Roma 12

Mawu nike ni ɔmɛ a he ni tsumi

1Enɛ ɔ he je ɔ, mamimɛ, i ngɛ nyɛ pɛɛ kpae nɛ nyɛɛ ngɔ nyɛ nɔmlɔ tso ɔmɛ kɛ ha Mawu. Nyɛ ha nɛ a pee bɔ sami níhi nɛ hɛ mi ka nɛ ngɛ klɔuklɔu, níhi nɛ maa sa Mawu hɛ mi. Ke nyɛ susu nɔ́ nɛ e pee kɛ ha nyɛ ɔ he ɔ, anɛ nɔ́ ko agbo ji enɛ ɔ nɛ e ngɛ nyɛ bie lo? 2Nyɛ ko ba nyɛ je mi kaa je mi bi ɔmɛ, nɛ nyɛ ko di je ɔ mi níhi a se, se mohu nyɛɛ pee nyɛ he nimli hehi ngɛ nyɛ nɔ́ fɛɛ nɔ peemi mi, kɛkɛ ɔ, nyɛ ma yɔse bɔ nɛ e blɔ ɔmɛ maa hi kɛ ha nyɛ ha.

3Akɛnɛ Mawu tsɔlɔ ji mi he je ɔ, i ngɛ nyɛ ti nɔ tsuaa nɔ dee ke e ye lɛ nitsɛ e he odase ngɛ anɔkuale mi, nɛ e bu hemi kɛ yemi nɛ Mawu kɛ ha lɛ ɔ he akɔtaa nɛ e hyɛ ha. 4-5Nɛ kaa bɔ nɛ nɔmlɔ tso kake he níhi hiɛ fuu ɔ, ja a nɔuu nɛ Kristo nɔmlɔ tso ɔ hu ngɛ. E nɔmlɔ tso ɔ he níhi ji wɔ tsuo, nɛ wɔ tsuo wa piɛ he loko e peeɔ mluku, ejakaa wɔ tsuo wa ni tsumi ngɛ slɔɔto. Lɔ ɔ he je ɔ, wa ngɛ kɛ ha wa bi, nɛ nɔ tsuaa nɔ e he nɔ́ hia e nyɛmi.

6Mawu dloo wa ti nɔ tsuaa nɔ nile slɔɔto ko nɛ e kɛ peeɔ nɔ́ pɔtɛɛ ko saminya. Lɔ ɔ he je ɔ, ke o dloomi ɔ ji gbami ɔ, moo gba be fɛɛ be, si abɔ nɛ o hemi kɛ yemi ɔ pi si nɛ Mawu sɛ baa o ngɔ ɔ. 7Nɛ ke o dloomi ɔ ji kaa o sɔmɔ ni kpahi ɔ, mo sɔmɔ mɛ saminya, nɛ ke tsɔɔlɔ ji mo ɔ, moo tsɔɔ ni ɔ bɔ nɛ sa. 8Nɛ nɔ nɛ fiɛɔ Mawu Munyu ɔ, e fiɛ Munyu ɔ saminya bɔ nɛ e maa ye kɛ bua. Nɔ nɛ Mawu dloo lɛ sika a, e dɛ mi nɛ jɔ nɛ e ye kɛ bua ohiafohi. Nɔ nɛ a ha lɛ ni tsumi he blɔ nya tomi he nile nɛ e ngɛ ni tsumi ko nɔ hyɛe ɔ, e tsu ni ɔ kɛ hɛ dɔ. Nɛ ni nɛmɛ nɛ woɔ nihi a bua a, a pee kɛ tsui mi jɔmi kaa Kristo se nyɛɛli.

9Osato peemi nɛ ko hi suɔmi mi, se mohu nyɛ suɔmi ɔ nɛ hi kɛ pi si. Nyɛɛ nyɛ nɔ́ nɛ dɛ, nɛ nyɛ fi nɔ́ kpakpa se. 10Nyɛɛ suɔ nyɛ he kɛ nyɛmimɛ a suɔmi nɛ nyɛɛ bu nyɛ he. 11Nyɛ ko pee hejɔ ngɛ ni tsumi mi, se nyɛ sɔmɔ Nutsɔ ɔ kɛ nyɛ tsui kulaa.

12Nyɛ na níhi tsuo nɛ Mawu to kɛ ha nyɛ ɔ he bua jɔmi. Nyɛɛ to nyɛ tsui si ngɛ haomi mi, nɛ nyɛɛ sɔle daa. 13Nyɛ ji nihi nɛ sa kaa nyɛɛ ye kɛ bua Mawu bimɛ nɛ e fi mɛ ɔ, nɛ nyɛɛ pee nihi nubwɔ.

14Ke nɔ ko wa nyɛ yi mi ngɛ Kristo se nyɛɛli nɛ nyɛ ji ɔ he je ɔ, nyɛ ko gbiɛ lɛ se mohu nyɛɛ sɔle nɛ Mawu nɛ gbaa lɛ. 15Nyɛɛ kɛ nihi nɛ ngɛ nyae ɔ nɛ nya, nɛ nyɛɛ kɛ nihi nɛ ngɛ kɔmɔ yee ɔ nɛ ye kɔmɔ. 16Nyɛɛ pee kake kɛ tsu ni. Nyɛ ko pee nyɛ he ni agbo peeli, se mohu nyɛɛ kɛ nihi nɛ baa a he si ɔ nɛ bɔ; nɛ nyɛ ko bu nyɛ he ni leli.

17Nyɛ ko ngɔ yayami kɛ to yayami nane mi; nɛ nyɛɛ ba nyɛ je mi bɔ nɛ nihi maa na kaa anɔkualetsɛmɛ ji nyɛ nɛ nyɛ hi kɛ pi si. 18Nyɛɛ kɛ nɔ ko nɛ ko pɛ; nɛ nyɛɛ bɔ mɔde nɛ nyɛɛ kɛ nɔ tsuaa nɔ nɛ hi si ngɛ tue mi jɔmi mi.

19Mamimɛ suɔli, nyɛ ko to nɔ ko yayami nane mi. Nyɛɛ ngmɛɛ enɛ ɔ he kɛ ha Mawu nɛ e ye kɛ ha nyɛ, ejakaa e wo si kaa e maa to nane mi kɛ ha ni nɛmɛ nɛ e sa mɛ ɔ. 20Enɛ ɔ he je ɔ, ke hwɔ ngɛ o he nyɛlɔ yee ɔ, ha lɛ ni nɛ e ye. Ke kuma nɛ ngɛ lɛ yee ɔ, ha lɛ nyu nɛ e nu, ejakaa ke o pee ja a, o ngɛ “ ha kɛ la muɔe kɛ ngɛ e yi kpɛti puee.” 21Enɛ ɔ tsɔɔ kaa zo maa gbe lɛ ngɛ nɔ́ nɛ e pee ɔ he. Ko ha yayami he blɔ nɛ e ye o nɔ, se mohu o pee kpakpa kɛ ye yayami nɔ.