La Amɛ 89

Mawu kɛ David a somi ɔ

1I ma la ma je Tsaatsɛ Mawu yi be fɛɛ be ngɛ e mi mi jɔmi ɔ he. I ma je o anɔkuale ɔ kpo ma tsɔɔ nɔ tsuaa nɔ. 2O suɔmi kɛ mi mi jɔmi ɔ ngɛ daa; nɛ o anɔkuale ɔ maa si kaa hiɔwe kɛ yaa neneene. 3O de ke, “I kɛ nɔ nɛ i hla a so, nɛ i ka ye sɔmɔlɔ David kita. 4Ma ha o bimɛ maa da si kpɛii kɛ ya neneene, nɛ i ma ha nɛ o matsɛ yemi ɔ maa hi si kɛ ya yi nɔhi kulaa!” 5Oo Tsaatsɛ Mawu, hiɔwe tsuo ma je o nyakpɛ ni tsumi ɔmɛ a yi, nɛ klɔuklɔu bi ɔmɛ ma la kɛ je o yi ngɛ o anɔkuale ɔ he. 6Ejakaa mɛnɔ kulaa ngɛ hiɔwe nɛ a ma kɛ to Tsaatsɛ Mawu he? Bɔfo agbo te nɔ nɛ kɛ lɛ sɔ nɛɛ? 7Klɔuklɔu bi ɔmɛ yee lɛ gbeye. Nɔ kpa ko be nɛ nihi nɛ bɔle lɛ ɔ buu kaa lɛ. 8Oo Yehowa, hiɔwe Tatsɛ, jije Mawu ko ngɛ nɛ kle kaa mo? Anɔkualetsɛ ji mo.

9O yeɔ wo ɔmɛ a nɔ, ke kɔɔhiɔ ngɛ fiae gbeyegbeye, nɛ oslɔke ɔmɛ gli ɔ, o tuɔ munyu nɛ a he jɔɔ 10Mo nɛ o ku Rahab dukuduku. Nɛ o kɛ o he wami ɔ gbɛ o he nyɛli ɔmɛ kɛ fia. 11O nɔ ji hiɔwe kɛ je ɔ. O nɔ ji nɔ́ fɛɛ nɔ, ejakaa mo nɛ o bɔ mɛ tsuo. 12Mo nɛ o bɔ jɔ mi je kɛ wo yi je! Tabor Yoku kɛ Hermon Yoku ɔ bua jɔɔ a he kaa mo ji a bɔlɔ. 13O kɔni mi wa, nɛ o nine si hu wa. O hiɔ nine ya hiɔwe gojoo.

14O matsɛ yemi sɛ ɔ maa si ngɛ dami kɛ kojomi nɔ, nɛ mɔbɔ nami kɛ anɔkuale ngɛ o nɔ́ tsuaa nɔ peemi mi. 15Hyɛ bɔ nɛ nihi nɛ laa kɛ jaa mo ɔ naa bua jɔmi ha, o hɛ mi la a mi nɛ a nyɛɔ ngɛ. 16O he je nɛ a naa bua jɔmi ngɛ daa, nɛ o dami ɔ he a buu mɛ ngɛ. 17Ejakaa mo ji a he wami. Mɛni anunyami ji nɛ! Nɛ o mɔbɔ nami ɔ he je nɛ wa naa he wami. 18Tsaatsɛ Mawu nitsɛ nɛ buu wa he, nɛ lɛ nɛ ji Israel Nɔ Klɔuklɔu ɔ, e ha wɔ matsɛ.

19O tu munyu kɛ gu ni nami mi nɛ o de o gbalɔ ɔ ke, “I hla niheyo saminya ko kɛ je nimli gu ɔmɛ a kpɛti nɛ e ye matsɛ. 20Lɛ ji ye sɔmɔlɔ David. I ngɔ ye nu klɔuklɔu ɔ kɛ pɔ lɛ. 21I ma ha e da si kpɛii, nɛ i ma wo lɛ he wami. 22E he nyɛli be e nɔ yee, nɛ yi mi walɔ be e nɔ he wami nae. 23I ma ku e he nyɛli kɛ pue si ngɛ e hɛ mi, nɛ ni nɛmɛ nɛ sume lɛ ɔ, i ma kpata a hɛ mi. 24I ma bu e he nɛ i ma jɔɔ lɛ be fɛɛ be, nɛ ye suɔmi ɔ maa bɔle e he. Ye he je ɔ, e ma he biɛ wawɛɛ. 25E nɔ yemi he ɔ maa je Yufrate Pa a he kɛ ya si Mediterenea Wo ɔ nya. 26E ma kpa ngmlaa ma de mi ke, ‘Mo ji ye Tsɛ, ye Mawu kɛ tɛ sa he nɛ i laa ye he ngɛ.’ ”

