Biblica® Open Dangme Living New Testament & Psalms 1997
La Amɛ 119
Mawu mlaa amɛ a he se nami
Nihi kulaa nɛ yeɔ Mawu mlaa amɛ a nɔ pɛpɛɛpɛ ɔ naa bua jɔmi. A gbaa nihi kulaa nɛ yeɔ e mlaa amɛ a nɔ, nɛ a sɔmɔɔ lɛ kɛ a tsui kulaa a. Ni nɛmɛ nɛ pee we yayami, se mohu a nyɛɛɔ ngɛ e blɔ ɔmɛ a nɔ ɔ. O fã kaa waa ye o mlaa amɛ a nɔ pɛpɛɛpɛ. Oo, i na nɛ o kudɔ mi nɛ i ye o mlaa amɛ a nɔ. Ye hɛ mi be si puee ke i ngɛ o mlaa amɛ kulaa a nɔ yee ɔ.
I ma je o yi kɛ tsui klɔuklɔu be nɛ i le o dami mlaa amɛ ɔ. I ma ye o mlaa amɛ a nɔ! Oo, mo ko ngmɛɛ ye he kɛ fɔ si kulaa.
Kɛ niheyo maa pee kɛ hi si pɛpɛɛpɛ kɛɛ? Ja e kaneɔ o Munyu ɔ, nɛ e yeɔ mlaa amɛ a nɔ. I hla o se blɔ kɛ ye tsui kulaa. Oo, mo ko ha nɛ ma tla kɛ je o mlaa amɛ a he. I ngɔ o Munyu ɔ kɛ to ngɛ ye tsui mi, bɔ nɛ pee nɛ ma ko pee yayami kɛ si mo.
I ngɛ o yi jee, oo Neneene Tsɛ; moo tsɔɔ mi o mlaa amɛ. I jaje mlaa amɛ nɛ je o nya a tsuo. O mlaa amɛ haa mi bua jɔmi kaa bɔ nɛ ni nami haa nɔmlɔ bua jɔmi ɔ. I ma susu o mlaa amɛ a he, nɛ ye hɛ maa hi o blɔ ɔmɛ a he. O mlaa amɛ ma ha mi bua jɔmi, nɛ ye hɛ be o Munyu ɔ nɔ jee.
Mo ha nɛ ye se nɛ kɛ ngɛ je mi, bɔ nɛ pee nɛ ma ye o Munyu ɔ nɔ. Mo bli ye hɛ ngmɛ nɛ ma na nyakpɛ níhi nɛ ngɛ o mlaa a mi. Nubwɔ ji mi ngɛ zugba a nɔ; mo ko wo o mlaa amɛ kɛ laa mi. Ye susuma hɛ jaa ngɛ o mlaa amɛ a he be fɛɛ be.
O kãa he nɔ woli kɛ musutsɛmɛ nɛ kua o mlaa amɛ a hɛ mi. Mo je ahlua bɔmi kɛ he guɛ gbemi kɛ je ye nɔ, ejakaa i yeɔ o mlaa amɛ a nɔ. Ke nɔ yeli kpe kutuu kɛ wo ye he po ɔ, i ma susu o mlaa amɛ a he. O mlaa amɛ ji ye bua jɔmi; a mi nɛ i naa ga womi ngɛ.
Ye he mi jɔ; moo wo mi he wami ngɛ o Munyu ɔ he je. I tsɔɔ mo ye blɔ nya tomi ɔmɛ, nɛ o ha mi heto; moo tsɔɔ mi o mlaa amɛ. Mo ha nɛ ma le nɔ nɛ o ngɛ hlae, nɛ i ma susu o nyakpɛ ni tsumi ɔmɛ a he.
Kɔmɔ yemi ha nɛ ye susuma hao, moo wo mi he wami ngɛ o Munyu ɔ nya. Mo je yayami peemi ngɛ ye blɔ mi; nɛ o tsɔɔ mi o mlaa amɛ ngɛ o dloomi ɔ he je. I ngɔ anɔkuale yemi blɔ ɔ; nɛ i ngɔ o mlaa amɛ kɛ fɔ ye hɛ mi. Oo Neneene Tsɛ, i pɛtɛ o mlaa amɛ a he, mo ko ha nɛ ye hɛ mi nɛ pue si. Ke o ma ha mi nɔ sisi numi ɔ, i ma ye o mlaa amɛ a nɔ.
