဖြင့် တုတ်ချေထားပင်း၊ အဲထောင် ထင်ခါးဆေ့တွင်လည်း အစောင့်တပ်သားများဟ စောင့်ကြပ်လျက် ဆိကြအယ်။ 7ထာဝရဘုရားရဲ့ ခေါန်းခင်တမန်ဟ ရုတ်တရက် ပေါ်လာယွေ့ အချုပ်ခန်းထဲနှိုက် အလင်းရောင် ထွန်းလင်းလျက် နေအယ်။ ခေါန်းခင်တမန်ဟ ပေတရုရဲ့ ပခုံးဟို ပုတ်ယွေ့ သူ့ဟို နှိုးကာ “မြန်မြန်ထလော” ဟု ဆိုအယ်။ အဲအခါ သံကြိုးလို့ဟ ပေတရုရဲ့ လက်မှ ကျွတ်ကျအယ်။ 8အဲပင်းရင် ခေါန်းခင်တမန်ဟ “နင့်ရဲ့ ခါးပန်းဟို စဲယွေ့ ဖိနပ်ဟို စီးလော” ဟု ဆိုအယ်။ ပေတရုဟ အေးလို့ ပြောလဲ့အတိုင်း ပြုအယ်။ အဲပင်းရင် ခေါန်းခင်တမန်ဟ သူ့အား “နင်ရဲ့ ဝတ်လုံဟို ခြုံယွေ့ ငါ့နောက်ဟို လိုက်လော့” ဟု ဆိုအယ်။ 9ပေတရုဟ အချုပ်ခန်းမှ ထွက်ယွေ့ သူ့နောက် လိုက်သွားလေအယ်၊ အဲလိုလဲ ခေါန်းခင်တမန်အားဖြင့် ဖြစ်ပျက်နေသောအရာဟ အမန်တကယ်ဖြစ်ကျောန်း မသိဘဲ ရူပါရုံဟို မျော်နေအယ်ဟုသာ သူ ထင်မှတ်အယ်။ 10သူလို့ဟ ကင်းစောင့်ထားချရာ ပထမနေရာနဲ့ ဒုတိယနေရာလို့ဟို ပွန်သွားပင်းရင် မြို့ဟို သွားလဲ့ သံထင်ခါးဟို ရောက်လာကြအယ်။ အဲထင်ခါးဟ သူလို့အတွက် တတ်တိုင်း ပွင့်သဖြင့် သူလို့ဟ ထွက်လာကြအယ်။ သူလို့ဟ လမ်းအတိုင်း လိုက်သွားကြပင်း ခေါန်းခင်တမန်ဟ ပေတရုနားမှ ခုတင်ချင်း ထွက်ခွာ သွားလေအယ်။

11အဲအခါ ပေတရုဟ သူနှိုက် ပစာဖြစ်တာဟို သတိ ပြန်ဝင်လာယွေ့ “သခင်ဘုရားဟ မိမိရဲ့ ခေါန်းခင်တမန်ဟို စေလွှတ်ယွေ့ ငါ့ဟို ဟေရုဒ်ရဲ့ လက်မှလည်းကောင်း၊ ယုဒအမျိုးသားလို့ရဲ့ မျှော်လင့်သမျှသော အရာအားလုံးမှလည်းကောင်း ငါ့ဟို ကယ်နုတ်တာဟို အခု ငါ အမန်တကယ် သိပီ” ဟု ဆိုအယ်။

12သူ့အခြေအနေဟို သတိထားမိသောအခါ၊ သူဟ မာကုဟု ခေါ်လဲ့ ယောဟန်ရဲ့ အမေ့ဖြစ်သော မာရိရဲ့ နေအိုင်ဟို သွားအယ်၊ အဲနေအိုင်တွင် ရမ်းဆာ့လူများ စုဆုံယွေ့ ဆုတောင်းလျက် နေကြအယ်။ 13ပေတရုဟ အပြင်ဘက်ဟနေ ထင်ခါးဟို ခေါက်ရာ၊ ရောဒေ နာမယ်ဆိသူ အစေခံမိန်းမငယ် တယောက်ဟ မေးရန် လာအယ်။ 14သူဟ ပေတရုရဲ့ အသံဟို မှတ်မိယွေ့ ရမ်းဆာ့ ဝမ်းမြောက်စွာဖြင့် ထင်ခါးဟို မဖွင့်ဘဲ နေအိုင်ထဲဟို ပြေးဝင်ကာ ထင်ခါးဆေ့တွင် ပေတရု ရပ်နေကျောန်းဟို ပြောကြားအယ်။ 15အဲသူလို့ဟ “နင် ရူးနေပီ” ဟု ဆိုအယ်။ အဲလိုလဲ သူဟ မိမိပြောလဲ့အတိုင်း အမန်ပင်ဖြစ်ကျောန်း ခိုင်မာစွာ ပြောဆိုနေသဖြင့် သူလို့ဟ “အဲသူသည် ပေတရုရဲ့ ခေါန်းခင်တမန် ဖြစ်လိမ့်မယ်” ဟု ဆိုကြအယ်။

