La Amɛ 60

Israel kpɔmi he Sɔlemi

1Oo Tsaatsɛ Mawu, o kua wɔ nɛ o ku wa he gbogbohi tsuo. O mi mi fu nɛ o si wɔ. Tsaatsɛ Mawu, moo pee wɔ o nihi ekohu. 2O ha nɛ ma nɛ ɔ ye gbeye nɛ e hoso; o ywia ma a. Tsaatsɛ Mawu, mo dla ma a amlɔ nɛ ɔ nɔuu, ejakaa e huanya kɛ e sisi tomi ɔ tsuo. 3O wa wɔ yi mi wawɛɛ, nɛ o ha wa na nɔ saminya.

4Se o ha wɔ aflaangaa nɛ maa nyɛɛ wa hɛ mi. Nɛ nɔ fɛɛ nɔ nɛ suɔ anɔkuale ɔ maa nyɛɛ e se, 5konɛ o nyɛ nɛ o kpɔ o suɔmi bi ɔmɛ. Moo ngɔ o hiɔ nine nɛ mi wa a nɛ o kɛ kpɔ wɔ. 6Tsaatsɛ Mawu de kɛ je e he klɔuklɔu ɔ ke, “I ma gba Sekem kɛ Suko dɔ ɔ kɛ ha ye nimli ɔmɛ. 7Ye nɔ ji Gilead kɛ Manase. Efraim ma fɔ tatsɛ nguahi, nɛ Yuda mi matsɛhi maa je. 8Moab maa pee ye sɔmɔlɔ, nɛ Edom hu ye nyɔguɛ. Nɛ i ma ye Filisti bi ɔmɛ a nɔ kunimi.”

9Mɛnɔ kɛ mi maa ya Edom mahi nɛ a ngɛ a he bue ɔ a mi nɛ ma ya ye a nɔ kunimi? 10Mawu ji nɔ nɛ maa pee. Nɔ nɛ sake wɔ kɛ fɔ he ɔ! Lɛ Nɔ nɛ ngmɛɛ wa he kɛ ha wa he nyɛli ɔmɛ ɔ. 11Tsaatsɛ Mawu, moo ye kɛ bua wɔ nɛ waa kɛ wa he nyɛli ɔmɛ nɛ kpe, ejakaa adesa yemi kɛ buami sui he ko.

12Ke Mawu ye kɛ bua wɔ ɔ, wa maa pee ni nguahi, ejakaa e maa naa wa he nyɛli ɔmɛ a nɔ.