Oo Tsaatsɛ Mawu, moo tsɔɔ mi o mlaa amɛ a sisi, nɛ i ma ye nɔ be fɛɛ be. Mo ha mi nɔ sisi numi bɔ nɛ pee nɛ ma ye o mlaa amɛ a nɔ kɛ ye tsui kulaa. Mo ha nɛ ma ye o mlaa amɛ a nɔ, ejakaa a mi nɛ i naa bua jɔmi ngɛ.
Mo ha nɛ ye tsui nɛ e gbo o mlaa amɛ mohu a nɔ pe ni nami. Mo je ye he kɛ je yakayaka níhi a he, nɛ o wo mi he wami ngɛ o blɔ ɔmɛ a nɔ. Mo ha mi nɔ mi mami ekohu kaa o si womi ɔmɛ ngɛ kɛ ha mi, ejakaa i ngɔ ye hɛ kɛ fɔ o nɔ, nɛ i buu mo.
Mo je hɛ mi si puemi nɛ i yee gbeye ɔ ngɛ ye nɔ, ejakaa o mlaa amɛ hi. I suɔ kaa ma ye o mlaa amɛ a nɔ, mo ha mi he wami he, ejakaa dalɔ ji mo. Oo Tsaatsɛ Mawu, moo na mi mɔbɔ, nɛ o he ye yi wami ngɛ o si womi ɔ nya. Bɔ nɛ pee nɛ ma nyɛ ma ha ni nɛmɛ nɛ ngɛ mi ahlua bɔe ɔ heto, ejakaa o Munyu ɔ nɔ nɛ i wo ye hɛ kɛ fɔ.
Mo ko ha nɛ ye hɛ nɛ je o anɔkuale munyu ɔmɛ a nɔ, ejakaa mɛ kɛkɛ a nɔ nɛ i ngɔ ye hɛ kɛ fɔ. I ma ye o mlaa amɛ a nɔ daa. Nɛ i ma nyɛɛ ngɛ he jɔmi mi, ejakaa i hlaa o mlaa amɛ a se blɔ. I ma ye o mlaa amɛ a he odase ngɛ matsɛmɛ a hɛ mi nɛ zo be mi pee.
I naa bua jɔmi ngɛ o mlaa amɛ a nɔ yemi mi, ejakaa i suɔ mlaa amɛ. I buu o mlaa amɛ nɛ i suɔ mɛ, nɛ i ma susu a he daa.
Mo kai si nɛ o wo mi o tsɔlɔ ɔ, ejakaa e nɔ nɛ i wo ye hɛ kɛ fɔ. Be mi nɛ i ngɛ nɔ nae tete ɔ, i na bua jɔmi, ejakaa o si womi ɔ wo mi he wami. He nɔ woli ɔmɛ yeɔ ye he fɛu be fɛɛ be, se i kpale we ngɛ o mlaa amɛ a se. Oo Tsaatsɛ Mawu, ke i kai o blema munyu ɔmɛ ɔ, a haa mi bua jɔmi.
Ye mi mi fuɔ ngɛ dikali nɛ bui o mlaa amɛ ɔ a he. Ye si himi ngɛ zugba nɛ ɔ nɔ ɔ, o mlaa amɛ kɛkɛ ji la nɛ i laa. Oo Neneene Tsɛ, i kaii mo ngɛ nyɔ be mi nɛ i susuu o mlaa amɛ a he. I naa bua jɔmi ngɛ o mlaa amɛ a nɔ yemi mi.
Oo Yehowa, mo ji nɔ nɛ he hia mi. I wo si kaa i ma ye o mlaa amɛ a nɔ. I ngɛ mo pɛɛ kpae kɛ ye tsui kulaa nɛ o na mi mɔbɔ kaa bɔ nɛ o wo si ɔ. I susu ye je mi bami he, nɛ i wo si kaa i ma ye o mlaa amɛ a nɔ. I kpɛ we se, se mohu i kpale ye se mla nɛ ma ye o mlaa amɛ a nɔ. Dikali bɔ mɔde nɛ a sa mi kɛ wo yayami mi, se i pɛtɛ o mlaa amɛ a he wawɛɛ.
