Kpo Jemi 1

1Womi nɛ ɔ tsɔɔ níhi nɛ maa ba hwɔɔ se ngɛ Yesu Kristo wami si himi mi. Mawu ngmɛ lɛ blɔ nɛ e je ni nɛ ɔmɛ kpo kɛ tsɔɔ e sɔmɔlɔ Yohane ngɛ ni nami mi. Nɛ e tsɔ bɔfo kɛ je hiɔwe kɛ ba nɛ e ba tsɔɔ ni nami ɔ sisi. 2Nɛ Yohane ngma Mawu kɛ Yesu Kristo munyu ɔmɛ nɛ e nu ɔ kɛ níhi nɛ e na amɛ tsuo pɛpɛɛpɛ.

3Ke ji o kane kikɛmɛ a gbami munyu nɛ ɔ kɛ tsɔɔ asafo ɔ, o ma na jɔɔmi pɔtɛɛ ko kɛ je Nutsɔ ɔ dɛ. Nihi nɛ maa bu munyu ɔ tue nɛ a maa pee níhi nɛ a de ɔ, mɛ hu a maa jɔɔ mɛ. Ejakaa be nɛ ní nɛ ɔmɛ maa ba a su ta. 4Nɛ Yohane ngma kɛ ya ha asafohi kpaago nɛ ngɛ Asia zugba a nɔ ɔ ke: Dloomi kɛ he jɔmi nɛ je Mawu, nɔ nɛ ngɛ ɔ, kɛ nɔ nɛ hi si sa a, kɛ nɔ nɛ maa ba a, kɛ mumihi kpaago nɛ ngɛ e matsɛ sɛ ɔ hɛ mi ɔ dɛ mi ha nyɛ. 5Dloomi kɛ he jɔmi nɛ je Yesu Kristo hu dɛ mi ɔ kɛ ha nyɛ, lɛ nɔ nɛ e je anɔkuale ɔ tsuo kpo kɛ tsɔɔ wɔ ɔ. Lɛ ji kekle nɔ nɛ te si kɛ je gbeje, nɛ e be gboe hu. E kle pe zugba a nɔ matsɛ ɔmɛ tsuo. A je e yi, lɛ nɔ nɛ suɔ wɔ nɛ e ngɔ e muɔ kɛ kpɔ wɔ kɛ je wa he yayami ɔmɛ a mi ɔ. 6Nɛ e ngɔ wɔ kɛ wo e matsɛ yemi ɔ mi nɛ e pee wɔ osɔfohi kɛ ha e Tsɛ ɔ. Lɛ a ngɔ neneene anunyami kɛ nɔ yemi kɛ ha.

7Hyɛ, e ma kɛ bɔ kuu ɔmɛ, nɛ nɔ fɛɛ nɔ maa na lɛ, kɛ nihi nɛ gbɔ lɛ nɔ́ ɔ tete, nɛ zugba a nɔ bimɛ tsuo ma fo ya ngɛ e he. E ba mi ja. Amen.

8Nutsɔ Mawu ɔ ke, “Ami ji A kɛ Z, Sisije kɛ Nyagbe,” nɔ nɛ ngɛ, kɛ nɔ nɛ hi si sa a, kɛ nɔ nɛ maa ba a, Mawu Ope ɔ.

9Ami nyɛ nyɛminyumu Yohane nɛ ngɛ nyɛ womi nɛ ɔ ngmae, nɔ nɛ e kɛ nyɛ tsuo na nɔ́ ngɛ Nutsɔ ɔ he ɔ. Ami hu i na Yesu tsui si tomi ngɛ amanehlu mi ɔ eko, nɛ wa nine maa su e matsɛ yemi ɔ nɔ.

A je mi we kɛ ho Patmo wo kpɔ ɔ nɔ ya ngɛ Mawu munyu ɔ nɛ i fiɛ, kɛ nɔ́ nɛ i le nɛ i de ngɛ Yesu Kristo he ɔ he je.

Anunyami nihi nɛ Yohane na a sisije

10Mumi ɔ ba ye nɔ benɛ i ngɛ sɔlee ngɛ Nutsɔ ɔ ligbi ɔ nɔ, nɛ i nu gbi wawɛɛ ko kaa tɛtlɛmatlɛ gbi ngɛ ye se; 11nɛ e de mi ke, “Ngmaa nɔ́ tsuaa nɔ nɛ o ngɛ nae ɔ ngɛ womi mi, nɛ o kɛ mane asafohi kpaago nɛ ngɛ Efeso, Smirna, Pergami, Tiatira, Sarde, Filadelfia kɛ Laodikea.”

12Benɛ i plɛ ye he nɛ ma hyɛ nɔ nɛ ngɛ munyu ɔ tue ɔ, i na sika tsu kane tsohi kpaago, 13kɛ nɔ ko nɛ ngɛ kaa Yesu Kristo, nɔ nɛ tsɛ e he ke Nɔmlɔ Bi ɔ, ngɛ kane tso kpaago ɔmɛ a kpɛti. E wo tade klɔii nɛ e kɛ kpa nɛ ngɛ kaa sika tsu fi e kpɛti. 14E yi bwɔmi hiɔ futafuta kaa klala, nɛ e hɛ ngmɛ tsuɔ kaa la. 15E nanehi a he ngɛ kpɛe kaa ayawa nɛ a tsu he, nɛ e gbi he wa kaa oslɔkehi nɛ ngɛ kue. 16E hɛɛ dodoehi kpaago ngɛ e hiɔ nine mi, nɛ hiɔ̃ nya enyɔtsɛ, nɛ nya ba, ngɛ e nya mi. E hɛ mi ngɛ kpɛe kaa piani pu.

17Benɛ i na lɛ ɔ, i nɔ si ngɛ e nane nya nɛ i pee kaa nɔ nɛ gbo. Kɛkɛ nɛ e kɛ e hiɔ nine fɔ ye nɔ nɛ e de mi ke, “Koo ye gbeye! Ami ji Kekle kɛ Nyagbe nɔ ɔ, 18kɛ Hɛ kalɔ ɔ! I gbo se ye hɛ ngɛ kɛ yaa neneene; nɛ i hɛɛ gbeje kɛ gbenɔ nya safie ɔmɛ. 19Lɔ ɔ he je ɔ, ngmaa níhi nɛ o na a, kɛ níhi nɛ a ma je kɛ tsɔɔ mo ngɛ enɛ ɔmɛ a se ɔ. 20Dodoehi kpaago nɛ o na ngɛ ye hiɔ nine mi kɛ sika tsu kane tsohi kpaago ɔ a sisi tsɔɔmi ji: dodoehi kpaago ɔmɛ ji asafohi kpaago ɔmɛ a nya bɔfohi, nɛ kane tsohi kpaago ɔmɛ ji asafohi kpaago ɔmɛ nɛ.”