Dhankavi Bible
तितुस 3
मसीह चाल चालने
मानसे क सुधि दिला कि हाकिम आरू हकी क हको तळे रये, आरू उनकी हुकुम माने, आरू हर एक वारला काम क करता तीयार रये। काही क बदनामी नी करे, झगड़ालू नी होय; पर कोमल स्वभाव क होय, आरू सब मानसे क साथे मोटी नम्रता साथे रये। काहकि हामु भी पेहल निर्बुध्दि आरू हुकुम नी माननेवावा, आरू भ्रम मा पड़ा होया आरू अलग प्रकार की लालोच आरू सुखविलास क दासत्व मा हुता, आरू बैरभाव, डाह करने मा जीवन व्यतीत करता हुता, आरू घीन आवे असो हुतो, आरू एक दिसरा छे बैर राखता हुता। पर जव हामरे उध्दारकरता यहोवा–भगवान की किरपा आरू मानुस पर ओको मोंग प्रगट होया। तो त्यो हामरा उध्दार कर्या; आरू यो न्यायपन क काम क कारण नी, जो हामु ने आप कर्या, पर आपसी दया क लारे नवलो जनमक स्नान आरू चुखलो आत्मा क हामु नवलो बनावने क द्वारा होया। जिनाक त्यो हामरे उध्दारकरता ईशु मसीह क द्वारा हामु पर खुबुत् रेड़। जिना छे हामु ओका फोकटन दया छे न्यायी ठेरीन,
अमरकाय जीवन की आश क लारे वारीस बने।
यी वात सची छे, आरू हाव जूवता छे कि तु इन वात क विषय मा ढृढ़ता छे बुले एरकरीन की जिन्होने यहोवा–भगवान पर विश्वास कर्या छे, वो भले भले काम मा लागे रोवने क ध्यान राखे। यी वात भली आरू मानुस क लाभ करी छे। पर मुर्खता क विवाद, आरू वंशावड़ी आरू विरोध आरू झगड़ा छे जो व्यवस्था क विषय मा होय, वाच रोव; काहकि वो निष्फल आरू व्यर्थ छे। काही पाखंडी क एक दुय बार समझा बुझाड़ीन ओका सी अलग रोव। यो जानीन की ओसो मानुस भटक गया छे, आरू आपने आप क दोषी ठेरीन पाप करता रोवता छे।
व्यक्तिगत निर्देश आरू नमस्कार
जव हाव साथे अरतिमास या तुखिकुस क मुकल्या तो मारे साथे निकुपुलिस आवने क कोशिष करने, काहकि हाव ने चो जाड़े काटने क छाचो कर्या छे। 2जेनास व्यवस्थापक आरू अपुल्लोस क यत्न करीन ओगव पुचाड़ देय, आरू देख की तीनुक काही समान की घटी नी हुयने देखछे। हामरा मानसे भी जरूरत क पूरा करने क करता वारला काम मा लागे रोवने सीखे ताकि निष्फल नी रोवे।
मारा सब साथी क तुखे नमस्कार। जो विश्वास क कारण हामु छे प्रेम राखता छे, उनको नमस्कार।
तुमू सब पर फोकटन दया हुयसे रोवे।
Source notes (2)
- Cross-reference प्रेरितन 20:4; इफिसियो 6:21,22; कुलुस्सियो 4:7,8; 2 तीमुथियुस 4:12
- Cross-reference प्रेरितन 18:24; 1 कुरन्थियो 16:12
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.