I ma te si nyɔ mi kpɛti nɛ ma je o yi ngɛ o mlaa kpakpa amɛ a he. Ni nɛmɛ nɛ yeɔ mo gbeye nɛ a yeɔ o mlaa amɛ a nɔ ɔ ji ye huɛmɛ. Oo Neneene Tsɛ, zugba a nɔ hyi kɛ o mɔbɔ nami; moo tsɔɔ mi o mlaa amɛ.
Oo Tsaatsɛ Mawu, o jɔɔ mi o sɔmɔlɔ ɔ kaa bɔ nɛ o wo si ɔ. Mo ha mi nile, nɛ o tsɔɔ mi dami sane yemi, ejakaa i heɔ o mlaa amɛ a nɔ yeɔ. Loko ji o gbla ye tue ɔ, i tla kɛ je o blɔ ɔ nɔ, se jehanɛ ɔ lɛɛ i yeɔ o Munyu ɔ nɔ. O hi nɛ o peeɔ nɔ nɛ da, moo tsɔɔ mi o mlaa amɛ.
He nɔ woli ye ye he lakpa, se i ma ye o mlaa amɛ a nɔ kɛ ye tsui kulaa. A ji nihi nɛ nui nɔ sisi, se ami lɛɛ o mlaa a he nɛ ye bua jɔɔ.
Ye tue gblami ɔ hi ha mi, ejakaa e ha nɛ i kase o mlaa amɛ. O mlaa amɛ nɛ o wo ɔ hi ha mi hluu pe sika tsu kɛ sika hiɔ akpe abɔ.
O nine nɛ bɔ mi; mo ha mi nɔ sisi numi konɛ ma kase o mlaa amɛ. Ni nɛmɛ nɛ yee mo gbeye ɔ, a bua maa jɔ ke a na mi, ejakaa ami hu i he o Munyu ɔ ye.
Oo Neneene Tsɛ, i le kaa o kojomi ɔmɛ da, nɛ anɔkuale yemi mi nɛ o gbla ye tue ngɛ. Mo o je o suɔmi ɔ mi nɛ o ha mi bua jɔmi ngɛ si nɛ o wo mi ɔ nya. Moo na mi mɔbɔ, nɛ ye yi ma na wami, ejakaa o mlaa amɛ nɛ a haa mi bua jɔmi.
Mo ha nɛ he nɔ woli ɔmɛ a hɛ mi nɛ pue si, ngɛ ye he lakpa nɛ a ye ɔ he je. Se ami lɛɛ i ma susu o mlaa amɛ a he.
Mo ha nɛ nihi nɛ yee mo gbeye, kɛ nihi nɛ le o mlaa amɛ a ba ye ngɔ. Mo ha nɛ ma ye o mlaa amɛ a nɔ sisiisi nɛ piami ko nɛ ko hi ye he, bɔ nɛ pee nɛ ye hɛ mi nɛ ko pue si.
Ye yi wami hemi ɔ he kuma ye mi hluu, se loloolo ɔ, i ngɛ o yemi kɛ buami ɔ blɔ hyɛe kaa bɔ nɛ o wo mi si ɔ. I hyɛ o si womi ɔ blɔ hluu nɛ pɔ tɔ. I biɔ ke, “Mɛni be nɛ o maa jɔɔ ye bua lo?” Ejakaa i pee kaa da tɔ nɛ se nami ko be he, se kɛ hu ye hɛ ji o mlaa amɛ a nɔ. Mɛni be nɛ o tsɔlɔ ɔ maa mlɛ kɛ ya si? Mɛni be nɛ o maa gbla nihi nɛ ngɛ mi haoe ɔ a tue? He nɔ woli nɛ yi o mlaa amɛ a nɔ ɔ tsuaa muɔ ha mi ngɛ ye blɔ mi. O mlaa amɛ kulaa ji anɔkuale, nɛ ye haoli ɔmɛ ngɛ mi haoe yaka gu; moo ye kɛ bua mi. A kpata ye hɛ mi ta ngɛ zugba a nɔ, se i ngmɛɛ we o mlaa amɛ a he. Mo he ye yi wami ngɛ o suɔmi ɔ he je, konɛ ma ye o mlaa amɛ a nɔ.
