Luka 1:37

1Ye huɛ kpakpa Tiofilo, i le kaa nihi fuu ngma Kristo wami he sane ɔ momo. 2Nɛ ngmali nɛ ɔmɛ da nihi nɛ ya nɔ nɛ nihi na kɛ a hɛ ngmɛ, kɛ níhi nɛ kekle kaseli ɔmɛ de ngɛ e he ɔmɛ a nɔ kɛ ngma e wami he sane slɔɔto ɔmɛ. 3Se e pee mi kaa e maa hi ke i hyɛ sanehi nɛ a ngma amɛ a mi ekohu kɛ je sisije kɛ ya si nyagbe, nɛ i bi nihi a mi fitsofitso bɔ nɛ pee nɛ ma dla kulaa ma ngma kɛ mane mo, 4konɛ o na anɔkuale ɔ nɔ mi mami nɛ o yi mi nɛ e tɛ mo ngɛ níhi nɛ a tsɔɔ mo ɔmɛ a he.

Bɔfo je e he si tsɔɔ Zakaria

5Sane ɔ je sisi ngɛ Yudea Matsɛ Herode yi nɔ. Jamɛ a be ɔ mi ɔ, Yuda no osɔfo ko hi si nɛ a tsɛɛ lɛ ke Zakaria, nɛ e je Abija osɔfohi a weku ɔ mi. E yo ji Elizabet, nɛ lɛ hu Yuda bi ɔmɛ a osɔfohi a wɛtso mi no ji lɛ, nɛ e ji Aaron bibimibi kaa e huno ɔ kɛ. 6Zakaria ke Elizabet kulaa ji Mawu gbeye yeli nɛ a yeɔ e mlaa amɛ a nɔ pɛpɛɛpɛ. 7Se Elizabet ya pee yosa, nɛ lɔ ɔ he je ɔ a be bi, nɛ mɛ ni enyɔ ɔmɛ tsuo a bwɔ.

8E ba mi kaa benɛ e su e asafo ɔ nɔ nɛ a ma sɔmɔ ɔ, e ya ngɛ e ni tsue kaa osɔfo ngɛ Mawu hɛ mi. 9Ngɛ osɔfo ɔmɛ a blɔ nya tomi nya a, Zakaria tutuutu nɔ nɛ sɔ ɔ nɔ, kaa e ya Sɔlemi We ɔ he nɛ ngɛ klɔuklɔu ɔ nɛ e ya sa la su ku womi tsopa kɛ via a ngɛ Mawu hɛ mi. 10Nɛ nimli babauu nɛ ba jami ɔ tsuo ngɛ sɔlee ngɛ Sɔlemi We ɔ agbo ɔ nya kaa bɔ nɛ a pɔɔ peemi ngɛ tsopa kɛ via sami be ɔ.

11Zakaria ngɛ ni nɛ ɔ tsue ngɛ Sɔlemi We ɔ he klɔuklɔu ɔ, nɛ tlukaa nɛ e maa hyɛ ɔ, o nɛ bɔfo ko nɛ daa si ngɛ bo sami la tɛ ɔ hiɔ nɔ ma je. 12Nɛ Zakaria na lɛ ɔ, e hɛli si nɛ e tsui po.

13Se bɔfo ɔ de lɛ ke, “Koo ye gbeye, Zakaria, ejakaa i ba nɛ ma ba de mo ke Mawu nu o kue fami ɔ, nɛ o yo Elizabet ma fɔ binyumu ha mo; nɛ biɛ nɛ o maa wo lɛ ji Yohane. 14Bi nɛ ɔ fɔmi ma ha nyɛ ni enyɔ ɔmɛ tsuo bua jɔmi, nɛ nihi fuu kɛ nyɛ ma nya. 15Ejakaa e maa pee Mawu nimli ngua amɛ a ti nɔ kake. Bi nɛ ɔ e kɔ ji kaa e be wai loo da nɛ nya wa ko nue. Nɛ Mumi Klɔuklɔu ɔ ma hyi lɛ kɛ je e nyɛ muklii mi tɔɔ. 16Nɛ lɛ e ma kudɔ Yuda bi ɔmɛ fuu a yi kɛ ba a tsɛ Mawu he. 17Anɔkuale ji kaa e mumi he maa wa nɛ e he wami maa hi kaa blema Gbalɔ Elia nɔ, nɛ lɛ nɛ e maa sɛ Mesia a hlami nɛ e ma dla nimli ɔmɛ a juɛmi kɛ ha e bami ɔ. E maa dɔ tsɛmɛ a tsui kɛ ba bimɛ a he, nɛ e ma tsake tue gboli a juɛmi kɛ ba dali a ni lemi mi.”

