Galata 2

1Jeha nyɔngma kɛ eywiɛ se ɔ, i kɛ Barnaba kpale kɛ ba Yerusalem, nɛ Tito hu piɛɛ wa he. 2I ya lejɛ ɔ ngɛ Mawu blɔ tsɔɔmi pɔtɛɛ nɔ, nɛ i kɛ nyɛmi ɔmɛ ya susu Manye Munyu ɔ nɛ i ngɛ fiɛe ngɛ ma je li ɔmɛ a kpɛti ɔ he. I kɛ asafo nikɔtɔma amɛ ya na ni sɛɛmi ngɛ laami mi bɔ nɛ pee nɛ a nu nɔ́ nɛ i ngɛ tsɔɔe ɔ sisi. Nɛ i he ye kaa a na kaa e ji anɔkuale. 3A kɛ mi kpa gbi, nɛ lɔ ɔ he je ɔ, a bi we ke a wo Tito nɛ ji ma je no nɛ piɛ ye he ɔ nyumu mi lo.

Mlaa a he nya sami

4Se lakpa Kristo se nyɛɛli komɛ ju si kɛ ba sɛ asafo ɔ mi nɛ a ba hyɛ wa he jɔmi nɛ wa na ngɛ Kristo Yesu mi ɔ ha kaa wa ngɛ Yuda bi ɔmɛ a mlaa amɛ a nɔ yee lo. A bɔ mɔde nɛ a fi wɔ kɛ a mlaa amɛ kaa nyɔguɛhi. 5Se wa bui mɛ tue hɛ ngmɛfia kake po, ejakaa wa sume nɛ wa futu nyɛ juɛmi nɛ nyɛ susu kaa nyumu mi womi kɛ Yuda bi ɔmɛ a mlaa amɛ a nɔ yemi nɔ nɛ a maa gu kɛ he nyɛ yi wami.

6Nɛ asafo ɔ mi nikɔtɔma amɛ nɛ a buu mɛ ɔ, a kɛ nɔ́ kpa ko piɛ we nɔ́ nɛ i tsɔɔ ɔ he. Se ami lɛɛ i nɛ mi gbami ko ngɛ wɔ kɛ ni nɛmɛ nɛ a buu mɛ kaa mɛ ji nikɔtɔma amɛ ɔ wa kpɛti, ejakaa wɔ tsuo ɔ, nimli kake ji wɔ ngɛ Mawu hɛ mi. 7Anɔkuale ji, a na kaa a to Manye Munyu ɔ fiɛmi ni tsumi ɔ kɛ wo ye dɛ, nɛ ma fiɛ kɛ tsɔɔ ma je li ɔmɛ kaa bɔ nɛ a to kɛ wo Petro dɛ nɛ e fiɛ kɛ tsɔɔ Yuda bi ɔmɛ ɔ. 8Mawu, nɔ nɛ pee Petro bɔfo kɛ ha Yuda bi ɔmɛ ɔ, lɛ nɔuu nɛ e pee mi bɔfo kɛ ha ma je li ɔmɛ. 9Nɛ benɛ a na dloomi nɛ a kɛ dloo mi ɔ, Yakobo kɛ Kefa kɛ Yohane nɛ a buu mɛ kaa asafo ɔ hɛ mi nyɛɛli ɔ, a kpa a hiɔ nine mi kɛ sa i kɛ Barnaba wa dɛ kaa huɛ bɔmi okadi, konɛ wɔɔ lɛɛ waa ya ma je li ɔmɛ a ngɔ, nɛ mɛ hu a ya Yuda bi ɔmɛ a ngɔ. 10Se a bi wɔ nɛ waa ye kɛ bua ohiafo ɔmɛ be fɛɛ be, nɛ enɛ ɔ ji ami hu ye susumi.

