Yohane 19

1Kɛkɛ nɛ Pilato fiaa Yesu kpa saminya. 2Nɛ soja amɛ wo mio tso kɛ pee yi fimi kla, nɛ a ngɔ bu e yi nɛ a wo lɛ tade tsutsu. 3Nɛ a ye e he fɛu nɛ a de ke, “Wa nga mo oo, Yuda bi ɔmɛ a matsɛ.” Nɛ a gba e hɛ mi ma.

4Pilato je kpo ekohu nɛ e de Yuda bi ɔmɛ ke, “I kɛ lɛ ma nyɛ hami amlɔ nɛ ɔ, se nyɛ na nɛ nyɛɛ le paa kaa i nɛ fɔ bumi sane ko ngɛ e he.”

5Kɛkɛ nɛ Yesu je kpo kɛ e yi mio kla a kɛ e he tade tsutsu ɔ. Nɛ Pilato de mɛ ke, “Nyɛ nɛ Nɔmlɔ ɔ!”

6Benɛ e je kpo nɛ osɔfo nikɔtɔma amɛ kɛ Yuda nikɔtɔma amɛ na lɛ ɔ, a kpa ngmlaa nɛ a de ke, “Moo sɛu lɛ! Moo sɛu lɛ!”

Pilato de mɛ ke, “Nyɛ nitsɛmɛ nyɛ ya sɛu lɛ, ejakaa i nɛ fɔ bumi sane ko ngɛ e he.”

7A ha lɛ heto ke, “Ngɛ wa mlaa nya a, e sa gbenɔ ejakaa e ngɛ e he tsɛe ke Mawu Bi.”

8Se benɛ Pilato nu munyu nɛ ɔ e tsui po nɛ e ye gbeye pe kekle ɔ. 9Kɛkɛ nɛ e ngɔ Yesu kɛ ho kojomi he ɔ ya ekohu nɛ e ya bi lɛ ke, “Jije o je?” Se Yesu pui e nya mi.

10Nɛ Pilato bi lɛ ke, “O be ye nya mi poe lo? O li kaa i ngɛ he blɔ nɛ i ngmɛɛ o he aloo i sɛuɔ mo lo?”

11Se Yesu de lɛ ke, “Ke pi hiɔwe nɛ o na he wami ɔ kɛ je jinɛ o be he wami ko ngɛ ye nɔ. Lɔ ɔ he je ɔ, nɔ nɛ je ye he gbi ngɔ ha mo ɔ, e he yayami ɔ kle pe o nɔ́ ɔ.”

12Kɛkɛ nɛ Pilato miɔ nɛ e maa ngmɛɛ Yesu he jamɛ a be ɔ mi. Se Yuda nikɔtɔma amɛ de lɛ ke, “Ke o ngmɛɛ Nɔmlɔ nɛ ɔ he ɔ, lɛɛ tsa pi Kaisare huɛ ji mo. Nɔ tsuaa nɔ nɛ woɔ e he matsɛ ɔ, e te si kɛ si Kaisare.”

13Benɛ Pilato nu munyu nɛ ɔ, e kɛ Yesu je kpo kɛ ba a ngɔ ekohu nɛ e ho ya hi si ngɛ kojomi sɛ nɛ maa si ngɛ tɛ nɛ a fia a nɔ. 14E piɛ bɔɔ nɛ a maa fia piani ngmlɛ nyɔngma kɛ enyɔ nɛ Hebemi nyami be ɔ maa su. Nɛ Pilato de Yuda bi ɔmɛ ke, “Nyɛ nɛ nyɛ matsɛ ɔ!”

15A he nɔ kɛ ngmlaa ke, “Ngɔɔ lɛ kɛ ya! Ngɔɔ lɛ kɛ ya! Moo sɛu lɛ!”

Pilato bi mɛ ke, “Mɛni nyɛ ngɛ dee ɔ? Ma ya sɛu nyɛ matsɛ ɔ lo?”

