La Amɛ 132

David kpale Somi Daka a kɛ ba Zion

1Tsaatsɛ Mawu, mo kai David kɛ haomi ɔmɛ nɛ ba e nɔ ɔ. 2Bɔ nɛ e kã Neneene Tsɛ ɔ kita, nɛ e wo Mawu Ope ɔ si ke, 3i be we mi yae nɛ i be si hwɔe; 4i be mahe hwɔe nɛ i be kɔnɔɛ dee; 5kɛ ya si be nɛ i ma na hi he kɛ ha Neneene Tsɛ ɔ, hi he kɛ ha Yakob Mawu ɔ.

6Kekleekle ɔ, wa nu Somi Daka a he ngɛ Efrata, nɛ jehanɛ ɔ, wa ya na lɛ ngɛ Jaa nga a nɔ. 7Se amlɔ nɛ ɔ, e maa hi Mawu We ɔ. Wa maa ya e Sɔlemi We ɔ, nɛ wa ma ja ngɛ e nane nya. 8Moo te si, Neneene Tsɛ, kɛ ba Sɔlemi We ɔ kɛ Somi Daka nɛ ji o he wami ɔ.

9Mo ha nɛ o osɔfo ɔmɛ a pee nɔ dadɛ be fɛɛ be, nɛ o nimli ɔmɛ a hwɔ lele kɛ bua jɔmi.

10Mo ko kua o tsɔlɔ David, matsɛ nɛ o wo kɛ ha o nimli ɔmɛ ɔ. 11O wo David si nɛ o be o nya se kpalee. O de ke, “I ma wo o bi ɔmɛ a ti nɔ kake matsɛ nɛ e ma ba ye o se. 12Ke ji o binyumu ɔmɛ maa ye ye somi ɔ kɛ mlaa amɛ nɛ i ma wo ɔmɛ a nɔ ɔ, lɛɛ mɛ hu a bimɛ maa hi o matsɛ sɛ ɔ nɔ.”

13Oo Neneene Tsɛ, o hla Yerusalem kaa o sihi he. 14Nɛ o de ke, “Hiɛ ɔ maa pee ye sihi he daa, ejakaa ja a ji bɔ nɛ i suɔ. 15I ma ha ma nɛ ɔ maa ya nɔ, nɛ i ma ha e mi ohiafo ɔmɛ a nya ngma. 16I ma jɔɔ e mi osɔfo ɔmɛ ngɛ a nɔ fɛɛ nɔ mi, nɛ e mi nimli klɔuklɔu ɔmɛ ma la nɛ a ma hwɔ lele kɛ bua jɔmi. 17Nɛ i ma ha David bi ɔmɛ a ti nɔ kake maa pee matsɛ agbo, nɛ i ma ha nɛ nɔ nɛ i hla a, e matsɛ yemi ɔ maa da si. 18I ma bɔ e he nyɛli ɔmɛ ahlua, se lɛɛ e matsɛ yemi ɔ maa ya nɔ.”