La Amɛ 25

Haomi mi sɔlemi

1Oo Tsaatsɛ Mawu, mo nɛ i ngɛ kue fae ha. 2Ko kua mi. Mo o nɔ nɛ i wo ye hɛ ngɔ fo. Mo ko ha nɛ ye he nyɛli ɔmɛ a nine nɛ su ye nɔ. Ko ha nɛ a ye ye nɔ kunimi. 3Ni nɛmɛ nɛ heɔ o nɔ yeɔ ɔ, a hɛ mi be si puee ligbi ko. Se nihi tsuo nɛ yeɔ nihi awi, nɛ a pee we fɔ yemi nɔ́ ko ɔ, a ma kpata a hɛ mi.

4Oo Mawu, moo tsɔɔ mi blɔ nɛ sa nɛ ma gu ɔ. Ha nɛ ma le o blɔ dadɛ ɔ nɛ ma nyɛɛ nɔ. 5Mo kpaka mi nɛ o tsɔɔ mi ni, ejakaa mo ji Mawu nɛ heɔ ye yi wami. I be hɛ nɔ kami ko, ja mo kɛkɛ o mi nɛ i naa hɛ nɔ kami ngɛ daa. 6-7Oo Tsaatsɛ, moo ku hɛ kɛ fɔ ye nihe mi yayami ɔmɛ a nɔ. Nɛ o ngɔ mɔbɔ nami kɛ yayami pami, suɔmi kɛ mi mi jɔmi hɛ ngmɛ kɛ hyɛ mi.

8Mawu hi, nɛ dalɔ ji lɛ. E tsɔɔ blɔ tlali tsuo blɔ nɛ ji blɔ dadɛ ɔ. 9E maa tsɔɔ nihi nɛ maa kpale kɛ ba e ngɔ kɛ he si bami ɔ blɔ nɛ da, nɛ hi. 10E woɔ anɔkuale kɛ mi mi himi kɛ kpakaa nihi tsuo nɛ yeɔ e mlaa amɛ a nɔ, nɛ a buɔ e gbi tue ɔ.

11Se Mawu, ye he yayami ɔmɛ hiɛ tsɔ. Oo, moo ngɔ kɛ ke mi ngɛ o anunyami biɛ ɔ he je.

12Jije nɔmlɔ nɛ yee Mawu gbeye nɛ buɔ lɛ tue ɔ ngɛ? Mawu maa tsɔɔ lɛ blɔ nɛ e gu.

13Mawu maa jɔɔ lɛ, nɛ e bimɛ maa ye zugba a nɔ.

14Mawu kɛ nɔmlɔ huɛ bɔmi ɔ ngɛ kɛ ha nihi nɛ yee lɛ gbeye. Nɛ mɛ pɛ e haa nɛ a leɔ e si womi ɔmɛ a mi laami munyu ɔmɛ.

15I hyɛɔ Mawu blɔ daa nɛ e ye kɛ bua mi, ejakaa lɛ pɛ nɛ e ma nyɛ ma kpɔ mi. 16Ba koo, Tsaatsɛ, nɛ o ba je o mɔbɔ nami ɔ kpo ngɔ tsɔɔ mi, ejakaa peepee ta ye he, nɛ i ngɛ haomi agbo mi. 17Se ye haomi ɔmɛ a nya ngɛ wae. Oo, mo je mi kɛ je kulaa mi. 18Moo bu ye kɔmɔ yemi ɔmɛ tue, nɛ o nu ye nɔ́ yeyee ɔmɛ a he, nɛ o wo ye he yayami ɔmɛ tsuo ngɔ ke mi. 19Moo hyɛ bɔ nɛ ye he nyɛli hiɛ ha, kɛ bɔ nɛ a sume mi kulaa ha. 20Mo kpɔ mi kɛ je a dɛ mi nɛ o he ye yi wami. Oo, ko ha nɛ a de ke i he o nɔ ye yaka gu.

21Mo ha mi dami kɛ juɛmi kpakpa nɛ a pee ye he bumi níhi, ejakaa i ngɛ mo blɔ hyɛe nɛ o baa ye yi, 22nɛ o kpɔ Israel kɛ je e haomi ɔmɛ tsuo a mi.