Oo Neneene Tsɛ, o Munyu ɔ maa si ngɛ hiɔwe daa kɛ yaa nyagbe. O anɔkuale yemi ɔ ngɛ kɛ yaa yi nɔhi tsuo; mo nɛ o to je ɔ sisi nɛ e maa si. Ngɛ o demi nya a, a maa si kɛ ba si mwɔnɛ ɔ, ejakaa o sɔmɔli ji mɛ tsuo.
Ke pi o mlaa amɛ nɛ ha mi bua jɔmi jinɛ ye hɛ mi kpata ngɛ ye nɔ nami ɔ mi. Ye hɛ be o mlaa amɛ a nɔ jee ligbi ko, ejakaa a nɔ nɛ o gu nɛ o kɛ he ye yi wami. O nɔ ji mi, mo he ye yi wami! Ejakaa i bɔ mɔde nɛ ma ye O mlaa amɛ a nɔ. Dikali wo ka nɛ a ma kpata ye hɛ mi, se ye hɛ ji o mlaa amɛ a nɔ.
I le kaa nɔ́ ko be nɛ hi kɛ pi si, ja o mlaa amɛ pɛ. Oo, hyɛ bɔ nɛ i suɔ o mlaa amɛ ha! I susuu he mɔtu kɛ du bubui. O mlaa amɛ ha nɛ i le nɔ́ pe ye he nyɛli ɔmɛ, ejakaa a ngɛ mi kudɔe daa. I le ni pe ye tsɔɔli ɔmɛ tsuo, ejakaa i susuu o mlaa amɛ a he. I nuɔ nɔ sisi pe nimeli tete po; ejakaa i yeɔ o mlaa amɛ a nɔ.
I nyɛɛ we nɔ yayami se, ejakaa i suɔ nɛ ma ye o Munyu ɔ nɔ. I tlɛ kɛ ji o mlaa amɛ a he, ejakaa mo nitsɛ nɛ o tsɔɔ mi ni. Hyɛ bɔ nɛ o Munyu ɔmɛ ngɔɔ ha mi ha. A ngɔɔ pe hwo ngɛ ye nya mi. I na nile kɛ nɔ sisi numi kɛ gu o mlaa amɛ a nɔ; nɛ ja a he je ɔ, i hiɔ nɔ yayami.
O Munyu ɔ ji kane ha ye nane, kɛ la ngɛ ye blɔ nɔ. I ka kita kaa i ma ye o mlaa dadɛ ɔmɛ a nɔ.
Oo Tsaatsɛ Mawu, i na nɔ saminya, moo wo mi he wami kaa bɔ nɛ o wo si ɔ. Oo Tsaatsɛ Mawu, mo he ye sina sɔlemi ɔ, nɛ o tsɔɔ mi o mlaa amɛ. I ngɛ hɛ mi kpatami mi be fɛɛ be, se ye hɛ ji o mlaa amɛ a nɔ. Dikali ɔmɛ tsɔ mi klama se i tɔ we o mlaa amɛ a nɔ. O mlaa amɛ ji ye gbosi ni kɛ yaa neneene. Mɛ nɛ a haa mi bua jɔmi. Ye juɛ mi ji kaa ma ye o mlaa amɛ a nɔ kɛ ya si ye nyagbe ligbi.
I hiɔ nihi nɛ a juɛmi ngɛ enyɔɔnyɔ ngɛ o he, se ami lɛɛ i suɔ o mlaa amɛ. Mo ji ye wesa he kɛ ye he pulelɔ; i wo ye hɛ kɛ fɔ o si womi ɔ nɔ. Nyɛɛ je ye ngɔ kɛ ho se ya, nimli yayamihi, ejakaa ami lɛɛ i ma ye ye Mawu ɔ mlaa amɛ a nɔ. Moo pɛtɛ ye he ngɛ o si womi ɔ nya, bɔ nɛ pee nɛ ye yi nɛ na wami; nɛ mo ko ha nɛ zo nɛ gbe mi ngɛ ye hɛ nɛ i kɛ fɔ o nɔ ɔ he. Moo pɛtɛ ye he nɛ ye yi nɛ na wami, nɛ i ma ye o mlaa amɛ a nɔ be tsuaa be.
