Biblica® Open Dangme Living New Testament & Psalms 1997
La Amɛ 18:2
Verse 2 is marked below, with the whole chapter around it. Read from the start
David kunimi yemi he la
Tsaatsɛ Mawu, hyɛ bɔ nɛ i suɔ mo ha! Ejakaa o pee nyakpɛ níhi agbohi kɛ ha mi.
Yehowa ji ye tɛ sa, kɛ ye wesa he. Lɛ ji yoku mi he nɛ i laa ye he ngɛ. Lɛ ji ye Yiwamihelɔ. E ji tɛ sa kɛ mwɔ mi he nɛ ke i laa ye he ngɛ nɛ nɔ ko be ye he sue. Lɛ ji ye dama. E ngɛ kaa na ku e koli nɛ e kɛ nɔɔ kunɔ kɛ fãa e he. Nɔ́ nɛ hia mi peemi pɛ ji kaa ma kpa ngmlaa ma tsɛ lɛ kɛkɛ e ma he mi kɛ je he nyɛli ɔmɛ a dɛ mi. A je Mawu yi daa.
Gbenɔ fi mi kɛ e kpa amɛ, nɛ abosiamitsɛmɛ te si kɛ wo mi wawɛɛ. A du mi kpɛii nɛ i nɛ yemi kɛ buami ko, nɛ i hua hluu nɛ ma je ye he kɛ je gbenɔ kpa amɛ nɛ ngɛ mi gblae ɔmɛ a mi.
I kpa ngmlaa ngɛ ye haomi ɔ mi kɛ tsɛ Nutsɔ ɔ nɛ e ye kɛ bua mi. E he nɔ kɛ je Sɔlemi We ɔ. Jamɛ a be ɔ mi nɛ zugba huanya nɛ yoku ɔmɛ hoso, ejakaa Mawu na abofu. La gegeege je e nya mi nɛ e ha nɛ zugba a nu la; nɛ la su ku je e gugwɔ mi kɛ je kpo. E kple si kɛ je hiɔwe nɛ diblii ha e he. E hi bɔfo kerub nɔ nɛ e te kaa kɔɔhiɔ nɛ e ba ye kɛ bua mi. E wo diblii kɛ ha e he nɛ bɔ kuu kpii nɛ wo kaa nyu nyɛɛ e hɛ mi. Si kake too ɔ, e he kpɛmi ɔ je si ngɛ bɔ kuu ɔmɛ a mi kɛ hiɔmi tɛhi kɛ la nɛ ngɛ tsoe.
Nutsɔ ɔ wo gbi ngɛ hiɔwe, nɛ Mawu nɛ pe mawuhi kulaa a tu munyu kɛ hiɔmi tɛhi kɛ la nɛ ngɛ tsoe. Nɛ e kɛ hiɔmi la pami nɛ ngɛ kaa kɛ̃ɛ̃ mi bihi nɛ he ngɛ gbeye ɔ wo ye he nyɛli ɔmɛ fo. Oo Tsaatsɛ Mawu, ngɛ o fami ɔ nya a, wo fã. Nɛ ngɛ o mumi womi nya a, o pa amɛ a mi gbli nɛ a sisi tomi ɔmɛ fɔɔ si paa.
O je hiɔwe kɛ je mi kɛ je ye ka kɛ ye nɔ́ nami ɔmɛ a mi. O je mi kɛ je pahi nɛ mi kuɔ ɔmɛ a mi. O kpɔ mi, nɔ nɛ be yemi kɛ buami ko ɔ kɛ je ye he nyɛli kɛ nihi nɛ nyɛɛ mi ɔmɛ a dɛ mi.
Ligbi nɛ i gbɔjɔ pe kulaa a nɛ a te si ba tua mi, se mo Mawu o pɛtɛ ye he. O kpaka mi kɛ ho he nɛ ye yi ma na wami ngɛ ya, ejakaa o suɔ mi. Yehowa ye kɛ bua mi, ejakaa i peeɔ nɔ́ nɛ da nɛ ye he hu tsɔ. I bu e mlaa amɛ tue. I ji Mawu se, nɛ i pee we yayami. I yeɔ e mlaa amɛ kulaa a nɔ pɛpɛɛpɛ nɛ i tɔ we kake po nɔ. I bɔ mɔde nɛ i ye kulaa nɔ, nɛ i yu ye he kɛ je yayami peemi he. Lɔ ɔ he je ɔ, Nutsɔ ɔ dloo mi kɛ jɔɔmi babauu, ejakaa i peeɔ nɔ́ nɛ da. E le kaa ye tsui mi tsɔ, ejakaa e le ye nane hiami ɔmɛ tsuo.