Se osɔfo nikɔtɔma amɛ he nɔ kɛ ngmlaa ke, “Wa be matsɛ ko, ja Kaisare pɛ.” 16Kɛkɛ nɛ Pilato ngmɛɛ Yesu he kɛ ha mɛ ke a ya sɛu lɛ.

Yesu sɛumi

17Jehanɛ ɔ a nine su Yesu nɔ kaa bɔ nɛ a ngɛ hlae ɔ. Nɛ a ngɔ e sɛumi tso ɔ kɛ tloo lɛ, nɛ a kpaka lɛ kɛ je kpo ngɛ ma a mi kɛ ho he ko nɛ a tsɛɛ ke Yikokonohe, nɛ Hebri gbi mi ɔ, a tsɛɛ lejɛ ɔ ke Golgata a ya. 18Nɛ a ya sɛu lɛ ngɛ lejɛ ɔ kɛ nihi enyɔ komɛ kɛ piɛ e he, nɔ kake ngɛ e hiɔ nɔ nɛ nɔ kake hu ngɛ e muɔ nɔ, nɛ e ngɛ a kpɛti. 19Nɛ Pilato ngma e he munyu kpiti ko kɛ pɛtɛ e sɛumi tso ɔ yi mi ke, “Yesu Nazaret no, Yuda bi ɔmɛ a matsɛ ɔ ji nɛ ɔ nɛ.” 20He nɛ a sɛu Yesu ngɛ ɔ kɛ ma a mi kɛ we, nɛ akɛnɛ a ngma e he sane ɔ ngɛ Hebri kɛ Hela kɛ Roma gbi mi he je ɔ, nihi fuu kane.

21Se osɔfo nikɔtɔma amɛ de Pilato ke e tsake nɔ nɛ e ngma ke, “Yuda bi ɔmɛ a matsɛ” ɔ, nɛ e ngma ke, “E ke ami ji Yuda bi ɔmɛ a matsɛ ɔ nɛ.”

22Se Pilato de mɛ ke, “Nɔ nɛ i ngma a, i ngma. E hi ja a pɛpɛɛpɛ.”

23Benɛ soja amɛ sɛu Yesu se ɔ, a dla e tade ɔmɛ a mi eywiɛ kɛ ha a he nɛ nɔ fɛɛ nɔ na eko, se e tade gaga a be tsami he. 24Lɔ ɔ he je ɔ, a de ke, “Nyɛ ko ha nɛ waa dla mi, se mohu waa fɔ sɔ konɛ waa na nɔ nɛ maa ngɔ lɛ.” Enɛ ɔ ha nɛ nɔ nɛ a de ngɛ Ngmami ɔ mi ke, “A dla ye tade ɔmɛ kɛ ha a he, se ye he tade gaga a lɛɛ a fiɛ asɔ ngɛ nɔ” ɔ ba mi. 25Lɔ ɔ he je nɛ soja amɛ pee enɛ ɔ nɛ. Jamɛ a be ɔ mi ɔ, Yesu nyɛ kɛ e nyɛ ɔ nyɛmiyo kɛ Maria nɛ ji Klopa yo ɔ kɛ Maria Magdalena daa si ngɛ Yesu sɛumi tso ɔ he. 26Benɛ Yesu na e nyɛ kɛ e kaselɔ ɔ nɛ e suɔ ɔ daa si ngɛ lejɛ ɔ, e de e nyɛ ɔ ke, “Maa, o binyumu ji nɛ ɔ nɛ.”

27Nɛ e de e kaselɔ ɔ hu ke, “O nyɛ ji nɛ ɔ nɛ.” Nɛ kaselɔ ɔ kpaka e nyɛ ɔ kɛ ho lɛ nitsɛ e we mi ya.

