Yakobo 1:5

1Yakobo, Mawu kɛ Nutsɔ Yesu Kristo sɔmɔlɔ ɔ ngma womi nɛ ɔ kɛ ya ha Yuda bi ɔmɛ a wɛtso nyɔngma kɛ enyɔ nɛ gbɛ fiã ngɛ he fɛɛ he ɔ ke: Nyɛ he manye!

Haomi woɔ tsui si tomi kɛ baa

2Anyɛmimɛ, anɛ nyɛ ngɛ haomihi kɛ kahi nae ngɛ nyɛ si himi mi lo? Ke ja a, nyɛ bua nɛ jɔ. 3Ejakaa ke a ka nyɛ hemi kɛ yemi ɔ; e haa nɛ nyɛ naa tsui si tomi. 4Nyɛɛ hyɛ nɛ nyɛ na tsui si tomi nɛ ɔ kɛ pi si, nɛ nyɛ haomi ɔmɛ nɛ ko tsi nyɛ blɔ. Ejakaa ke nyɛ na tsui si tomi saminya a, lɔ ɔ loko ji nyɛ ma dla nyɛ he kɛ ha nɔ́ fɛɛ nɔ, nɛ nyɛ je mi bami hu maa hi kɛ pi si. 5Ke nile he hia nyɛ ti nɔ ko ɔ, e bi Mawu nɛ e ma ha lɛ, ejakaa e pee klaalo nɛ e ma ha nɔ tsuaa nɔ nɛ ma bi lɛ ɔ faa. 6Se mohu ji kaa jamɛatsɛ ɔ, e bi kɛ hemi kɛ yemi nɛ nɔ́ jemi be mi; ejakaa nɔ tsuaa nɔ nɛ jee nɔ́ ɔ, e ngɛ kaa oslɔke ngɛ wo hɛ mi nɛ kɔɔhiɔ ngɛ lɛ fiae kɛ bee. 7-8Ejakaa juɛmi enyɔɔnyɔtsɛ ko nɛ ko hyɛ blɔ kaa e ma na nɔ́ ko kɛ je Nutsɔ ɔ dɛ. 9Kristo se nyɛɛlɔ nɛ a bui e he akɔtaa tsɔ ngɛ je nɛ ɔ mi ɔ, e bua nɛ jɔ, ejakaa e kle ngɛ Nutsɔ ɔ hɛ mi. 10-11Nɛ niatsɛ ɔ e bua nɛ jɔ kaa e ni nami ɔ pi nɔ́ ko ngɛ Nutsɔ ɔ hɛ mi, ejakaa e se be kɛe ngɛ je mi kaa bɔ nɛ nga mi mɔmɔ he fɛu laa, nɛ nyagbe mi ɔ pu la nglaa lɛ ɔ. Ja a nɛ niatsɛmɛ ngɛ. E be kɛe nɛ a ma gbo nɛ a ma si a ni tsumi slɔɔto ɔmɛ nɛ ha we mɛ deka a. 12A gbaa nɔ nɛ e nyɛɔ nɛ e daa kami nya; ejakaa ke pee se ɔ, e nine maa su e hiɔwo nɔ, nɛ ji wami jlasi ɔ nɛ Mawu wo he si kaa e ma ha ni nɛmɛ nɛ suɔ lɛ ɔ. 13Nyɛ kai kaa ke nɔ ko ngɛ hlae nɛ e pee yayami ɔ, tsa pi Mawu nɛ ngɛ lɛ kae, ejakaa Mawu be suɔe nɛ e pee yayami, nɛ ja a kɛ e be nɔ ko hu kae kaa e pee yayami. 14Nɔmlɔ adesa nitsɛ susumi yayahi kɛ akɔnɔ níhi nɛ woɔ kami kɛ baa e nɔ. 15Nɛ susumi yaya nɛ ɔmɛ kɛ nɔ́ yayami peemi baa, nɛ nyagbe mi ɔ, Mawu woɔ he hiɔ kɛ gbenɔ. 16Lɔ ɔ he je ɔ, anyɛmimɛ nɛ a suɔ, nyɛ ko ha nɛ nɔ ko nɛ e sisi nyɛ.

Mawu dɛ mi ni kpakpahi jee

17Mawu ngɔ nɛ nɔ́ fɛɛ nɔ nɛ hi kɛ pi si ɔ jee kɛ baa ha wɔ. Lɛ ji la bɔlɔ, nɛ e kpɛɛ kɛ haa wɔ be tsuaa be, nɛ e tsakee we. 18E kɛ wɔ ba je mi ngɛ lɛ nitsɛ e suɔmi nya kɛ gu e anɔkuale munyu ɔ nɔ, nɛ wɔ ji bɔ níhi tsuo a kpɛti kekle bimɛ. 19Anyɛmimɛ, nyɛɛ le enɛ ɔ: Nyɛ ti nɔ tsuaa nɔ nɛ e pee tue bulɔ, se e nya nɛ ko sɔ kɛ munyu tumi, nɛ e muklii mi hu nɛ ko fu mlamlaamla. 20Ejakaa nɔmlɔ mi mi fumi ha we nɛ e tsuɔ suɔmi nya ni.

21Enɛ ɔ he je ɔ, nyɛ je yayami kɛ je nyɛ si himi mi, nyɛ mi blɔ kɛ kpo nɔ blɔ tsuo, nɛ nyɛ bua nɛ jɔ nyakpɛ munyu ɔ nɛ wa nine su nɔ ɔ he kɛ he si bami, ejakaa lɛ nɛ e ma he wa klaahi a yi wami, ke e he wa tsuihi ɔ.

22Nɛ nyɛɛ pee munyu ɔ nɔ yeli se pi e nuli kɛkɛ, nɛ nyɛ ko mlɔɔ nyɛ he. 23Ejakaa nɔ ko nɛ nuɔ munyu ɔ se e yi nɔ ɔ, e ngɛ kaa nɔ ko nɛ hyɛɔ e hɛ mi ngɛ ahuhuɛ mi. 24E naa e he kɛkɛ e je; se amlɔ ɔ mi nɔuu ɔ, e hɛ jee bɔ nɛ e ngɛ ɔ nɔ. 25Se nɔ tsuaa nɔ nɛ hyɛɔ Mawu mlaa nɛ hi kɛ pi si, nɛ haa wa yeɔ wa he ɔ mi be fɛɛ be, tsa pi nɛ e ma kai mlaa a kɛkɛ, se e yeɔ nɔ ɔ, Mawu gbaa lɛ ngɛ e nɔ́ tsuaa nɔ peemi mi.

26Ke nɔ ko tsɛɔ e he Kristo se nyɛɛlɔ se e tuɔ munyu kɛkɛ nɛ e kɔɛ e lilɛ mi ɔ, e ngɛ e he sisie, e jami ɔ he be se nami ko. 27Mawu lemi nɛ hi kɛ pi si, nɛ mu ko be he ngɛ Mawu nɛ ji Tsɛ ɔ hɛ mi ɔ ji kaa, o maa hyɛ awusahi kɛ yalɔyihi a nɔ nɛ o maa ye Nutsɔ ɔ anɔkuale, o be je ɔ mi ní ɔmɛ woe kɛ wo o he mu.