Kpo Jemi 10

Mawu blɔ nya tomi ɔ ba mi

1Jehanɛ ɔ, i na bɔfo ngua kpa ko hulɔ nɛ ngɛ si kplee kɛ je hiɔwe. Bɔ kuu bɔle e he nɛ alale ngɛ e yi mi. E hɛ mi ngɛ kpɛe kaa pu, nɛ e nanehi a he ngɛ la pae.

2E hɛɛ womi kpo wayo ko nɛ a bli mi ngɛ e dɛ mi. E ngɔ e hiɔ nane kɛ ma wo ɔ nɔ, nɛ e kɛ e muɔ nane ɔ hu ma zugba. 3E kpa ngmlaa wawɛɛ, nɛ e gbi pɛ kaa jata. Kɛkɛ nɛ hiɔwe simi kpaago ɔmɛ wo gbi.

4Jinɛ i yaa ngma nɔ́ nɛ hiɔwe simi kpaago ɔmɛ de ɔ, se gbi ko je Hiɔwe de mi ke, “Koo ngma. E sɛ kaa a munyu ɔmɛ a je kpo!”

5Kɛkɛ nɛ bɔfo ngua a nɛ daa si ngɛ wo kɛ zugba nɔ ɔ wo e hiɔ nine nɔ kɛ ho hiɔwe ya. 6Nɛ e kã nɔ nɛ ngɛ daa kɛ daa a kita, nɔ nɛ bɔ hiɔwe kɛ nɔ́ tsuaa nɔ nɛ ngɛ e mi ɔ, kɛ zugba kɛ nɔ́ tsuaa nɔ nɛ ngɛ e nɔ ɔ, kɛ wo kɛ nɔ́ tsuaa nɔ nɛ ngɛ e mi ɔ; ke a ko puɛ be hu. 7Se ke bɔfo kpaagone ɔ kpa e bliigo ɔ pɛ a maa gbe Mawu laami blɔ nya tomi ɔ nya, kaa bɔ nɛ e de lɛ nitsɛ e tsɔli nɛ ji gbali ɔmɛ ɔ. 8Kɛkɛ nɛ gbi nɛ je hiɔwe ɔ tu mi munyu ekohu ke, “Yaa nɛ o ya he womi kpo nɛ a bli mi ngɛ bɔfo ɔ nɛ daa si ngɛ wo kɛ zugba nɔ ɔ dɛ mi ɔ.”

9Lɔ ɔ he je ɔ, i ya na lɛ nɛ i de lɛ ke e ngɔ womi ɔ kɛ ha mi. Nɛ e de mi ke, “Mo he nɛ o ye. E maa ngɔ ngɛ o nya mi kaa hwo. Se ke o mi lɛ ɔ, e maa duɔ ngɛ o mi mi!” 10Kɛkɛ nɛ i ngɔ womi kpo wayo ɔ ngɛ bɔfo ɔ dɛ mi nɛ i ye. Nɛ kaa bɔ nɛ e de pɛpɛɛpɛ ɔ, e ngɔ ngɛ ye nya mi kaa hwo, se benɛ i mi lɛ ɔ, ye muklii mi kɔɔ mi.

11Nɛ e de mi ke, “E sa nɛ o gba ekohu ngɛ nimli fuu kɛ mahi kɛ wɛtsohi kɛ matsɛmɛ a he.”