La Amɛ 29

Mawu he wami

1Nyɛ je Mawu yi, nyɛ e bɔfo ɔmɛ; nyɛ je e he wami kɛ e anunyami ɔ yi. 2Nyɛ je Tsɛ ɔ yi ngɛ e anunyami biɛ ɔ he. Nyɛɛ ba e hɛ mi kɛ níhi nɛ a he tsɔ.

3Mawu gbi ngɛ jijie ngɛ bɔ kuu ɔmɛ a mi. Anunyami Mawu ɔ ngɛ gbi woe ngɛ hiɔwe. 4He wami ngɛ e gbi ɔ mi; e ngɛ jijie kɛ agbo jemi. 5Gbi ɔ huleɔ sida tso ɔmɛ, nɛ e fɛɛ Lebanon tso agbo ɔmɛ a mi. 6E hosoo Lebanon kɛ Sirion yoku ɔmɛ, nɛ e haa a tuu kaa na bihi. 7Mawu gbi pɛ ngɛ hiɔmi oslabai ɔ mi. 8E gbi ɔ pɛ kɛ nyɛɛ nga a nɔ nɛ e ha nɛ Kades zugba a hoso. 9Tsaatsɛ Mawu gbi hosoo nɛ e hiaa tso nguahi kɛ pueɔ si. E haa nɛ hue ɔmɛ a mi peeɔ paa. A huanyaa ngɛ e hosomi ɔ nya. Se nɔ tsuaa nɔ kpaa ngmlaa ngɛ Sɔlemi We ɔ nɛ a deɔ ke, “Anunyami, anunyami ha Mawu!”

10Ngɛ nyu jemi be ɔ mi ɔ, Mawu tsɔɔ nɔ yemi he wami nɛ e hɛɛ ngɛ adebɔ níhi kulaa nɔ. Amlɔ nɛ ɔ hu e ngɛ e he wami ɔ tsɔɔe lolo. 11E ma ha e we bi ɔmɛ he wami. Nɛ e ma ha a na tue mi jɔmi.