18Se Zakaria de bɔfo ɔ ke, “Kɛ enɛ ɔ maa pee kɛ ba mi kɛɛ? Piɔ nɛ ɔ i wa; nɛ ye yo ɔ hu pee yomoyo.”

19Kɛkɛ nɛ bɔfo ɔ de Zakaria ke, “Ami ji Gabriel ɔ nɛ. Mawu hɛ mi nɛ i daa. Nɛ lɛ nɛ e tsɔ mi ke ma ba tu mo manye munyu nɛ ɔ nɛ. 20Se akɛnɛ o he we yi he je ɔ, o maa tɔ mu, o be munyu nyɛe maa tu kɛ ya si be nɛ a ma fɔ bi ɔ. Ejakaa ye munyu ɔ maa ba mi ngɛ be nɛ sa mi.”

21Jamɛ a be ɔ mi ɔ, asafo ɔ kulaa ngɛ Zakaria mlɛe, nɛ a nɛ nɔ́ nɛ he je nɛ e tlɔ si ja a ngɛ. 22Benɛ e ba je kpo ɔ, e nyɛ we munyu nɛ e tu. E nine kɛkɛ nɛ e kɛ ngɛ okadi pee ha mɛ, nɛ a na kɛ je okadi ɔ mi kaa e na nina ko ngɛ Sɔlemi We ɔ. 23Zakaria hi Sɔlemi We ɔ kɛ ya si e sɔmɔmi be ɔ nya ta loko ji e kpale kɛ ho we mi ya. 24Ngɛ enɛ ɔ se ɔ, e kɛ we nɛ Elizabet da si; nɛ e laa e he hlami enuɔ.

25Nɛ nɔ́ nɛ e de ji, “Mawu mɔbɔ nami kle kaa e je ye bi nɛ i fɔ we ɔ he zo kɛ ahlua a ngɛ ye nɔ!”

A wo Yesu fɔmi he si

26Elizabet si dami ɔ hlami ekpa mi pɛpɛɛpɛ ɔ, Mawu tsɔ bɔfo Gabriel nɛ ɔ nɔuu kɛ ho Galilea kɔpe ko nɛ a tsɛɛ ke Nazaret ɔ ya. 27A tsɔ lɛ zangmayo ko nɛ li nyumu nɛ a tsɛɛ lɛ ke Maria a ngɔ. Maria nɛ ɔ, a bi e si ha Matsɛ David bibimibi ko nɛ a tsɛɛ lɛ ke Yosef ɔ.

28Gabriel ya je e he kpo ngɔ tsɔɔ Maria nɛ e de lɛ ke, “Mo he manye, mo nɔ nɛ a dloo mo; Nutsɔ ɔ kɛ mo ngɛ.”

29Ngami nɛ ɔ pee Maria he mi yaa nɛ e hao. Kɛkɛ nɛ e bɔni ngami ɔ he susumi.

30Se bɔfo ɔ de lɛ ke, “Maria, o tsui nɛ ko po, Mawu to e yi mi kaa e maa jɔɔ mo ngɛ nyakpɛ blɔ pɔtɛɛ ko nɔ. 31E be kɛe kulaa nɛ o maa da si, nɛ o ma fɔ binyumu. Biɛ nɛ o maa wo lɛ ji ‘Yesu.’ 32Bi nɛ ɔ ma ba pee Nɔmlɔ ngua, nɛ a ma tsɛ lɛ Mawu Bi; nɛ Mawu ma wo lɛ ngɔ hi e nɛnɛkasowa David Matsɛ sɛ ɔ nɔ. 33Nɛ lɛ nɛ e maa ye Israel nɛ ji Yakob we ɔ nɔ matsɛ kɛ ya neneene. Nɛ e matsɛ yemi ɔ se be poe ligbi ko.”

34Maria bi bɔfo ɔ ke, “Kɛ i ma plɛ kɛ fɔ kɛɛ? Ejakaa zangmayo nɛ li nyumu ji mi.”

