La Amɛ 105

Mawu hɛ ji e si womi ɔmɛ a nɔ

1Nyɛɛ na Yehowa si; nyɛ tsɛ e biɛ nɛ nyɛ ha nimli ɔmɛ a le e ni tsumi ɔmɛ. 2Nyɛ la kɛ je e yi, nɛ nyɛɛ fiɛ e nyakpɛ ni tsumi ɔmɛ kɛ nɔ́ fɛɛ nɔ. 3Nyɛ nya ngɛ Neneene Tsɛ ɔ mi; nɛ ni nɛmɛ nɛ ngɛ Yehowa se blɔ hlae ɔ a bua nɛ jɔ.

4Nyɛ hla Yehowa kɛ e he wami ɔ se blɔ, nɛ nyɛɛ ya nɔ nɛ nyɛɛ kɛ lɛ nɛ hi si.

5Nyɛ kai nyakpɛ ni tsumihi nɛ e tsu ɔ, kɛ e kojomi ɔmɛ, 6nyɛ Abraham, Mawu sɔmɔlɔ ɔ bimɛ, kɛ Yakob nɔ nɛ e hla a bimɛ. 7Lɛ ji Yehowa, wa Neneene Tsɛ, e kojomi kpe zugba nɔ tsuo. 8E kai e somi ɔ, nɛ ji si nɛ e wo yi nɔhi akpe abɔ ɔmɛ. 9Somi nɛ e kɛ Abraham so, kɛ kita nɛ e ka Isak ɔ; 10nɛ e ma nɔ mi kaa mlaa kɛ ha Yakob, kɛ Israel hu kaa neneene somi. 11Nɛ e de ke, “I ma wo Kana zugba a kɛ ha mo kaa o gbosi ni.” 12Be mi nɛ a he pi, nɛ a ji nibwɔhi ngɛ zugba a mi ɔ. 13Be mi nɛ a gbɛ fia nɛ a ngɛ mɛ fiee kɛ ngɛ ma amɛ a nɔ kpae ɔ. 14E ha we he blɔ nɛ nɔ ko nɛ pee mɛ yayami. Nɛ e kpata matsɛmɛ a hɛ mi ngɛ a he. 15E de ke, “Nyɛ ko ta ye nihi nɛ i pɔ mɛ nu ɔ a he, nɛ nyɛ ko pee ye gbali ɔmɛ nɔ́ yayami ko.”

16E ha nɛ hwɔ ba zugba nɔ, nɛ a na we niye ni. 17Kɛkɛ nɛ e tsɔ Yosef kaa nyɔguɛ kɛ ho Mizraim ya nɛ e ya he e nimli ɔmɛ a yi wami kɛ je hwɔ ɔ mi. 18A wo e nane kɔsɔkɔsɔ kɛ e kuɛ ga ngɛ tsu ɔ mi, 19kɛ ya si Tsaatsɛ Mawu be nɛ e to ɔ su, nɛ Neneene Tsɛ ɔ ka lɛ hyɛ. 20Kɛkɛ nɛ matsɛ ɔ tsɔ nɛ a ya pine lɛ nɛ e ngmɛɛ e he. 21E to lɛ e we ɔ nyatsɛ kɛ e nihi a nɔ hyɛlɔ. 22E ma nyɛ wo matsɛ ɔ sɔmɔli tsu mi ke e suɔ, nɛ e ni tsumi hu ji kaa e tsɔɔ matsɛ ɔ ga woli ɔmɛ ni.

23Yakob hu ba je Mizraim nɛ e ba hi Ham zugba a nɔ kɛ e bi ɔmɛ. 24Nɛ e ha e nimli ɔmɛ a he ba hiɛ saminya, nɛ e ha a he wa pe a he nyɛli ɔmɛ. 25Tsaatsɛ Mawu ha Mizraim bi ɔmɛ te si kɛ wo e nimli ɔmɛ; a nyɛ e tsɔli ɔmɛ, nɛ a ye mɛ nyɔguɛ.

26E tsɔ e tsɔlɔ Mose, nɛ e ngɔ Aaron kɛ piɛ e he. 27Nɛ a tsu nyakpɛ níhi nɛ ngɛ gbeye ngɛ Mizraim zugba a nɔ. 28E ha nɛ diblii wo ngɛ zugba a tsuo nɔ se Mizraim bi ɔmɛ bui. 29E ha nɛ a nyu ɔmɛ plɛ muɔ, nɛ a pa amɛ a mi lohi kulaa gbo, 30Zugba a wo ovɔnɔhi babauu, nɛ a sɛ a matsɛ ɔmɛ a se tsuhi a mi fuu. 31E fa nɛ zugba a wo anunu slɔɔtohi kɛ lohwe tsɔwi babauu ngɛ he fɛɛ he. 32E ha nɛ gbiɛ ngo ngu nɛ pue si kaa hiɔmi, nɛ je ɔ mi pa la ngɛ zugba a mi tsuo. 33E gbe a wai tso ɔmɛ kɛ kɔɔle tso ɔmɛ kɛ tso kpahi kulaa ngɛ zugba a nɔ. 34E fa nɛ baalɛhi kɛ gɔgɔhi ba, bɔ nɛ a be nane mami he nae. 35Nɛ a ye zugba a nɔ bahi kɛ ngahi kɛ tso wowoehi kulaa. 36E gbe a bi tɛtehi kɛ bi dede ɔmɛ tsuo, nɛ ji a fiami kɛ a bua jɔmi ɔ. 37Nɛ e kpaka Israel bi ɔmɛ kɛ je kɛ a dɛ mi sika tsu kɛ sika hiɔ, nɛ hiɔtsɛ ko be a kpɛti. 38Mizraim bi ɔmɛ na bua jɔmi kaa Israel bi ɔmɛ je, ejakaa a ngɛ mɛ gbeye yee.

39E ha nɛ bɔ kuu ha a nɔ konɛ pu nɛ ko saa mɛ, nɛ la hu nyɛɛ a hɛ mi gbɔkuɛ. 40A bi lɛ nɛ e ha mɛ de lo nɛ a ye, nɛ e ha nɛ hɔnehi ba fuu ha mɛ, nɛ e ha mɛ abolo hu kɛ je hiɔwe. 41E ha nɛ tɛ sa gba nɛ nyu je mi, nɛ e fo dɔ kaa pa. 42Ejakaa e hɛ ji e tsɔlɔ Abraham kɛ si nɛ e wo ɔ nɔ. 43Nɛ e kpaka e nimli ɔmɛ kɛ a nya la kɛ bua jɔmi. 44Nɛ e ngɔ ma je li ɔmɛ a zugba a kɛ ha mɛ kɛ e mi níhi nɛ a du ɔ tsuo. Nɛ níhi nɛ ni kpahi gbo he dengme ɔ ba plɛ a gbosi ni. 45E pee enɛ ɔ bɔ nɛ pee nɛ a ye e mlaa amɛ a nɔ. Nyɛ je Neneene Tsɛ ɔ yi.