La Amɛ 12

Dalɔ kpɔmi ngɛ yayami peeli a kpɛti

1Nutsɔ, moo ye kɛ bua wɔ! Nimli kpakpa amɛ tsuo ngɛ tae oyaoya. Jije nimli kpakpahi ngɛ piɔ ngɛ je ɔ mi? 2Nɔ tsuaa nɔ ngɛ lakpa yee nɛ e ngɛ e nyɛmi sisie; lakpa pɛ nɛ a ngɛ yee ha a he. Anɔkuale yemi be hu.

3Se Mawu be nihi nɛ ngɛ kikɛmɛ a ni nɛ ɔmɛ pee ɔ mɔbɔ nae. 4E ma kpata lakpatsɛ ɔmɛ a hɛ mi, nihi nɛ deɔ ke, “Wɔ nitsɛmɛ wa nya wa hɛɛ, nɛ nɔ́ nɛ wa suɔ ɔ nɛ wa ma de, wa maa ye lakpa bɔ nɛ wa ma nyɛ. Mɛnɔ maa ye wa nɔ?” 5Nɔ́ nɛ Mawu ngɛ jamɛatsɛ ɔmɛ dee ji, “I ma te si ma fã nihi nɛ a ngɛ mɛ amimi yee kɛ nihi nɛ be nɔ ko ɔmɛ a he, ejakaa i nu a kɛmɛmi kɛ a huu fami ɔ he, nɛ i ma kpɔ mɛ kaa bɔ nɛ a ngɛ mi blɔ hyɛe nɛ ma pee ɔ.” 6Nutsɔ ɔ wui si yaka. E tui munyu gu, nɛ gbi nɛ jee e nya a ji anɔkuale nɛ he tsɔ. E munyu ngɛ kaa sika hiɔ nɛ a tsu he si kpaago. 7Oo Nutsɔ, wa le kaa o maa bu o we bimɛ a he daa, nɛ o ma kpɔ mɛ kɛ je dikali a dɛ mi. 8Ejakaa yi wali kɛ dikali kpe je ɔ, nɛ nɔ́ yayami mohu yi nɛ nɔ tsuaa nɔ jeɔ.