Galata 6:2

1Mamimɛ, suɔli, ke nyɛ nyɛmi ko sɛ yayami mi ɔ, nyɛ ni nɛmɛ nɛ ji dali ɔmɛ ɔ, nyɛɛ ye kɛ bua lɛ ngɛ he si bami kɛ mi mi jɔmi mi, konɛ e kpale kɛ ba blɔ dadɛ ɔ nɔ ekohu, nɛ nyɛ kai kaa eko hwɔɔ se ɔ, tɔmi ma nyɛ ba nyɛ ti nɔ ko hu e blɔ fa mi. 2Nyɛɛ kpee nyɛ he ngɛ nyɛ haomihi kɛ nɔ nami ɔmɛ a mi, nɛ enɛ ɔ ma ha nɛ nyɛɛ ye Kristo mlaa nɔ. 3Ke nɔ ko susu kaa nɔ ko ji lɛ nɛ e be enɛ ɔ nɔ nyɛe maa ye ɔ, lɛ nitsɛ e he kuasia nɛ e ngɛ pee.

4Nɔ tsuaa nɔ nɛ e ka lɛ nitsɛ e he nɛ e hyɛ ha kaa e ngɛ mɔde bɔe lo; nɛ ke e bua jɔ e ni tsumi he ɔ, kɛkɛ e kɛ e he be nɔ ko he toe hu. 5Wa ti nɔ tsuaa nɔ ngɛ tɔmi komɛ kɛ e haomihi nɛ e maa tloo, ejakaa wa ti nɔ ko hí kɛ pi si.

6Nihi nɛ a ngɛ mɛ Mawu Munyu ɔ tsɔɔe ɔ, a wo a tsɔɔli ɔmɛ hiɔ nɛ a kɛ ye kɛ bua mɛ.

Nyɛ nine mi nɛ ko je wu

7Nyɛ ko mlɔɔ nyɛ he, nɛ nyɛ susu kaa nyɛ maa kua Mawu nɛ nyɛ maa ye nyɛ he. Nɔ́ nɛ nɔ ko du ɔ, jamɛ a nɔ́ ɔ nɔuu e ma kpa. 8Nɔ nɛ du ni kɛ ha e he lo bua jɔmi nami ɔ, e ngɛ yayami wuhi due, nɛ e ma kpa mumi mi si gbeemi kɛ gbenɔ; se nɔ nɛ duɔ Mumi ɔ nɔ́ kpakpa amɛ ɔ, e ma kpa neneene wami nɛ Mumi Klɔuklɔu ɔ ma ha lɛ ɔ. 9Wa ko ha nɛ pɔ nɛ tɔ wɔ kɛ kpakpa peemi, ejakaa ke wa jɔɔ we kpakpa peemi ɔ, e be kɛe nɛ wa ma kpa jɔɔmi. 10Enɛ ɔ he je ɔ, be fɛɛ be nɛ wa na he blɔ ɔ, nyɛ ha waa pee nihi tsuo kpakpa, titli ɔ, wa nyɛmimɛ Kristo se nyɛɛli.

11Imi nitsɛ nɛ i ngɛ nyagbe munyu nɛ ɔmɛ ngmae. Nyɛɛ hyɛ bɔ nɛ ningma amɛ kle agboagbo ha! 12Jamɛ a tsɔɔli ɔmɛ nɛ ngɛ hlae kaa a mlɔɔ nyɛ nɛ nyɛ ha nɛ a wo nyɛ nyumu mi ɔ, nɔ́ kake pɔtɛɛ he je nɛ a ngɛ lɔ ɔ pee ngɛ. A ngɛ pee konɛ a he biɛ nɛ a ko ye mɛ awi, ejakaa ke a kplɛɛ nɔ kaa Kristo sɛumi Tso ɔ kɛkɛ nɛ heɔ nɔ yi wami ɔ, a maa wa mɛ yi mi. 13Nɛ tsɔɔli ɔmɛ nɛ a wo mɛ nyumu mi tete ɔ, a yi Yuda bi ɔmɛ a mlaa kpa amɛ a nɔ. Se kɛ ɔ, a ngɛ hlae nɛ nyɛ ha nɛ a wo nyɛ nyumu mi bɔ nɛ pee nɛ a fĩa kaa a se nyɛɛli ji nyɛ.

14Ami lɛɛ e ko ba mi kaa i ma fĩa ngɔ fɔ nɔ́ ko nɔ, ja wa Yesu Kristo Sɛumi Tso ɔ kɛkɛ. Ejakaa Sɛumi Tso ɔ he je ɔ, a gbe ye suɔmi nɛ i ngɛ ngɛ je nɛ ɔ mi afɛu ni ɔmɛ kulaa a mi ɔ momoomo, nɛ je ɔ hu e suɔmi nɛ e ngɛ ngɛ ye mi ɔ gbo momoomo. 15Nɛ amlɔ nɛ ɔ, slɔɔto ko be nɔ nɛ a wo lɛ nyumu mi kɛ nɔ nɛ a wui lɛ nyumu mi a kpɛti; se mohu oti ɔ ji kaa a tsake wɔ niinɛ nɛ wa plɛ nimli hehi lo.

16Mawu mɔbɔ nami kɛ he jɔmi nɛ ba nihi kulaa nɛ nyɛɔ ngɛ blɔ nya tomi nɛ ɔ nya, kɛ nihi nɛ ngɛ he fɛɛ he nɛ Mawu nihi ji mɛ niinɛ ɔ a nɔ.

17Jehanɛ ɔ, nɔ ko nɛ ko doo ye nya ngɛ ni nɛ ɔmɛ a he hu, ejakaa pa kɛ pa doku ɔmɛ nɛ i na kɛ je kpa amɛ nɛ Yesu he nyɛli ɔmɛ fiaa mi ɔ ngɛ ye he, nɛ a yeɔ ye he odase kaa e nyɔguɛ ji mi.

18Mamimɛ, wa Nutsɔ Yesu Kristo dloomi ɔ kɛ nyɛ tsuo nɛ hi si.