27“I ma pee lɛ ye binyumu Tɛte, nɛ e maa kle pe zugba a nɔ matsɛ ɔmɛ tsuo. 28Ye suɔmi maa hi e nɔ kɛ ya neneene, nɛ ma na lɛ mɔbɔ be fɛɛ be. Nɛ i kɛ lɛ wa kpɛti somi ɔ se be poe gblee. 29Bimɛ nɛ maa ba ngɛ e se ɔ, a nya be tae ligbi ko, nɛ e matsɛ sɛ ɔ maa hi si daa kaa hiɔwe ligbi ɔmɛ. 30Ke e bi ɔmɛ ngmɛɛ ye mlaa amɛ a he nɛ a yi a nɔ ɔ, 31ke a tɔ ye mlaa amɛ a nɔ, nɛ a yi ye kita amɛ a nɔ ɔ, 32i ma gbla a tue kɛ kpa. 33Se i be ye suɔmi kɛ mi mi jɔmi ɔ jee gblee kɛ je a nɔ kulaa, nɛ i be si womi ɔ hu mi poe. 34I ma ye ye somi ɔ nɔ, nɛ i be nɔ́ nɛ i de kɛ ye nya a tsakee. 35Si abɔ nɛ i ka kita ngɛ klɔuklɔu nɛ i ji ɔ nya, kaa i be David sisie ɔ, 36e matsɛ yemi weku ɔ be gue gblee, nɛ e matsɛ sɛ ɔ maa hi si daa kaa pu ngɛ ye hɛ mi. 37E maa hi si daa kaa nyɔhiɔ, nɛ e maa pee ye anɔkua odase ngɛ hiɔwe.”

38Se mɛni he je nɛ o sake mi kɛ fɔ he mɔ, nɛ o kua mi? Mɛni ba nɛ o mi mi fu nɔ nɛ o pɔ lɛ nu ɔ? 39Anɛ o po o kɛ lɛ nyɛ kpɛti Somi ɔ mi lo? Ejakaa o kpɔ e matsɛ pɛɛ ɔ kɛ fɔ zugba. 40O ku e he gbogbohi nɛ buu e he ɔ kulaa, nɛ o hule mwɔhi nɛ e laa e he ngɛ mi ɔ tsuo. 41Nɔ fɛɛ nɔ nɛ ngɛ bee ɔ ngɛ e níhi hae, nɛ nihi nɛ ngɛ e kasa mi ɔ ngɛ e he fɛu yee. 42O wo e he nyɛli he wami nɛ a ye e nɔ, nɛ o ha a bua jɔ a he. 43O sake e ta hwumi klaate ɔ ngɛ e dɛ kɛ fɔ he, nɛ o wa we lɛ ngɛ ta mi hu. 44O ha e anunyami ɔ ba nyagbe, nɛ o plɛ e matsɛ sɛ ɔ kɛ bu si. 45O po e nihe be ɔmɛ a nɔ, nɛ o ha e bwɔ, nɛ o ha e hɛ mi pue si ngɛ ma hɛ mi.

46Oo Yehowa, mɛni be enɛ ɔ maa ya nɔ kɛ ya si? Anɛ o maa ngɔ o he kɛ laa mi kɛ ya si nyagbe lo? Mɛni be o mi mi fumi ɔ maa tso kaa la kɛ ya si? 47Mo kai be nɛ o to kɛ ha nɔmlɔ adesa nɛ e maa ye ngɛ je mi ɔ. Anɛ si himi gu kɛkɛ nɛ o bɔ nɔmlɔ ke e ba hi lo? 48Nɔmlɔ adesa ko be si hie kɛ ya neneene. Nɔ fɛɛ nɔ ma gbo. Mɛnɔ ma nyɛ kpɔ e susuma kɛ je gbenɔ muɔ ɔ he wami dɛ? 49Tsaatsɛ Mawu, jije suɔmi nɛ o kɛ suɔ mi sa a ngɛ? Jije mi mi jɔmi nɛ o wo David si ngɛ he ngɛ o anɔkuale mi ɔ ngɛ? 50Tsaatsɛ Mawu, moo hyɛ bɔ nɛ nɔ fɛɛ nɔ ngɛ mi nyangee ha; kɛ bɔ nɛ i na tsui ngɛ ye hɛ mi nɛ a ngɛ kae ɔ he. 51O he nyɛli ɔmɛ ngɛ ye he fɛu yee; a ngɛ nɔ nɛ o pɔ lɛ nu kaa a matsɛ ɔ he fɛu yee. 52A je Tsaatsɛ Mawu yi kɛ ya neneene. Amen, Amen!