O kua nihi kulaa nɛ bui o mlaa amɛ ɔ. Se nami be a gɔdɔgɔdɔ ni tsumi ɔmɛ a he. Dikali ɔmɛ tsuo ngɛ kaa dwɔmi nɛ o bɛɛ kɛ pueɔ he. Lɔ ɔ he je ɔ, i suɔ o mlaa amɛ. O he gbeye ha nɛ bibi gbee mi, nɛ i yeɔ o kojomi gbeye.
I pee nɔ nɛ hi kɛ nɔ nɛ da blɔ, mo ko ngmɛɛ ye he kɛ ha ye he nyɛli ɔmɛ. Moo wo mi si kaa o maa ye kɛ bua o sɔmɔlɔ ɔ; mo ko ha nɛ he nɔ woli nɛ a hao mi. I hyɛ ye yi wami hemi ɔ nɛ o wo mi si ngɛ he ɔ blɔ hluu nɛ ye hɛ ngmɛ bɔni yumi. O kɛ mi o sɔmɔlɔ ɔ nɛ ye ngɛ o suɔmi nɛ tsakee we ɔ nya, nɛ o tsɔɔ mi o mlaa amɛ. O sɔmɔlɔ ji mi; mo ha mi nɔ sisi numi bɔ nɛ pee nɛ ma le o mlaa amɛ.
Tsaatsɛ Mawu, e su be nɛ e sa kaa o pee nɔ́ ko, ejakaa a tɔ o mlaa amɛ a nɔ. Se ami lɛɛ i suɔ o mlaa amɛ pe sika tsu. Nɛ enɛ ɔ he je ɔ, i buu o mlaa amɛ kulaa kaa a da ngɛ nɔ́ fɛɛ nɔ blɔ fa mi, nɛ i hiɔ lakpa ni peemi ɔmɛ.
O mlaa amɛ a he ngɛ nyakpɛ, nɛ lɔ ɔ he je nɛ i yeɔ a nɔ ngɛ. O munyu ɔmɛ haa nɔ nuɔ nɔ sisi, nɛ a haa nɔ nɛ li nɔ́ ko ɔ plɛɔ ni lelɔ. Ngɛ o mlaa amɛ a se dimi mi ɔ, ye mumi nya ta.
Mo plɛ nɛ o hyɛ mi nɛ o na mi mɔbɔ kaa bɔ nɛ o peeɔ kɛ haa nihi kulaa nɛ suɔ mo ɔ. Mo kudɔ mi kɛ o mlaa amɛ bɔ nɛ pee nɛ yayami nɛ ko ye ye nɔ. Mo kpɔ mi kɛ je yi mi wali ɔmɛ a dɛ mi, bɔ nɛ pee nɛ ma ye o mlaa amɛ a nɔ. Moo hɛɛ mi kɛ o suɔmi ɔ, nɛ o tsɔɔ mi o mlaa amɛ. I foɔ ya wawɛɛ, ejakaa a yi o mlaa amɛ a nɔ.
Oo Neneene Tsɛ, dalɔ ji mo, nɛ o kojomi ɔmɛ hu da. O mlaa amɛ nɛ o wo ɔ hi nɛ a da. O mlaa amɛ a he hɛ dɔ nya ha ye mi mi fuɔ, ejakaa ye he nyɛli ɔmɛ bui o mlaa amɛ. I na kaa o si womi ɔmɛ baa mi, lɔ ɔ he je ɔ, i suɔ mɛ. I pi nɔ ko, nɛ a bui mi, se ye hɛ ji o mlaa amɛ a nɔ.
O dami ɔ ngɛ kɛ yaa neneene; nɛ o mlaa amɛ hine anɔkuale. Ngɛ ye nɔ nami kɛ haomi mi ɔ, o mlaa amɛ wo mi bua. O mlaa amɛ da be fɛɛ be; moo ye kɛ bua mi nɛ ma nu a sisi, nɛ ye yi nɛ na wami.
I je ye tsui mi kɛ tsɛ mo; moo bu mi tue, Tsaatsɛ Mawu, nɛ i ma ye o mlaa amɛ a nɔ. I tsɛ mo; mo he ye yi wami, nɛ i ma ye o mlaa amɛ a nɔ. I te si makɛ nɛ i tsɛ mo ke o ye kɛ bua mi; o munyu ɔmɛ a nɔ nɛ i wo ye hɛ kɛ fɔ. Nyɔnyɔɔnyɔ tsuo i hwɔɛ mahe, nɛ i ngɛ o si womi ɔmɛ a he susue. Moo bu mi tue ngɛ o suɔmi nɛ tsakee we ɔ he. Oo Neneene Tsɛ, moo na mi mɔbɔ nɛ o he ye yi wami.