28Akɛnɛ Yesu le kaa a gbe nɔ́ fɛɛ nɔ nya he je ɔ, bɔ nɛ pee nɛ Ngmami ɔ nɛ ba mi ɔ, e de ke, “Kuma ngɛ mi yee.” 29Jamɛ a be ɔ mi ɔ, wai nɛ duɔ ɔ maa si ngɛ lejɛ ɔ. Nɛ a ngɔ kutsa kɛ ya tsɔ mi nɛ a kɛ ma tso nya, nɛ a wo kɛ to e nya he.

30Benɛ Yesu sa e nya wai ɔ, e de ke, “A gbe nya.” Kɛkɛ nɛ e ma e yi si, nɛ e ma e nya.

31Yuda nikɔtɔma amɛ sume kaa ni gbogboehi a tlɔ sɛumi tso ɔ nɔ ngɛ Hejɔɔmi Ligbi ɔ nɔ, akɛnɛ e ji ligbi pɔtɛɛ nɛ Yuda bi ɔmɛ ngɛ a he dlae kɛ ha Hebemi Ligbi ɔ yemi ɔ. Lɔ ɔ he je ɔ, a ho ya kpa Pilato pɛɛ kaa e ha nɛ a ku a nanehi nɛ a gbo mla konɛ a je mɛ. 32Enɛ ɔ he je ɔ, soja amɛ ya ku ni enyɔ nɛ piɛ Yesu he ɔmɛ a nanehi. 33Se benɛ a su Yesu nɔ ɔ, a na kaa e gbo momo, lɔ ɔ he je ɔ a kui e nanehi. 34Se mohu soja amɛ a ti nɔ kake wo akplɔ kɛ gbɔ e kasa nya nɛ muɔ kɛ nyu je mi pue si amlɔ ɔ nɔuu. 35Nɛ nɔ nɛ na kikɛmɛ a nɔ́ nɛ ɔ ye he odase, nɛ e odase ɔ anɔkuale i konɛ nyɛ hu nyɛ he nɛ nyɛɛ ye.

36-37Soja amɛ pee ni nɛ ɔmɛ kaa bɔ nɛ Ngmami ɔ de ke, “A be e wu ko kue” ɔ, kɛ “A maa hyɛ nɔ nɛ a gbɔ lɛ ní” ɔ, nɛ ba mi.

38Pee se ɔ, Yosef nɛ je Arimatia nɛ ji Yesu kaselɔ ko nɛ je we e hɛ mi, ejakaa e ngɛ Yuda nikɔtɔma amɛ gbeye yee ɔ, ya bi Pilato ke e ngmɛɛ Yesu gbogboe ɔ he ha lɛ nɛ e ya dla. Nɛ e ha lɛ blɔ nɛ e ya je gbogboe ɔ ngɛ sɛumi tso ɔ nɔ. 39Nɛ nyumu ko nɛ a tsɛɛ lɛ ke Nikodemo nɛ ba Yesu ngɔ nyɔ mi ko ɔ, ba piɛ Yosef he. E ngɔ gbogboe womi tsopahi nɛ ji mire kɛ aloe nɛ a futu nɛ e jiɔmi maa pee sɛni tɛ jiɔmi lafa kɛ ba nɛ a kɛ dla lɛ. 40Mɛ ni enyɔ ɔmɛ a blaa Yesu gbogboe ɔ kɛ klala gaga nɛ a kɛ tsopa amɛ kpa mi ɔ, kaa bɔ nɛ Yuda bi ɔmɛ a gbogboe dlami he blɔ nya tomi ngɛ ɔ, 41He nɛ a sɛu Yesu ngɛ ɔ kɛ abɔɔ ko he kɛ we, nɛ yɔkɔ ko ngɛ lejɛ ɔ nɛ a tui nɔ ngɛ mi hyɛ. 42Nɛ akɛnɛ e sa kaa a dla lɛ mla loko Hejɔɔmi Ligbi ɔ nɛ su, nɛ yɔkɔ ɔ hu ngɛ a kasa mi he je ɔ, a to lɛ ngɛ jamɛ a abɔɔ ɔ mi.