Bɔfo Ɔmɛ 24

Paulo ngɛ Roma nɔ yeli ɔmɛ i hɛ mi

1Ligbi enuɔ se ɔ, Osɔfo Nɔkɔtɔma Anania kɛ Yuda bi ɔmɛ a nikɔtɔma amɛ a ti ni komɛ kɛ otsiamɛ ko nɛ a tsɛɛ lɛ ke Tertulo ɔ ba Kaisarea nɛ a ba po Paulo nya. 2Benɛ a tsɛ Tertulo nɛ e tu munyu ɔ, e te si nɛ e po Paulo nya ke, “Wa nɔmo Amlaalo, i ngɛ hae nɛ o le kaa o matsɛ yemi ɔ haa nɛ wɔ Yuda bi ɔmɛ hu a buu wa he akɔtaa, nɛ lɔ ɔ he je ɔ, wa ngɛ tue mi jɔmi kɛ bua jɔmi. 3Wa ngɛ mo si nae ngɛ ni nɛ ɔmɛ tsuo a he. 4I kɛ he si bami kɛ pɛɛ kpami ngɛ o hɛ mi fɔe kaa o bu mi tue kpiti kɛkɛ nɛ ma jaje waa kɛ nyumu nɛ ɔ wa kpɛti sane kɛ tsɔɔ mo. 5Ejakaa wa na nyumu nɛ ɔ kaa gidigiditsɛ ko, nɛ e ngɛ Yuda bi ɔmɛ a tue puɛe ngɛ je ɔ mi he fɛɛ he nɛ a pee basabasa, nɛ a te si kɛ si Roma amlaalo ɔ. Nɛ lɛ ji Nazaret bi ɔmɛ a kuu ko nyatsɛ. 6Tsa pi ni nɛ ɔmɛ kɛkɛ, se loko ji wa nu lɛ ɔ, e ngɛ Sɔlemi We ɔ he mu woe.

Jinɛ wa ko tsu e he ni bɔ nɛ sa, 7se Lisia nɛ ji asafoatsɛ nɔkɔtɔma a kpɔ lɛ ngɛ wa dɛ kɛ je, 8ke e sa nɛ a kojoɔ lɛ ngɛ Roma mlaa a nya. Nɛ mo nitsɛ o maa na anɔkuale ɔ ke o bi e nya mi.”

9Tertulo nya mɛ si nɛ Yuda bi ɔmɛ nɛ ngɛ lejɛ ɔ fi e se nɛ a de ke nɔ́ tsuaa nɔ nɛ e de ngɛ Paulo he ɔ ngɛ mi anɔkuale.

10Kɛkɛ nɛ amlaalo ɔ gba Paulo nine nɛ e je munyuhi nɛ a de ngɛ e he ɔ nya. Nɛ e wo e nya nɔ nɛ e de ke, “Amlaalo, i le kaa o bɔni Yuda zugba a nɔ munyu yemi ɔ pi mwɔnɛ ɔ, nɛ lɔ ɔ he je ɔ, i yi tsui kaa ma je ye nya. 11Maa pee mwɔnɛ ɔ ji ligbi nyɔngma kɛ enyɔ nɛ i ba Yerusalem nɛ ma ba ja Mawu ngɛ Sɔlemi We ɔ. 12I kɛ nɔ ko pee we gidigidi ko ngɛ kpe he ko loo ngɛ ma mi gbɛjegbɛ ko tete nɔ. 13Nɛ nimli nɛ ɔmɛ be sane nɛ a po kɛ fɔ ye nɔ nɛ ɔ nya nyɛe maa tsɔɔ.

