La Amɛ 140

Kpɔmi kɛ je dikali a dɛ mi

1Oo Neneene Tsɛ, mo kpɔ mi kɛ je dikali a dɛ mi; moo baa ye yi kɛ je yi mi wali a dɛ mi, 2nihi nɛ toɔ nɔ yayami peemi he ga ngɛ a tsui mi nɛ a jeɔ sane be fɛɛ be ɔ. 3A lilɛ ngɛ kaa sinɔ duɔtsɛ lilɛ, nɛ a nya mi munyu ngɛ kaa sanga duɔ. 4Oo Tsaatsɛ Mawu, moo bu ye he kɛ je dikali ɔmɛ a dɛ mi; moo baa ye yi kɛ je yi mi wali ɔmɛ a dɛ mi, ejakaa a ngɛ ye he ga woe. 5He nɔ woli ɔmɛ tsɔ̃ mi klama ngɛ laami mi; a tsɔ̃ kpahi kɛ ha mi nɛ ma sɛ mi; a wo ya ngɛ blɔ ɔ he nɛ a kɛ nu mi.

6I de Yehowa ke, “Mo ji ye Mawu; moo bu ye kue fami ɔ tue! 7Oo Neneene Tsɛ, ye yi wami helɔ nɛ he wa. Mo nɛ o bu ye he ngɛ ta be ɔ mi. 8Tsaatsɛ Mawu, ko ha nɛ nɔ́ nɛ dikali ɔmɛ ngɛ hlae ɔ nɛ ba mi; ko ha nɛ yi mi wami ga nɛ a tsɔ̃ ɔ nɛ e nu nɔ́ , konɛ a ko wo a he nɔ. 9Mo ha nɛ a yi mi tomi ɔmɛ nɛ kpa kɛ bu a nɔ. Nɛ yayami nɛ a to kɛ ha mi ɔ nɛ kpata mɛ nitsɛmɛ a hɛ mi. 10Mo ha nɛ la ngu nɛ kpa pue a nɔ; nɛ a tsitsiɛ mɛ kɛ wo la mi, kɛ muɔ nɛ mi kuɔ mi, nɛ a ko nyɛ kpo nɛ a je hu.

11Mo ko ha nɛ lakpa yeli a ya nɔ ngɛ wa zugba a mi. Mo kpata a hɛ mi mla. 12I le kaa Tsaatsɛ Mawu maa ye kɛ bua nihi nɛ a ngɛ mɛ haoe ɔ; nɛ e ma fã ohiafo ɔmɛ a he. 13Anɔkuale, dali ɔmɛ maa na mo si, nɛ a maa hi o we ɔ.”