Bɔfo Ɔmɛ 18

1Enɛ ɔ se ɔ, Paulo si Atene kɛ ho Korinto ya. 2Nɛ e kɛ Yuda no ko ya kpe nɛ a tsɛɛ lɛ ke Akuila nɛ a fɔ lɛ ngɛ Ponto ɔ, kɛ e yo Priskila. Akuila je Italia kɛ ba Korinto, ejakaa Kaisare Klaudio fie mɛ Yuda bi ɔmɛ tsuo kɛ je Roma. 3Paulo kɛ mɛ hi si nɛ e kɛ mɛ tsu ni, ejakaa mɛ hu bo tsu peeli ji mɛ kaa lɛ kɛ.

Paulo kɛ ma je li ɔmɛ

4Paulo ya fiɛɔ ngɛ kpe he ɔ daa Hejɔɔmi Ligbi ɔ nɔ, nɛ e bɔɔ mɔde kaa e ma tsake Yuda bi ɔmɛ kɛ Hela bi ɔmɛ hu lo. 5Se benɛ Sila kɛ Timoteo je Makedonia kɛ ba na lɛ ngɛ Korinto ɔ, Paulo tsu we nɔ́ kpa ko hu pe Mawu Munyu ɔ fiɛmi kɛ Yesu he odase yemi kaa lɛ ji Mesia a nɛ. 6Se benɛ Yuda bi ɔmɛ te si kɛ wo lɛ nɛ a tu musu bɔmi munyuhi kɛ si Yesu ɔ, Paulo blɛ bunyuku ngɛ e tade ɔ mi ngɔ pue a nɔ nɛ e de mɛ ke, “Nyɛ muɔ ɔ nɛ ba nyɛ nitsɛmɛ nyɛ nɔ, ami i li he nɔ́ ko. Nɛ kɛ je be nɛ ɔ mi kɛ yaa a, i ma ya fiɛ munyu ɔ kɛ tsɔɔ ma je li ɔmɛ.”

7Paulo si lejɛ ɔ nɛ e ya to Hela no Mawu jalɔ ko nɛ a tsɛɛ lɛ ke Titio Yusto nɛ e we ngɛ kpe he ɔ kasa mi ɔ ngɔ. 8Nɛ a baptisi kpe he nɔkɔtɔma nɛ a tsɛɛ lɛ Krispo ɔ kɛ e we ɔ tsuo kɛ Korinto bi fuu nɛ he Nutsɔ ɔ nɔ ye ɔ.

9Mawu kɛ Paulo tu munyu nyɔ mi ko ngɛ ni nami mi ke, “Koo ye gbeye! Moo fiɛ munyu ɔ, nɛ o ko si. 10Ejakaa i kɛ mo ngɛ, nɛ nɔ ko be mo yayami ko nyɛe maa pee; i ngɛ nihi babauu ngɛ ma nɛ ɔ mi.” 11Enɛ ɔ ha nɛ Paulo hi ma a mi jeha kake kɛ fa sɔuu nɛ e tsɔɔ mɛ Mawu anɔkuale munyu ɔ.

12E ba mi kaa benɛ a wo Galio amlaalo ngɛ Akaia a, Yuda bi ɔmɛ pee kake nɛ a te si kɛ wo Paulo nɛ a nu lɛ kɛ ba kojomi he ɔ ngɛ amlaalo ɔ hɛ mi. 13Nɛ a po e nya ke, “Nyumu nɛ ɔ ngɛ nihi a tue puɛe nɛ a je Roma mlaa a se nɛ a ba ja Mawu.” 14Se benɛ Paulo ma je e nya pɛ nɛ Galio de Paulo nya poli ɔmɛ ke, “Nyɛɛ bu tue, nyɛ Yuda bi, kaa e ji mlaa tɔmi sane ko nɛ nyɛ kɛ ba ye ngɔ jinɛ e sa nɛ ma bu nyɛ tue. 15Se akɛnɛ e hine nya sami sane nɛ kɔɔ nyɛ Yuda bi ɔmɛ nyɛ mlaa amɛ a he ɔ, ma suɔ nɛ nyɛ nitsɛmɛ nyɛ ya hyɛ mi. Ejakaa i sume nɛ ma kojo kikɛmɛ a munyuhi.” 16Nɛ e fie mɛ kɛ je kpo ngɛ kojomi he ɔ.

