La Amɛ 56:3

He kɛ Mawu nɔ fɔmi

1Tsaatsɛ Mawu, moo na mi mɔbɔ, ejakaa he nyɛli te si kɛ wo mi. A ngɛ mi haoe daa je nɛ maa na. 2He nyɛli nɛ kɛ mi ngɛ hwue ɔ a yi gbo, nɛ a ngɛ he blɔ hlae nɛ a ye ye nɔ.

3Ke be nɛ gbeye nu mi ɔ, i woɔ ye hɛ ngɔ fɔɔ o nɔ. 4I ma wo ye hɛ ngɔ fɔ Mawu si womi ɔmɛ a nɔ. Akɛnɛ i woɔ ye hɛ ngɔ fɔɔ Mawu nɔ ɔ, mɛni nɔmlɔ adesa ma nyɛ maa pee mi? 5A plɛɛ ye munyu hɛ mi kɛ buɔ si, nɛ a toɔ ye hɛ mi kpatami he ga daa ligbi. 6A buaa a he nya nɛ a woɔ ka ha mi ngɛ laami mi. A ngɛ ye se blɔ hlae nɛ a tane ye yi. 7A susuu kaa a maa ye a he kɛ a yayami ɔmɛ. Tsaatsɛ Mawu, mo ko ha mɛ he blɔ. Mo kplɔ mɛ kɛ pue si ngɛ o mi mi fumi ɔ nya.

8O na bɔ nɛ i hao nyɔ nɛ ɔ mi nɛ i fiaa si ha. O nu ye kɔmɔ ɔmɛ. O ngma kulaa ngɛ o womi ɔ mi.

9Ligbi ɔ nɛ i tsɛ mo pɛ nɛ ye he nyɛli ɔmɛ kpale ngɛ ye se. I le kaa Mawu ngɛ ye se. 10I ngɔ ye hɛ kɛ fɔ Mawu nɔ, nɛ i jeɔ e yi ngɛ e si womi ɔmɛ a he. 11O nɔ nɛ i wo ye hɛ ngɔ fo, mɛni nɔmlɔ adesa ma nyɛ mi maa pee? 12Tsaatsɛ Mawu, i ma ye ye si womi ɔmɛ a nɔ ha mo nɛ i ma na mo si ngɛ o yemi kɛ buami ɔ he. 13Ejakaa o kpɔ mi kɛ je gbenɔ dɛ mi, nɛ o ha we nɛ ye nane nɛ sane, bɔ nɛ pee nɛ ma sɔmɔ mo Tsaatsɛ Mawu ngɛ hɛ kali a zugba a nɔ.