14Se nɔ́ kake kɛkɛ nɛ ngɛ mi ji, i jaa wa tsɛ ɔmɛ a Mawu ɔ, nɛ i nyɛɛ yi wami hemi blɔ ɔ nɔ. Enɛ ɔ ji nɔ́ nɛ a ngɛ tsɔɔe kaa i ngɛ lakpa tsɔɔmi ko mi ɔ nɛ. I yeɔ Yuda bi ɔmɛ a mlaa amɛ kɛ nɔ́ tsuaa nɔ nɛ a ngma ngɛ gbali ɔmɛ a womi ɔmɛ a mi ɔ nɔ pɛpɛɛpɛ. 15Nɛ ami hu i heɔ yeɔ kaa nimli nɛ ɔmɛ nɔuu, kaa gbogboehi a si temi be maa ba, nɛ dali kɛ yayami peeli tsuo maa te si. 16Enɛ ɔ he je ɔ, i gboɔ dengme be fɛɛ be kaa ma hɛɛ he nile kpakpa ngɛ Mawu kɛ nimli kulaa a hɛ mi.

17I hia blɔ jeha babauu ji nɛ, nɛ i kpale kɛ ba Yerusalem kɛ ye dɛ mi sika nɛ i ma kɛ ye kɛ bua Yuda bi ɔmɛ, nɛ ma sã bɔ kɛ ha Mawu. 18Jamɛ a be ɔ mi nɛ ye nya poli ɔmɛ na mi ngɛ Sɔlemi We ɔ nɛ i ngɛ bɔ sae. I kpa ye yi ngɛ mlaa a nya. A nɛ asafo ko nɛ ngɛ gidigidi pee ngɛ ye kasa nya. Se mohu Yuda bi komɛ nɛ je Turkia ngɛ Asia a ba lejɛ ɔ, 19nɛ mɛ ji nihi nɛ sa nɛ a ba po ye nya ke i pee nɔ́ yaya ko. 20Aloo mo bi ni nɛ ɔmɛ nitsɛ po tɔmi nɛ a na ngɛ ye he benɛ a ke mi ya a kojomi he ɔ. 21Ke ji a na tɔmi ko kulaa a, lɛɛ munyu kake nɛ i kpa ngmlaa ke de ke, ‘Gbogboehi a si temi he odase nɛ i ngɛ yee ɔ he je nɛ nyɛ ngɛ mi kojoe mwɔnɛ ɔ’ ɔ pe.”

22Se akɛnɛ Felike le klɛdɛɛ kaa Kristo se nyɛɛli ɔmɛ pee we gidigidi ɔ, e tsiɛ munyu ɔ kɛ to nɛ e de Yuda bi ɔmɛ ke a mlɛ nɛ soja amɛ a nɔkɔtɔma Lisia nɛ ba konɛ a ye sane ɔ. 23E ha nɛ a kpale Paulo kɛ ya wo tsu mi ekohu, se e de e he buli ɔmɛ ke a ko nyɛ lɛ nɔ́ ko he, nɛ a ha he blɔ nɛ e huɛmɛ nɛ a ba slaa lɛ nɛ a ke lɛ ni. A ko ha nɛ e na nɔ́.

24Be saii se ɔ, Felike kɛ e yo Drusila nɛ ji Yuda no ɔ ba nɛ a ha a tsɛ Paulo kɛ ba a ngɔ nɛ e ba tsɔɔ mɛ nɔ́ nɛ hemi kɛ yemi ngɛ Yesu Kristo mi ɔ tsɔɔ. 25Se benɛ Paulo ngɛ mɛ dami kɛ he nɔ yemi kɛ kojomi nɛ maa ba a he munyu tue ɔ, Felike ye gbeye nɛ e de lɛ ke, “Moo ya lolo, ke i na deka a, ma tsɛ mo ekohu.”

26Felike pɔɔ Paulo tsɛmi kpitikpiti kɛ ni sɛɛmi, ejakaa e ngɛ blɔ hyɛe kaa Paulo maa wo e nya mi nɔ́ nɛ e ngmɛɛ e he. 27Enɛ ɔ ya nɔ jeha enyɔ sɔuu, nɛ Porkio Festo ba ye Felike nane mi. Akɛnɛ Felike suɔ kaa e sa Yuda bi ɔmɛ a hɛ mi he je ɔ, e si Paulo ngɛ tsu ɔ mi.