16အဲလိုလဲ ပေတရုဟ ထင်ခါးဟို ခေါက်မြဲခေါက်လျက် နေသဖြင့် သူလို့ဟ ထင်ခါး ဖွင့်လိုက်သောအခါ ပေတရုဟို မျော်သဖြင့် အံ့ဩကြအယ်။ 17ပေတရုဟ သူလို့ဟို တိတ်တိတ်နေကြရန် လက်ရိပ်ပြပင်း၊ မိမိအား သခင်ဘုရားဟ စလိုထောင်ထဲမှ ထုတ်ဆောင်လာကျောန်းဟို ပြောပြလေအယ်။ အဲပင်းရင် “ဟေအကျောန်းဟို ယာကုပ်နဲ့ အခြား ညီအကိုလို့အား ပြောပြကြပါ” ဟု မှာကြားပင်း အခြားအရပ်ဟို ထွက်ခွာသွားအယ်။

18မိုးလင်းသောအခါ ပေတရု စလို ဖြစ်သွားလုန်းဟု အစောင့်တပ်သားလို့ ကြားတွင် အကြီးအကျယ် ရုတ်ရုတ်သဲသဲ ဖြစ်ကြအယ်။ 19ဟေရုဒ်မင်းဟ ပေတရုဟို ဆှာစေရန် အမိန့်ပေးပေမဲ့လည်း သူ့ဟို မတွေ့ကြ။ အဲလိုမို့ အစောင့်တပ်သားလို့အား စစ်ဆေးမေးမြန်းယွေ့ သေဒဏ်ပေးရန် အမိန့်ချမှတ် လိုက်လေအယ်။

အဲပင်းရင် ဟေရုဒ်မင်းဟ ယုဒပြေမှ ထွက်ခွာယွေ့ ကဲသရိမြို့တွင် ကာလအနည်းငယ် နေအယ်။

ဟေရုဒ်မင်း ကွယ်လွန်ခြင်း

20ဟေရုဒ်မင်းဟ တုရုမြို့သားများနဲ့ ဇိဒုန်မြို့သားလို့အပေါ် ရမ်းဆာ့ အူထော့သဖြင့် အဲမြို့သားလို့ဟ စုရုံးလျက် မင်းကြီးဆေဟို လာရောက်ကြအယ်။ ပထမဆုံး နန်းတော်ဟို စီမံရသောသူ ဗလတ္တုဟို စည်းရုံးပင်း သူ့ရဲ့ အကူအညီဟို ရယူကြအယ်။ အဲပင်းရင် ဟေရုဒ်မင်းကြီး ဆေသို့ ဝင်ယွေ့ ငြိမ်သက်စေမဲ့အကျောန်း တောင်းပန်ကြအယ်။ ပစာကို့ သူလို့ရဲ့ ပြေဟ ဟေရုဒ်မင်းရဲ့ ပြေဟို မှီခို စားသောက်ရသောကျောန့် ဖြစ်အယ်။

21ဟေရုဒ်မင်းဟ ချိန်းချက်ထားလဲ့နေ့နှိုက် မင်းမြောက်တန်ဆာများဟို ဝတ်ဆင်ပင်း ရာဇပလ္လင်ပေါ်တွင် ထိန်လျက် အေးလူလို့အား မိန့်ခွန်းမြွက်ကြားအယ်။ 22အဲသူလို့ဟ “ဟေအသံဟ လူရဲ့ အသံ မဟုတ်၊ ဘုရားသခင်ရဲ့ အသံ ဖြစ်အယ်” ဟု ကြွေးကြော်ကြအယ်။ 23ဟေရုဒ်ဟ ဘုရားသခင်ရဲ့ ဂုဏ်တော်ဟို မချီးမွန်းသောကျောန့် ခုတင်ချင်း ထာဝရဘုရားရဲ့ ခေါန်းခင်တမန်ဟ သူ့ဟို ဒဏ်ခတ်ယွေ့ ကိုယ်တွင်းနှိုက် ပိုးများ ကိုက်သဖြင့် အနိစ္စရောက်လေအယ်။

24အဲအချိန်တွင် ဘုရားသခင်ရဲ့ နှုတ်ကပတ်တရားဟ ဆက်လက်ပင်း ပျံ့နှံ့ယွေ့ တိုးပွားလေအယ်။

ဗာနဗနဲ့ ရှောလုလို့အား ရွေးချယ်စေလွှတ်ခြင်း

25ဗာနဗနဲ့ ရှောလုဟ မိမိလို့ ဆောင်ရွက်ရန်ဆိလဲ့ အလုပ်ကိစ္စများဟို ဆောင်ရွက်ကြပင်းနောက် မာကုဟု ခေါ်လဲ့ ယောဟန်ဟိုလည်း ခေါ်ခဲ့ယွေ့ ယေရုရှလင်မြို့မှ2 ပြန်ကြအယ်။