गिनती 5

वीटोळ मानसो क बाहर कोरनो

1ओळतेन योहोवा न मूसा सी कोयो, 2इसराएलियो क हुकुम आप्यो, कि त्या सब कुढ़ावा क , आरू जतरा सफेद पानीन बिमारी होय, आरू जोतरा धड़न कारन वीटोळ होय, हेनू सब क टुळा सी निकाळ देये; 3ओसो चाहे मानुस होय, चाहे बाई , छावनी सी निकाळिन खोयड़े कोर दे; काहिय ओसो नी होये की तुमरी छावनी, जेरे बिच मा रोहु, हेरे कारण वीटोळ होय जाय। 4आरू इसराएलिया हसात करिया , यानी ओसो मानसो क छावनी सी निकळीन खोयड़े कोर देदा; जोसो योहोवा न मूसा सि कोयो हुतो त्या हसात् करिया।

गुनान क हानि भोरने क विधी

5ओळतेन योहोवा न मूसा सी कोयो, 6“इसराएलियो सि कोयो की जोत्यार मानसे एने बाई ओसो काइ पाप कोरे जे मानसे कोर्या कोरे छे योहोवा सि विश्वासघात कोरे, आरू हुये मानुस गुनावु होये, 7ती हुये आपना कोरला पाप मान ले; आरू पुरी हानीन भोरपाय मा पाचवो अंश बोढ़ाविन आपना गुना क बोदले मा हेना क आपे, जेरे वाराम गुनावु होयलु होय। 8बाखुन काहमाईन हेना मानुस क काई कुटुम्बी नी होय जेको गुणान बोदला भोर देदो जाय, ती हेना गुना क जो बोदलो योहोवा क भोर देदो जाय हुयो पुजारान क होय, आरू हुये हेना पछतावो वाळा मेढ़ा सी जादा होय जेरेसी ओका लिय पछतावो कोर्यो जाय1। 9आरू जतरी चुखी करली चिजोन क इसराएलियान लारे खास भेंट करीन पुजारान क पास लावे, त्यो हेकोत रये; 10सब मनुसोन चुखी हयली चिजोन क पुजारान कहवाये; कोय जो काहय पुजारन क आपे त्यो हेको कोहाये।”

व्यभिचार क जाँच

11ओळतेन योहोवा न मूसा सि कोयो, 12इसराएलियो सी कोयो, कि काहमाईन कुदा मानसो क बायोर भुंडी चाल चाले हेरेमा विश्वासघात कोरे, 13आरू काइ मानुस ओका सात कुकर्म कोरे, बाखुन हुये वात हेरा घोरवाळा सी सातायली होय आरू खुली नि होय, आरू हुये वीटोळ होय गोय, बाखुन नी ते ओका विरूद्ध कोरे साक्षी होय, आरू नी कुकर्म कोरत धोराय गोय होय; 14कदाम अदमीक हेकी बायर पर शंका हुय जाय, काहकी बायर आपसुत् वीटोळ हुय गयी, या अदमी क आपसी बायर पर रीस करने लाग जाय, जसो कि शंका हुय जाय, पुन बायर आपसत् वीटोळ नी हुयी; 15ती त्यो मनुस आपसी बायोर क पुजारान क पास ली जाय, आरू हेके वाटे एक एपान क दसवो2 वाटो जौ न मैयदो चढावो कोरीन ली आवे; पुन हेका पोर तेल नी रेड़, आरू नी लोबान मेके, काहकी हुये जलनेवाळा आरू फोम देवाड़नेवाळा, यानी अधोरम क फोम कोरनेवाळा अन्नभेंट होयसे। 16ती पुजारो हेनी बायर क ली जाईन योहोवान अगोळ उबो करे; 17तव पुजारो धुळान ठिकरा मा चुखलो पानी ली लेय आरू तम्बू न धरती परून धुळा मा सी काईन लीन हेर पोर नाख देये। 18ती पुजारो हेनी बाई क योहोवा क ओगोळ उबो कोरीन हेरा मुनका क झोटा खोळ्ळे, आरू फोम देवाड़नेवाळा अन्नबलि क जो जलनेवाळा छे ओका हातो पोर मेक दे। आरू आपना हात मा याजक कड़वो जळ लेदलो रोहे शराप लागने क कारण होयसे। 19ती पुजारो बाई क शपथ खावाड़ीन कोहे, की काहमाईन कुदा मानुस न तार सी कुकर्म नी कोर्यो होय, आरू तू धेनी क छुड़िन दिसरा भिनी फीरीन वीटोळ नी होय गोय होय, ती तू एना कोड़वा जळ क गुण सी जो शराप क कारण होये छे वाच रोहे। 20बाखुन काहमाईन तू आपना धेनी क छुड़ीन दिसरा भिनी फिरीन वीटोळ होयली होय, आरू तारा धेनी क छुड़ीन कुदा दिसरा मानुस न तारसी प्रंसग कोर्यो होय, 21(आरू पुजारो हेना शराप आपनेवाळी शपथ खावाड़िन कोहे,योहोवा तारा कुखोक सड़ावे आरू तारो पेट फुलाड़े, आरू मानसे तारा नाव लिन शराप आरू धिक्कार आप्या कोरे; 22यानी हुये जळ जो शराप क कारण होये छे तारा आतड़ा मा जाईन तारा पेट क फुलाड़े, आरू तारा सातळा क सोड़ाय देये।ती हुयि बायोर कोहै, आमीन, आमीन। 23ती पुजारो शराप क ये बुले किताब मा लिखिन हेना कोड़वा जळ सी बुरवीन, 24हेनी बायोर क हेना कड़वा जळ क पावे जो शराप क कारण होये छे, आरू हुये जळ जो सोराप क कारण होयसे हेनी बायोर क पेट मा जाईन कड़वा होय जासे। 25आरू पुजारो बायोर क हात रयीन जलनेवाळा अन्नभेंट क लिन योहोवा क ओगोळ हालविन बेदी क धोड़े पुगाड़े; 26आरू पुजारो हेना अन्नबलि मासी हेनाक फोम आपनेवाळा वाटा, यानी मुठ भोरीन लीन वेदी पोर धोपाड़े, आरू ओका वाद बायोर क हेना जळ क पावे। 27आरू जब हुयी जळ क पायब देये, ती काहमाईन हुयी वीटोळ होयली होय आरू आपसा धेनी सी विश्वासघात कोरी होय, ती हुयी हळ ज शराप क कारण होये छे हेनी बायोर क पेट मा जाईन कोड़वो होय जासे, आरू ओको पेट फुग जासे, आरू ओका सातळा सोड़ने लागसे, आरू ओको बायर क नाव हेनू मानसो क विच सोरापवाळौ होयसे। 28बाकून काहमाईन हुयी बायोर वीटोळ नी हयली हय आरू चुखलीत होय, ती हुयी गुनावी नी कोहायसे आरू गर्भिणी होय सोकसे। 29“रीसन नियम योत छे,चाहय कोय बायोर आपसा धेनी क छु़ड़ीन दिसरा क भिनी जाईन वीटोळ होय, 30चाहय मानुस क मन मा घाड़ाय पयदा हुये आरू हेनी बायोर पर जलन राखने लागे; ती त्यो हेनीक योहोवान सामने उबो कर देय, आरू पुजारो हेनी पर यी आखी व्यवस्था पुरी कोरे। 31ती मानुस अधोरम सि वाचलो रोहसे, आरू बायोर आपना अधोरम क भार आपसी चुटसे।”