La Amɛ 107

Mi Gbami 5

La 107:1—150:6

Mawu Kpɔ́lɔ ɔ yi jemi la

1Oo, nyɛɛ na Tsaatsɛ Mawu si, ejakaa e hi, nɛ e mɔbɔ nami ngɛ daa. 2Nyɛ nihi nɛ Neneene Tsɛ ɔ kpɔ nyɛ kɛ je he nyɛli a dɛ mi ɔ, nyɛ de ja.

3Nyɛ nihi nɛ e bua nyɛ nya kɛ je zugba amɛ a nɔ, kɛ je pu site he kɛ pu sinɔ he, kɛ je Jɔ mi blɔ kɛ Wo mi blɔ ɔ. 4A ngɛ si lilaae ngɛ nga a nɔ, nɛ a nɛ he nɛ a maa hi. 5Hwɔ kɛ kuma ye mɛ nɛ a hɛ mi yu mɛ. 6A kpa ngmlaa nɛ a de ke; “Tsaatsɛ Mawu, moo ye kɛ bua wɔ!” Nɛ e bu mɛ tue. 7E kpaka mɛ tɛɛ kɛ ya su he nɛ a maa hi nɛ a yi ma na wami ngɛ. 8Oo, e sa kaa kikɛmɛ a nimli nɛ ɔmɛ a je Tsaatsɛ Mawu yi ngɛ e suɔmi kɛ mi mi jɔmi kɛ e nyakpɛ ni tsumi ɔmɛ a he. 9Ejakaa e haa susuma nɛ kuma ngɛ lɛ yee ɔ nyu, kɛ susuma nɛ hwɔ ngɛ lɛ yee ɔ hu ni kpakpahi.

10Mɛnɔmɛ ji enɛ ɔmɛ nɛ hii si ngɛ diblii mi, ngɛ gbenɔ hɔ mi nɛ aywilɛho kɛ nyɔguɛ yemi kpata a hɛ mi? 11A tsɔ Tsaatsɛ Mawu hɛ mi atuã, nɛ a ye Mawu Ope ɔ he fɛu. 12Lɔ ɔ he je nɛ e ha nɛ a tsu ni nɛ he wa nɛ a hao; a nɔ si nɛ nɔ ko be a nɔ nyɛe ma wo nɛ a maa te si. 13Kɛkɛ nɛ a kpa ngmlaa kɛ tsɛ Tsaatsɛ Mawu ngɛ a haomi ɔmɛ a mi nɛ e kpɔ mɛ. 14E je mɛ kɛ je diblii kɛ gbenɔ hɔ ɔ mi, nɛ e kplɔ a kɔsɔkɔsɔ ɔmɛ pue si. 15Oo, e sa kaa kikɛmɛ a nimli nɛ ɔmɛ a je Tsaatsɛ Mawu yi ngɛ e suɔmi kɛ mi mi jɔmi kɛ e nyakpɛ ni tsumi ɔmɛ a he. 16Ejakaa e ku a tsu womi he ɔ akɔblee sinya amɛ nɛ e poo blɔ tsimi dade ɔmɛ a mi.

17Nihi nɛ be juɛmi ɔ hu nu hiɔ ngɛ a ni yayami peemi he je. 18A nyɛ we ngma nɛ a ye, a su gbenɔ muɔ nya haa. 19Kɛkɛ nɛ a kpa ngmlaa kɛ tsɛ Tsaatsɛ Mawu ngɛ a haomi ɔ mi, nɛ e ye kɛ bua mɛ nɛ e kpɔ mɛ. 20E tu munyu nɛ a na he wami; nɛ e je mɛ kɛ je a hɛ mi kpatami ɔ mi. 21Oo, e sa kaa kikɛmɛ a nimli nɛ ɔmɛ a je Tsaatsɛ Mawu yi ngɛ e suɔmi kɛ mi mi jɔmi kɛ nyakpɛ ni tsumi ɔmɛ a he! 22E sa nɛ a sã sina afɔle nɛ a ngɔ bua jɔmi kɛ jaje e ni tsumi ɔmɛ kɛ tsɔɔ.

23Nɛ jehanɛ ɔ hu, nihi nɛ hii lɛ mi kɛ nyɛɛ wo hɛ mi ngɛ jua yemi nɔ ɔ, 24mɛ hu a naa Tsaatsɛ Mawu ni tsumi ɔmɛ kɛ e nyakpɛ ni ɔmɛ ngɛ wo ɔ mi. 25E haa kɔɔhiɔ nɛ nya wa tee, nɛ oslɔke ɔmɛ woɔ a he nɔ. 26A lɛ ɔmɛ yaa hiɔwe nɛ a ba nɔɔ si, nɛ lɛ hluili ɔmɛ yee gbeye. 27A dedeɔ kaa nihi nɛ de da, nɛ a li bɔ nɛ a maa pee. 28Kɛkɛ ɔ, a kpaa ngmlaa kɛ tsɛɔ Tsaatsɛ Mawu ngɛ a haomi ɔ mi nɛ e jeɔ mɛ. 29E jɔɔ kɔɔhiɔ ɔ he, nɛ oslɔke ɔmɛ peeɔ dii. 30A bua jɔɔ, ejakaa wo ɔ he jɔ; nɛ e kɛ mɛ ba suu kpo kɛ manye. 31Oo, e sa kaa kikɛmɛ a nimli nɛ ɔmɛ a je Tsaatsɛ Mawu yi ngɛ e suɔmi kɛ mi mi jɔmi kɛ e nyakpɛ ni tsumi ɔmɛ a he! 32Nyɛ ha nɛ a je e yi ngɛ asafo ɔ hɛ mi, nɛ a je e yi ngɛ matsɛmɛ a hɛ mi.

33E haa nɛ pahi miiɔ, nɛ lejɛ ɔmɛ peeɔ nga nɔ; nɛ nyu jimi hehi peeɔ zugba gbigbli nɔ. 34E haa nɛ dikali a zugba kpakpa plɛɔ ngo zugba kplanaa. 35Nɛ ja a nɔuu e haa nɛ zia zugba plɛɔ zugba kpakpa kɛ e mi nyu dɔhi. 36Nɛ e kpakaa nihi nɛ hwɔ ngɛ mɛ yee ɔ kɛ ba hii lejɛ ɔ nɛ a bɔɔ ma. 37A duɔ ni nɛ a peeɔ wai abɔɔ, nɛ a kpaa ni fuu. 38E jɔɔ mɛ nɛ a fɔɔ babauu, nɛ a nahi a he hiɛɛ fuu.

39Se ni kpahi lɛɛ a yeɔ ohia kɛ guu yi mi wami kɛ haomi kɛ aywilɛho mi. 40Ejakaa Tsaatsɛ Mawu haa he nɔ woli a he guɛ gboɔ, nɛ e haa matsɛmɛ a bimɛ kpaa nga yi. 41Se e woɔ ohiafohi nɛ yeɔ lɛ gbeye ɔ a nɔ, nɛ e haa mɛ bimɛ babauu kɛ nɔ yami. 42Dali ngɛ he fɛɛ he maa na nɛ a bua maa jɔ a he, se dikali ɔmɛ maa pee dii.

43Nɔ nɛ hine ni lelɔ nɛ e maa to ni nɛ ɔmɛ a he hɛ ɔ, e maa na Tsaatsɛ Mawu suɔmi kɛ mɔbɔ nami ɔ.