La Amɛ 92

Hejɔɔmi ligbi nɔ la

1E sa kaa a na Tsaatsɛ Mawu si, nɛ a la kɛ je Mawu Ope ɔ yi.

2A na lɛ si daa mɔtu ngɛ e mi mi jɔmi he; nɛ daa gbɔkuɛ ɔ, a nya ngɛ e anɔkuale yemi ɔ he. 3A la kɛ saku kɛ je e yi. 4Ejakaa mo Tsaatsɛ Mawu o pee níhi fuu kɛ ha mi. Lɔ ɔ he je nɛ ye bua jɔ ngɛ. I ngɛ lae kɛ bua jɔmi.

5Oo Neneene Tsɛ, hyɛ bɔ nɛ o nyakpɛ ni tsumi ɔmɛ kle ha! O susumi ɔmɛ a mi kuɔ. 6Nihi nɛ susuu we a yi mi ɔ nui sisi; nɛ nihi nɛ be juɛmi hu be enɛ ɔ nya nae, 7nɔ he je nɛ yi mi wali mohu ngɛ plɔkee kaa nga, se neneene hɛ mi kpatami pɛ ji nɔ́ nɛ ngɛ ha mɛ. 8Se mo Tsaatsɛ Mawu o kle kɛ yaa neneene. 9Nɛ o he nyɛli ɔmɛ a hɛ mi ma kpata; nihi nɛ tsuɔ yi mi wami ni tsumi ɔmɛ tsuo ɔ, a maa gbɛ mɛ ke fia.

10O ha nɛ ye he wa kaa na ku; nɛ o jɔɔmi ɔ ha nɛ ye bua jɔ ye he. 11I ma na nɔ́ nɛ i suɔ nɛ e ba ye he nyɛli ɔmɛ a nɔ ɔ kɛ ye hɛ ngmɛ, nɛ i ma nu kɛ ye tue, nɔ́ nɛ i suɔ nɛ e ba yi mi wali nɛ te si kɛ wo mi ɔmɛ a nɔ ɔ. 12Dali maa bɔ kaa tã, nɛ a maa wa kaa Lebanon Sida tsohi. 13Nihi nɛ he si ngɛ Mawu we ɔ, a maa bɔ ngɛ Mawu Sɔlemi We ɔ. 14A maa wo yiblii ngɛ a bwɔmi si tete; a maa hi he wami nɛ a maa pee pɔpɔɔpɔ. 15Nɛ a ma kɛ tsɔɔ kaa dalɔ ji Tsaatsɛ Mawu, nɛ lɛ ji ye tɛ sa, nɛ nɔ́ yayami ko be e mi.