La Amɛ 109

He nyɛli a yayami nane mi tomi

1Moo bu mi tue, Tsaatsɛ Mawu, ejakaa o yi nɛ i jeɔ. 2Dikali kɛ nɔ sisili ngɛ lakpa munyuhi tue ngɛ ye he. 3A ngɛ mi nyɛe nɛ a kɛ mi ngɛ hwue nɛ sisi numi be he. 4I suɔ mɛ, se be mi nɛ i ngɛ sɔlee kɛ ha mɛ ɔ, mɛɛ lɛɛ a ngɛ ye hɛ mi kpatami he mɔde bɔe. 5A woɔ yayami kɛ toɔ ye kpakpa nɛ i peeɔ mɛ ɔ nane mi, i suɔ mɛ se mɛɛ lɛɛ a nyɛɛ mi.

6Mo je dikalɔ ko kɛ wo ye he nyɛlɔ ɔ he, nɛ o ha nɛ a ye e he lakpa, nɛ o ngɔ lɛ kɛ ha kojolɔ nɛ maa bu lɛ fɔ. 7Ke a kojo lɛ ɔ, e ye fɔ, nɛ e kue fami nɛ e hine tɔmi! 8E je mi si himi se nɛ kó kɛ, nɛ nɔ kpa nɛ ye e nane mi. 9E bimɛ a pee awusahi, nɛ e yo nɛ pee yalɔyo. 10E bimɛ a nyɛɛ nɛ a ba ni, nɛ a fie mɛ kɛ je a we doku ɔ mi. 11E hiɔtsɛmɛ nɛ a muɔ e nɔ́ tsuaa nɔ, nɛ nibwɔhi a ha e dengme ni tsumi ɔ mi nɔ́ fɛɛ nɔ. 12Nɔ ko nɛ ko na lɛ mɔbɔ; nɛ e awusa bi ɔmɛ hu a ko ye kɛ bua mɛ. 13E bimɛ nɛ a gu, nɛ a biɛ nɛ laa ngɛ yi nɔhi nɛ maa ba amɛ a mi. 14Moo gbla e tsɛ kɛ e nyɛ a tɔmi ɔmɛ a he tue; nɛ o hɛ nɛ ko je a nɔ! 15Mo kai e yayami ɔmɛ daa, nɛ o gbe e biɛ, nɛ nɔ ko nɛ kó kai lɛ ngɛ zugba a nɔ ligbi ko!

16Ejakaa e pee we nɔ ko kpakpa; se mohu e wa ohiafohi kɛ nihi nɛ e fí mɛ ɔ yi mi, nɛ e hao aywilɛho yeli kɛ ya si gbenɔ mi tete. 17Akɛnɛ, e suɔ nɔ gbiɛmi he je ɔ, moo gbiɛ lɛ. Nɛ akɛnɛ e jɔɔ we nɔ he je ɔ, mo ko jɔɔ lɛ. 18Gbiɛmi ji e je mi bami, e ngɛ kaa bo nɛ e haa, lɔ ɔ he je ɔ, mo ha nɛ e be ngɛ e mi kaa nyu, nɛ e sɛ e wuhi a mi kaa nu.

19Mo ha nɛ e gbiɛmi ɔmɛ nɛ a kpale kɛ ba na lɛ, nɛ a mata e he kaa e bo nɛ e ha a, nɛ a pee kaa e mlɛ mi bɔjuɛ nɛ e maa tsiɛ daa. 20Enɛ ɔ nɛ pee hiɔ nɛ Tsaatsɛ Mawu maa wo ye he nyɛli ɔmɛ kɛ nihi nɛ tuɔ ye he munyu yaya a.

21Se ami lɛɛ Tsaatsɛ Mawu, o kɛ mi nɛ ye kaa o bi, kaa nɔ nɛ a kɛ o biɛ wo lɛ! Ejakaa o mi jɔ, oo Neneene Tsɛ; mo kpɔ mi.

22Ejakaa ohiafo nɛ ni ngɛ mɔbɔ ji mi, nɛ ye tsui ngɛ mi yee. 23I pee kaa nini nɛ ngɛ laae. A ngɛ mi fie kɛ yaa gbenɔ mi kaa a fieɔ baalɛhi. 24I hiɔ̃ ngma hluu nɛ ye nakutsohi a mi jɔ ngɛ ye sisi; nɛ ye nɔmlɔ tso je wu. 25I plɛ ahlua bɔmi nɔ́ kɛ ha mɛ, nɛ ke a na mi pɛ a huanya yi.

26Oo Neneene Tsɛ, ye Mawu, moo ye kɛ bua mi; mo he ye yi wami ngɛ o suɔmi kɛ o mɔbɔ nami ɔ nya. 27Moo pee nɛ a na kaa mo nɛ o tsu kikɛmɛ a ni nɛ ɔ. 28Mo ha nɛ a gbiɛ mi, ke moo lɛɛ o ngɛ mi jɔɔe kɛkɛ! Nɛ a mɔde bɔmi nɛ a ma kɛ kpata ye hɛ mi ɔ maa pee yaka, nɛ ami o sɔmɔlɔ ɔ ma nya.

29Mo ha nɛ a nɔ́ fɛɛ nɔ nɛ pee yaka, nɛ zo nɛ gbe mɛ. 30I ma je Tsaatsɛ Mawu yi babauu; i ma je e yi ngɛ nihi fuu a kpɛti. 31Ejakaa e daa si ngɛ ohiafo hiɔ nɔ, konɛ e je lɛ kɛ je e he nyɛli a dɛ mi.