La Amɛ 36

Yayami peeli a ni tsutsui

1Yayami ngɛ dikali a tsui mi, nɛ e ngɛ mɛ yayami peemi blɔ tsɔɔe be fɛɛ be. Mawu gbeye yemi ko be a mi nɛ maa gbla a se. 2A fĩaa nɛ a susuu kaa a ma nyɛ ha a yayami ɔmɛ a nɔ nɛ a be mɛ nae. 3Dika kɛ lakpa munyu pɛ nɛ a tuɔ; a pí a he ni leli kɛ nimli kpakpahi hulɔ. 4Dika ga pɛ nɛ a toɔ ngɛ sa mi nyɔnyɔɔnyɔ kɛ je nanɛɛ, nɛ a susuu we bɔ nɛ a ma kpa ngɛ yayami se mohu he.

5Se Tsaatsɛ Mawu, o suɔmi nɛ se pui ɔ ngɛ kɛ su hiɔwe tɔɔ, nɛ o anɔkuale ɔ ngɛ kɛ je hiɛmɛ nɛ ɔ kɛ ya si hiɔwe lokoo. 6O dami sane yemi hi kɛ pi si kaa o yoku ngua amɛ. Nɛ ni lemi nɛ ngɛ o kojomi ɔmɛ a mi kuɔ kaa bɔ nɛ wo ɔmɛ a mi kuɔ ɔ. Mo nɛ o baa nimli kɛ lohwehi tsuo a yi. 7Oo Neneene Tsɛ, hyɛ bɔ nɛ o suɔmi he jua wa ha, e ngɛ daa nɛ e tsakee we; o pɛlihi a sisi hɔ ɔ ji a laami he. 8O dlooɔ mɛ kɛ mo nitsɛ o niye ni nɛ a yeɔ, nɛ o haa mɛ nyu kɛ jee o bua jɔmi pa amɛ a mi nɛ a nuu.

9Ejakaa o mi a naa wami kɛ jee, nɛ o La a mi wa naa wa la ngɛ. 10Ha nɛ ni nɛmɛ nɛ le mo ɔ a na o suɔmi nɛ se pui ɔ; nɛ o he ni nɛmɛ nɛ suɔ kaa a maa pee o suɔmi nya ni ɔ a yi wami daa.

11Ko ha he nɔ woli nɛ ɔmɛ he blɔ nɛ a naa ye nɔ, nɛ o ko ha yi mi wali ɔmɛ a nine nɛ su ye nɔ. 12Moo hyɛ, a nɔ si. A wo mɛ kɛ fia si nɛ a be si tee hu.