La Amɛ 33

Asafo la

1Nyɛ dali kulaa nyɛ kpa ngmlaa kɛ bua jɔmi kɛ je Mawu yi, ejakaa e sa kaa a je e yi. 2Nyɛɛ fia yi jemi la ngɔngɔɛhi ngɛ saku kɛ kpa saku nɔ kɛ ha Mawu. 3Nyɛɛ po yi jemi la hehi nɛ nyɛɛ fia ngɛ kpa saku nɔ kɛ bua jɔmi kɛ ha lɛ.

4Ejakaa anɔkuale munyuhi ji Mawu munyu ɔmɛ, nɛ e sa kaa wa he nɔ́ tsuaa nɔ nɛ e pee ɔ waa ye. 5E suɔ nɔ́ nɛ da kɛ nɔ́ nɛ hi. E suɔmi ɔ hyi je ɔ tsuo. 6E tu munyu kɛkɛ nɛ hiɔwe ɔ bɔ ade kɛ e mi hlami kɛ dodoe ɔmɛ. 7E bɔ wo ɔmɛ nɛ e bua a nya kɛ to a to he.

8Nyɛ nimli nɛ ngɛ je ɔ mi tsuo, nyumuhi, yihi kɛ jokuɛwi, nyɛɛ ye Mawu gbeye nɛ nyɛ wo bumi kɛ ha lɛ. 9Ejakaa e tu munyu kɛkɛ nɛ je ɔ bɔ ade. E fã, nɛ e ba je kpo. 10E haa nɛ majemaje ɔ nɛ sume lɛ ɔ tsuo a yi mi tomi ɔmɛ peeɔ yaka. 11Se lɛ nitsɛ e blɔ nya tomi ɔmɛ ngɛ daa. E yi mi tomi ɔmɛ tsakee we, a ngɛ ja a nɔuu kɛ ha yi nɔhi kulaa.

12A jɔɔ ma nɛ e Mawu ji Yehowa, nɛ e hla e mi bimɛ ngɔ pee lɛ nitsɛ e nimli. 13Mawu fɔɔ hɛ kɛ jee hiɔwe lokoo nɛ e hyɛɔ adesahi a bimɛ. 14E naa je ɔ mi nimli ɔmɛ tsuo kɛ jee e sihi he ɔ. 15Lɛ nɛ e bɔ a tsuihi nɛ e naa nɔ́ tsuaa nɔ nɛ a ngɛ pee ɔ pɛpɛɛpɛ.

16Sojahi abɔ kɛ a ta hwumi ni kpakpahi be matsɛ ko yi wami nyɛe ma he. Ejakaa tsa pi nɔmlɔ he wami kɛkɛ nɔ nɛ a guɔ kɛ heɔ e yi wami. 17Ta hwumi okpɔngɔ kɛkɛ be hae nɛ a ye kunimi, e ngɛ he wami se e be yi wami nyɛe ma he.

18Mawu hɛ ngɛ nihi nɛ buu lɛ ɔmɛ a he, nɛ nihi nɛ wo a hɛ ngɔ fɔ e suɔmi kɛ mɔbɔ nami ɔ nɔ ɔ, e baa a yi daa. 19E kpɔɔ mɛ kɛ jee gbenɔ dɛ mi, nɛ e baa a yi ngɛ hwɔ be mi. 20Tsɛ ɔ pɛ nɔ wa ngɔ wa hɛ kɛ fɔ nɛ e he wa yi wami. Lɛ pɛ e ma nyɛ ye kɛ bua wɔ nɛ e maa bu wa he. 21Wa bua jɔɔ ngɛ Mawu mi, ejakaa e biɛ klɔuklɔu ɔ nɔ wa ngɔ wa hɛ kɛ fɔ. 22Oo Tsaatsɛ Mawu, mo ko ha nɛ o suɔmi ɔ se nɛ e po ngɛ wa nɔ, ejakaa mo kɛkɛ o nɔ nɛ wa ngɔ wa hɛ kɛ fɔ.