11Se benɛ Petro ba Antiokia a, i kã e hɛ mi saminya, ejakaa e pee we nɔ nɛ da. 12Ejakaa, benɛ e ba kekle ɔ e kɛ ma je li ɔmɛ yeɔ ni. Se benɛ Yakobo huɛhi Yuda bi komɛ ba a, e kɛ mɛ kpa ni yemi, ejakaa e ngɛ Yudea mlaa leli ɔmɛ gbeye yee ngɛ nɔ́ nɛ a ma de he, akɛnɛ mɛɛ a ma nɔ mi kaa ja a wo nɔ ko nyumu mi loko a ma he e yi wami ;. 13Nɛ lɔ ɔ he je ɔ, Yuda bi nɛ ji Kristo se nyɛɛli kpa amɛ kɛ Barnaba tete peeɔ osatotsɛmɛ, ejakaa a peeɔ nɔ́ nɛ Petro pee ɔ, be mi nɛ a le nɔ́ nɛ sa kaa a pee. 14Benɛ i na nɔ́ nɛ ngɛ nɔ́ yae kaa a yi anɔkuale ngɛ a hemi kɛ yemi ɔ mi, nɛ a nyɛɛ we Manye Munyu ɔ e anɔkuale ɔ se ɔ, i de Petro ngɛ mɛ tsuo a hɛ mi ke, “Mo nɛ o ji Yuda no, se o kpa Yuda bi ɔmɛ a mlaa amɛ a nɔ yemi pi mwɔnɛ ɔ, kɛ peeɔ kɛɛ nɛ o nyɛɛ ma je li nɛ ɔmɛ a nɔ kaa a ye jamɛ a mlaa amɛ a nɔ?” 15I kɛ mo ɔ, Yuda fɔfɔɛhi ji wɔ, nɛ wa pi ma je li yayami peeli. 16Se kɛ ɔ, wɔ Yuda bi Kristo se nyɛɛli, wa le klɛdɛɛ kaa a be Yuda bi Kristo se nyɛɛli a mlaa amɛ a nɔ yemi ɔ nɔ gue kɛ he wa yi wami, kaa ja Yesu Kristo nɔ hemi kɛ yemi kɛkɛ nɔ nɛ a maa gu kɛ kpɔ wɔ kɛ je wa yayami ɔmɛ a mi. Enɛ ɔ he je ɔ, wɔ hu wa he Yesu Kristo nɔ ye konɛ Mawu nɛ he wa yi wami kɛ gu hemi kɛ yemi nɔ, se pi Yuda bi ɔmɛ a mlaa amɛ a nɔ yemi he je, ejakaa a be nɔ ko yi wami hee kɛ gu mlaa amɛ a nɔ yemi nɔ.

17Ke wɔ nɛ wa heɔ Kristo nɔ yeɔ kɛ ha wa yi wami hemi ɔ, wa na kaa nɔ́ nɛ wa ngɛ pee ɔ dɛ, se a be wa yi wami nyɛe ma he ke ji a wui wɔ nyumu mi, nɛ wa yi Yuda bi ɔmɛ a mlaa kpa amɛ hu a nɔ ɔ, anɛ wa ma nyɛ de ke Kristo nɔ hemi kɛ yemi ɔ kpata wa hɛ mi lo? Dabi, e sɛ kaa nɔ ko susuu kikɛmɛ a nɔ́ ko kɛ siɔ wa Nutsɔ ɔ. 18Se mohu, wa peeɔ yayami peeli ke ji ni momo ɔmɛ nɛ i ngɛ a hɛ mi kpatae, nɛ ji Yuda bi ɔmɛ a mlaa amɛ a nɔ yemi kɛ ha yi wami hemi ɔ, wa kpale ngɛ mɛ pee. 19Ejakaa kɛ gu Ngmami ɔ kanemi nɔ ɔ i na kaa i be Mawu hɛ mi nyɛe ma sa kɛ gu mlaa amɛ a nɔ yemi nɔ. Se i ma sa Mawu hɛ mi ke i he Kristo nɔ ye.

20A sɛu mi kɛ Kristo, nɛ enɛ ɔ he je ɔ, tsa pi ami nɛ ye hɛ ngɛ hu, se Kristo nɛ e hɛ ngɛ ngɛ ye mi. Nɛ wami nɛ ngɛ ye nɔmlɔ tso nɛ ɔ mi ɔ, e je hemi kɛ yemi nɛ i ngɛ ngɛ Mawu Bi ɔ mi, nɔ nɛ suɔ mi nɛ e gbo kɛ ha mi ɔ. 21I be nihi nɛ ngɔɔ Kristo gbenɔ ɔ kaa nɔ́ ko nɛ se nami be he ɔ a kpɛti. Ejakaa ke a ma nyɛ he wa yi wami kɛ gu Yuda bi ɔmɛ a mlaa amɛ a nɔ yemi nɔ ɔ, lɛɛ e he hia we kaa Kristo nɛ e gbo.