Dikali ɔmɛ nɛ ngɛ ye se nyɛɛe ɔ na mi ta; a ji nihi nɛ bui o mlaa amɛ. Se Tsaatsɛ Mawu, o ngɛ ye kasa nya haa; nɛ o mlaa amɛ kulaa hine anɔkuale. I na le kɛ je blema lokoo kaa o mlaa amɛ be tsakemi ko nɛ a ma tsake. Moo hyɛ ye nɔ nami ɔ nɛ o kpɔ mi, ejakaa ye hɛ ji o mlaa amɛ a nɔ. Moo ye ye sane ɔ ha mi nɛ o kpɔ mi; mo he ye yi wami ngɛ o si womi ɔ nya. A be dikali ɔmɛ a yi wami hee, ejakaa a bui o mlaa amɛ. Neneene Tsɛ, o mɔbɔ nami kle, moo na mi mɔbɔ nɛ o he ye yi wami ngɛ o mlaa amɛ a nya.
Ye he nyɛli kɛ yi mi wali ɔmɛ hiɛ; se i kua we o mlaa amɛ a nɔ yemi. Ke i na níhi nɛ be hemi kɛ yemi nɛ ɔmɛ ɔ, a he peeɔ mi tai, ejakaa a yi o mlaa amɛ a nɔ. Moo hyɛ bɔ nɛ i suɔ o mlaa amɛ ha, Tsaatsɛ Mawu! Mo he ye yi wami ngɛ o suɔmi nɛ tsakee we ɔ he. O munyu ɔmɛ tsuo hine anɔkuale, nɛ o mlaa amɛ ngɛ kɛ yaa neneene.
Nɔ yeli ngɛ mi haoe be mi nɛ i pee we nɔ ko, se i yeɔ o munyu ɔmɛ gbeye. O munyu ɔ ha nɛ ye bua jɔɔ ye he kaa nɔ ko nɛ hiɛ june agbo ko. I sume lakpa, se i suɔ o mlaa amɛ. I jeɔ o yi si kpaago daa ligbi ngɛ o dami mlaa amɛ a he.
Nihi nɛ suɔ o mlaa amɛ ɔ, a ngɛ tue mi jɔmi saminya, nɛ nɔ́ ko be a nane tɔtɔe. Neneene Tsɛ, i ngɛ o yi wami hemi ɔ blɔ hyɛe; nɛ i yeɔ o mlaa amɛ a nɔ. Ye mumi he o mlaa amɛ saminya, nɛ i yeɔ a nɔ. I yeɔ o mlaa amɛ a nɔ; nɛ o naa ye nɔ fɛɛ nɔ nɛ i peeɔ ɔ.
Oo Neneene Tsɛ, moo bu ye kue fami ɔ tue; mo ha mi nɔ sisi numi kaa bɔ nɛ o wo mi si ɔ. Mo ha nɛ ye kue fami ɔ nɛ su o ngɔ. Mo kpɔ mi ngɛ o munyu ɔ nya. I ma je o yi be fɛɛ be, ejakaa o tsɔɔ mi o mlaa amɛ. O munyu ɔ maa pee ye nya la, ejakaa o mlaa amɛ kulaa da. Moo pee klaalo nɛ o ye kɛ bua mi, ejakaa i ngɛ o mlaa amɛ a nɔ yee. Oo Neneene Tsɛ, o yi wami hemi ɔ he kuma yee mi, ejakaa o mlaa amɛ haa ye bua jɔɔ. Mo ha nɛ o mlaa amɛ nɛ a kudɔ mi, nɛ ye yi nɛ na wami, bɔ nɛ pee nɛ ma je o yi.
I tla nɛ i ngɛ si kpae kaa to nɛ laa. Moo ba nɛ o ba hla mi, ejakaa i ngmɛɛ we o mlaa amɛ a he.
Biblica® Open Dangme Living New Testament & Psalms 1997. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.