Tsaatsɛ Mawu, o naa mɔbɔ nali ɔmɛ mɔbɔ. Nɛ dali ɔmɛ hu o kɛ mɛ yeɔ dami sane. O haa nihi nɛ a tsui mi tsɔ ɔmɛ naa jɔɔmi, nɛ nihi hu nɛ jee o blɔ ɔmɛ a nɔ ɔ naa haomi. O heɔ humihi a yi wami, se o kuɔ he woli kɛ fiali a nya. Mo nɛ o ha ye la a kpɛ. Nutsɔ ye Mawu ɔ ha nɛ ye diblii ɔ plɛ la. O he wami nya a, ma nyɛ ma tu gbogbo, nɛ ma nyɛ ma da ta fɛɛ ta nya.
E nɔ Mawu be! Hyɛ bɔ nɛ e hi kɛ pi si ha! E si womi ɔmɛ kulaa baa mi, nɛ e hine tu tɛ pulemi nɔ́ kɛ ha nɔ tsuaa nɔ nɛ laa ngɛ e se ɔ. Mɛnɔ nɛ e hine Mawu pe wa Mawu ɔ? Mɛnɔ nɛ hine tɛ sa pe lɛ?
E woɔ mi he wami, e baa ye yi nɛ e buu ye blɔ ɔmɛ kulaa a he kɛ yaa he tsuaa he. E ha we nɛ ye nane saneɔ ke i ngɛ kɔ̃ nya tete nyɛɛe. E fiɔ gbaja haa mi kɛ ha ta, nɛ e woɔ mi he wami nɛ i kɛ tsiɛɔ dade kɛ̃ɛ̃.
Mawu, o yi wami hemi ɔ ji ye dama. O hiɔ nine puleɔ mi, nɛ o mi mi himi he je ɔ, i pee agbo. O je blɔ gbajaa ha mi konɛ ma ko sane. O ha nɛ i wo ye he nyɛli ɔmɛ fo nɛ i nyɛɛ a se kɛ ya si i ya na mɛ. I fiaa mɛ ní nɛ i ye a nɔ. I nyɛ a nɔ kɛ wo zugba nɛ a nyɛ we nɔ́ ko nɛ a pee. I naa a kuɛhi a nɔ. O ha mi he wami nɛ i kɛ ye ye he nyɛli ɔmɛ a nɔ, ejakaa o fi gbaja ha mi kɛ ha ta a. O ha nɛ ye he nyɛli ɔmɛ tu fo ngɛ ye nya. I kpata ni nɛmɛ nɛ ngɛ mi nyɛɛ ɔmɛ a hɛ mi. Ngmlaa je a nya, se a nɛ bualɔ ko. A tsɛ Nutsɔ ɔ, se e pui a nya mi. I pee mɛ kaa zugba zu, nɛ i muɔ mɛ kɛ pue he kaa dwɔmi. O ha nɛ i ye kunimi ngɛ ta fɛɛ ta mi, nɛ o wo mi ma amɛ tsuo a nɔ tsɛ; nɛ nihi nɛ i li po ba pee ye sɔmɔli. Ma je li nɛ a kɛ mi kpi hyɛ tete po ba ha mi yi. Gbeye nu mɛ nɛ a je a laami he ɔmɛ ba ha yi.
Mawu ngɛ! Nyɛ je e yi, nɔ nɛ ji tɛ sa nɛ buu wa he ɔ. Lɛ ji Mawu nɛ woɔ nihi nɛ yeɔ mi awi ɔ hiɔ, nɛ e baa mahi si ngɛ ye hɛ mi.
Nɛ e kpɔɔ mi kɛ jee ye he nyɛli a dɛ mi. E kɛ mi toɔ pɛpɛɛpɛ nɛ a nine sui ye nɔ, nɛ e jeɔ mi kɛ jee he nyɛli kpanaku ɔmɛ a dɛ mi. Tsaatsɛ Mawu, enɛ ɔ he je ɔ, i ma je o yi ngɛ jejeeje tsuo. I ma la kɛ je o yi. O he mi, matsɛ nɛ o hla a, ye yi wami behi babauu kɛ gu nyakpɛ blɔhi a nɔ. O jeɔ o suɔmi kɛ mi mi jɔmi kpo daa kɛ tsɔɔ mi; nɛ o maa pee ja a nɔuu kɛ ha bibimɛ nɛ maa ba ngɛ ye se ɔ.
Biblica® Open Dangme Living New Testament & Psalms 1997. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.