35Bɔfo ɔ ha lɛ heto nɛ e de ke, “Mumi Klɔuklɔu ɔ maa ba o nɔ, nɛ Mawu he wami ɔ maa ha o nɔ, nɛ lɔ ɔ he je ɔ, bi ɔ nɛ o ma fɔ ɔ maa pee klɔuklɔu, Mawu nitsɛ Bi. 36O nɛ, o weku no Elizabet nɛ nɔ tsuaa nɔ le lɛ kaa yosa a, e na mi mi ngɛ e bwɔmi si, hlami ekpa ji nɛ. 37Ejakaa ke Mawu wo si ɔ, ja e ba mi.”

38Nɛ Maria de bɔfo ɔ ke, “Nutsɔ ɔ Sɔmɔlɔ ji mi, i ngɛ he tsui kaa ma pee nɔ́ tsuaa nɔ nɛ e ngɛ hlae. E ba mi ha mi ngɛ o munyu ɔ nya.” Kɛkɛ nɛ bɔfo ɔ laa.

39Be bɔɔ se ɔ, Maria pue nɔ kɛ ho yo ɔ nɔ ya ngɛ Yudea ma a mi he nɛ 40Zakaria ngɛ ɔ nɛ e ya slaa Elizabet.

41Benɛ Elizabet nu Maria ngami ɔ pɛ nɛ bi ɔ hua ngɛ e muklii mi. Kɛkɛ nɛ Mumi Klɔuklɔu ɔ hyi Elizabet tɔ.

42Nɛ e de Maria kɛ bua jɔmi ke, “A jɔɔ mo ngɛ yihi a kpɛti, nɛ bi nɛ o ma fɔ ɔ hu a jɔɔ lɛ. 43Nɛ hyɛ kaa a bu mi nɛ a wo ye hɛ mi nyami kaa ye Nutsɔ ɔ nitsɛ e nyɛ ba mi slaami. 44O nɛ, benɛ i nu o ngami ɔ pɛ kɛkɛ nɛ bi ɔ hua kɛ bua jɔmi ngɛ ye muklii mi. 45Akɛnɛ o he ye kaa Mawu maa pee nɔ́ nɛ e de ɔ, lɔ ɔ he je nɛ e jɔɔ mo kikɛ ɔ nɛ.”

46Maria hu ha heto nɛ e de ke, “I ngɛ Mawu yi jee; 47nɛ i na ye yi wami helɔ Mawu ɔ he bua jɔmi. 48Ejakaa e hɛ ji e mawayo humi bi ɔ nɔ. Nɛ kɛ je be nɛ ɔ mi kɛ yaa a, yi nɔhi tsuo ma tsɛ mi ke nɔ nɛ Mawu jɔɔ lɛ. 49Ejakaa Mawu Ope ɔ tsu ni nguahi ha mi. 50E naa yi nɔ tsuaa yi nɔ bihi nɛ buu lɛ ɔ mɔbɔ.

51E kɔni si wa, nɛ e gbɛɛ he nɔ woli kɛ pupuupu peeli ngɔ fiaa. 52E kpa matsɛmɛ kɛ je a matsɛ sɛ ɔmɛ a nɔ nɛ e wo humi bimɛ a nɔ. 53Nihi nɛ hwɔ ngɛ mɛ yee ɔ, e ha nɛ a tɔ kɛ ni kpakpahi, nɛ ni nali ɔmɛ ɔ e fie mɛ kɛ ho kɛ dɛ mi gu. 54Moo hyɛ bɔ nɛ e ye kɛ bua e sɔmɔlɔ Israel ha; nɛ e hɛ ji si nɛ e wo kaa e maa na lɛ mɔbɔ ɔ nɔ. 55Ejakaa e wo wa tsɛmɛ nɛ ji Abraham kɛ e bimɛ ɔmɛ si kaa e maa na mɛ mɔbɔ daa.”

56Maria ye maa pee hlami etɛ ngɛ Elizabet ngɔ loko ji e kpale kɛ ho lɛ nitsɛ e we mi ya.

Yohane Baptisilɔ ɔ fɔmi

57Maa pee be nɛ ɔ mi nɔuu nɛ Elizabet be su nɛ e ma fɔ; nɛ e fɔ binyumu. 58Nihi nɛ e kɛ mɛ ngɛ lejɛ ɔ kɛ e wekuli ɔmɛ tsuo nu e fɔmi ɔ he; nɛ a na bua jɔmi saminya nɛ a na Mawu si ngɛ e dloomi ɔ he.

59Jokuɛ ɔ fɔmi e nɔ otsi ɔ, huɛmɛ kɛ wekuli ba kpe kɛ ha bi ɔ kpo jemi kɛ nyumu mi womi. Nɛ jinɛ a to kaa a ma wo bi ɔ e tsɛ biɛ nɛ ji Zakaria a kɛ wo lɛ.