17Kɛkɛ nɛ ni ɔmɛ nu Sostene nɛ ji kpe he ɔ nɔkɔtɔma he nɛ a to ɔ, nɛ a fiaa lɛ ni saminya ngɛ tsu ɔ se. Se nɔ́ nɛ ɔmɛ hɛ wui Galio kulaa.

18Sane nɛ ɔmɛ a se ɔ, Paulo hi lejɛ ɔ be saii loko ji e si nɛ e ngɔ Akuila kɛ Priskila kɛ piɛ e he, nɛ a sɛ lɛ kɛ ba Siria. Benɛ a ba su Kenkrea a, Paulo ba kpa e yi ɔ ngɛ Yuda bi ɔmɛ a kusumi ɔ nya, ejakaa e ka kita. 19Se benɛ a ya su Efeso lɛda he ɔ, Paulo si mɛ ngɛ lɛ ɔ mi nɛ e kɛ Yuda bi ɔmɛ ya na ni sɛɛmi ngɛ a kpe he ɔ. 20Efeso bi ɔmɛ kpa lɛ pɛɛ nɛ e hi a ngɔ bɔɔ, se akɛnɛ e be be he je ɔ, e kplɛɛ we nɔ, nɛ e sɛ mɛ nɛ e de ke,

21“E sa kaa ma ya su Yerusalem nɛ ma ya ye Hejɔɔmi Ligbi ɔ ngɛ lejɛ ɔ.” Se e wo mɛ si kaa ke Mawu suɔ ɔ, e maa kpale kɛ ba a ngɔ ekohu. Kɛkɛ nɛ a pue nɔ.

22Nɛ benɛ lɛ ɔ ya wa ngɛ Kaisarea a, Paulo je kpo nɛ e ya nga Yerusalem asafo ɔ loko ji a tsa nɔ kɛ ho Antiokia ya. 23E hi Antiokia be saii, nɛ e pue nɔ ekohu kɛ ya kpa Galatia kɛ Frigia zugba amɛ a nɔ kɛ wo kaseli ɔmɛ he wami bɔ nɛ pee nɛ a ya nɔ nɛ a wa ngɛ Nutsɔ ɔ mi.

24Nɛ e ba mi kaa Yuda no ko nɛ a tsɛɛ lɛ ke Apolo ɔ je Aleksandria ngɛ Mizraim kɛ ba Efeso. Apolo ji Mawu Munyu fiɛlɔ kɛ Ngmami Klɔuklɔu ɔ Tsɔɔlɔ, nɛ e nya mi tsɔ saminya.

25Benɛ Apolo ngɛ Mizraim ɔ, nɔ ko tu lɛ Yohane Baptisilɔ ɔ he munyu kɛ nɔ́ nɛ Yohane de ngɛ Yesu he; nɛ lɔ ɔ pɛ ji nɔ́ nɛ e le. E nui sane ɔ e mi ekpa ko hu. 26Lɔ ɔ he je ɔ, e bɔni fiɛmi kɛ ka ngɛ kpe he ɔ nɛ e ngɛ dee ke, “Yiwamihelɔ ɔ ma! Nyɛ dla nyɛ he nɛ nyɛ nya e he.” Benɛ Akuila kɛ Priskila nu e fiɛmi ɔ, pee se ɔ, a tsɛ lɛ kɛ ba a ngɔ nɛ a tsɔɔ lɛ nɔ́ nɛ ba Yesu nɔ́ kɛ je Yohane yi nɔ bebeebe, nɛ a pá níhi a mi kɛ tsɔɔ lɛ.

27Benɛ Apolo pee e juɛmi kaa e maa ya Akaia a, kaseli ɔmɛ wo lɛ he wami kaa e ya; nɛ a ngma Akaia nyɛmi ɔmɛ womi kaa ke e ba a, a he lɛ atuu. Nɛ e ba mi kaa benɛ Apolo ya su Akaia a, Mawu gu e nɔ kɛ wo asafo ɔ he wami babauu. 28Ejakaa e kɛ ka ku Yuda bi ɔmɛ a nya la, nɛ e tsɔɔ mɛ ngɛ Ngmami Klɔuklɔu ɔ mi kaa anɔkuale mi ɔ, Yesu ji Mesia a nɛ.