La Amɛ 63

Mawu se blɔ hlami

1Oo Tsaatsɛ Mawu, ye Mawu, hyɛ bɔ nɛ i hla o se blɔ hluu ha! Hyɛ bɔ nɛ o he kuma ye mi ha ngɛ nga kplanaa nɛ ɔ nɔ, he nɛ nyu ko be. O he hia mi saminya! 2I suɔ kaa ma ya o he klɔuklɔu ɔ konɛ ma na o he wami kɛ o anunyami ɔ. 3Ejakaa o suɔmi kɛ o mi mi jɔmi hi ha mi hluu pe wami tete. I ngɛ o yi jee. 4I ma je o yi be abɔ nɛ i ngɛ je mi ɔ, nɛ i ma wo ye ninehi a nɔ nɛ ma sɔle kɛ ha mo. 5Nyagbe mi ɔ, ye bua maa jɔ ye he saminya, nɛ i ma je o yi kɛ bua jɔmi babauu.

6I hwɔɛ mahe nyɔnyɔɔnyɔ nɛ i ngɛ o he susue, 7ngɛ bɔ nɛ o ye kɛ bua mi ɔ he. Nɛ ye bua jɔ ye he babauu nyɔ ɔ mi tsuo benɛ i ngɛ o pɛlihi a sisi nɛ o ngɛ ye he bue ɔ. 8I nyɛɛ o se kpakpaakpa, nɛ o hiɔ nine nɛ mi wa a hɛɛ ye mi nɛ e ngɛ ye he bue. 9Se nihi nɛ ngɛ ye gbemi he ga woe ɔ maa ya neneene hɛ mi kpatami mi. 10A ma gbo ngɛ klaate nya nɛ nga mi gbehi maa ye mɛ. 11Se ami lɛɛ ye bua maa jɔ ye he ngɛ Mawu mi. Nɔ fɛɛ nɔ nɛ heɔ e nɔ yeɔ ɔ, e bua nɛ jɔ, se lakpatsɛ ɔmɛ lɛɛ a ma ha a maa pee dii.