60Se e nyɛ ɔ kplɛɛ we nɔ. E ke biɛ nɛ a maa wo bi ɔ ji Yohane. 61Ni ɔmɛ a hɛ mi pee mɛ yaa nɛ a de lɛ ke, “Nɔ ko be o weku ɔ mi nɛ hɛɛ jamɛ a biɛ ɔ.” 62Enɛ ɔ he je ɔ a wo nine kɛ pee okadi kɛ bi tsɛ ɔ nɛ e tsɔɔ biɛ nɛ a maa wo bi ɔ.

63Lɛ hu e wo nine kɛ pee okadi kɛ bi nɛ a ha lɛ womi nɛ e ngma biɛ ɔ ngɛ nɔ. Nɛ e ngma ke, “Bi ɔ biɛ ji Yohane.” Enɛ ɔ pee nɔ fɛɛ nɔ nyakpɛ. 64Kɛkɛ nɛ Zakaria nya bli nɔuu nɛ e bɔni munyu tumi ekohu; nɛ e bɔni Mawu yi jemi.

65Munyu nɛ ɔ pɛ ngɛ Yudea kpo ɔ mi tsuo. Nɛ nihi nɛ e kɛ mɛ ngɛ lejɛ ɔ a nya kpɛ a he. 66Nɛ nɔ tsuaa nɔ nɛ nu munyu ɔ bi ke, “Mɛni nɔmlɔ kulaa bi nɛ ɔ ma ba hine? Ejakaa e fɔɔ si paa kaa Mawu suɔ bi nɛ ɔ ngɛ nɔ́ ko pɔtɛɛ ko he je.”

67Kɛkɛ nɛ Mumi Klɔuklɔu ɔ ba e tsɛ Zakaria nɔ nɛ e gba nɛ e de ke,

68“Nyɛ ha wa je Nutsɔ nɛ ji Israel Mawu ɔ yi, ejakaa e ba slaa e nimli ɔmɛ nɛ e kpɔ mɛ. 69E tsɔ Yiwamihelɔ Ngua kɛ je e tsɔlɔ Matsɛ David weku ɔ mi ngɔ mane, 70kaa bɔ nɛ e wo si kɛ gu e gbali ɔmɛ a nɔ kɛ je blema lokoo, 71ke nɔ ko ma ba kpɔ wɔ kɛ je wa he nyɛli kɛ nihi nɛ sume wɔ ɔ a dɛ mi.

72E na wa nɛmɛ mɔbɔ. 73E na nɛnɛ Abraham nitsɛ mɔbɔ, ejakaa e hɛ ji si nɛ e wo lɛ ɔ nɔ. 74E ha wɔ he blɔ nɛ wa sɔmɔ lɛ, nɛ wa be nɔ ko gbeye yee; ejakaa e kpɔ wɔ kɛ je wa he nyɛli a dɛ mi. 75E dla wɔ nɛ wa he nɛ tsɔ nɛ waa sa e hɛ mi bɔ nɛ pee nɛ wa nyɛ da e hɛ mi daa kɛ daa.

76Nɛ mo ye binyumu, a ma tsɛ mo anunyami Mawu ɔ e gbalɔ, ejakaa o maa sɛ hlami ma dla blɔ kɛ ha Mesia a bami ɔ. 77O maa tsɔɔ e nimli ɔmɛ bɔ nɛ a maa pee ma na yi wami hemi kɛ gu a he yayami nɛ a ma kɛ ke mɛ ɔ nɔ. 78Enɛ ɔmɛ tsuo maa ba mi, ejakaa Mawu mɔbɔ nami kle nɛ e dloomi je ko maa ho nami ya ha wɔ. 79Nɛ e ma ha la ma kpɛ ha nihi nɛ ngɛ diblii mi nɛ gbenɔ nini nɔ a nɔ ɔ, bɔ nɛ pee nɛ a na blɔ nɛ woɔ nɔ kɛ yaa he jɔmi mi ɔ.”

80Niinɛ, bi nɛ ɔ ba suɔ Mawu sane saminya kɛ je e jokuɛ si, nɛ benɛ e ba wa a, e je ya hi nga nɔ lɛ nɔ kake too hluu kɛ ya si benɛ e je e he ngɔ tsɔɔ Israel ma a kaa Mawu sɔmɔlɔ.