Dhankavi Bible
लैव्यव्यवस्था नी कीताब 9
हारून द्वारा बलि-अर्पण
आठवे दाहड़े मूसु हारून आरू ओकान पोर्या क आरू इसराएली डाहला क बुलावीन हारून सी कयो, “पापबलि क करता एक आरगो गाडरा लीन योहोवा क सामने भेट चढ़ा। आरू इसराएली सी यो कोय, तुमु पापबलि क करता एक बुकड़ो, आरू होमबलि क करता एक केवड़ो आरू एक गाडरा क बच्चो लेवु, जो एक सालन होय आरू पूरो आरगो होसे, आरू मेलबलि क करता योहोवा क सामने चढ़ावने क करता एक बयल्यो आरू एक गाडरो, आरू तेल करीन झारलो होयो मयदा क एक अनाज भेंट भी ली लेवु; काहकी आज योहोवा तुमु क दर्शन देसे।” आरू जेका जेका चीज क हुकुम मूसु देदु उना सब क चा मिलापवाळा तम्बू क ओगव ली आया; आरू सब मण्डली सामने जाईन योहोवा क सामने उबा होया। तव मूसु कयो, “यो काम छे जेका करने क करता योहोवा हुकुम देदो छे की तुमु उकाह करू; आरू योहोवान महिमा तुमु क दुखाई पड़से।” तव मूसु हारून सी कयो, “योहोवा क हुकुम क अनसारे वेदी क सामने जाईन आपना पापबलि आरू होमबलि क चढ़ावीन आपना आरू सब जनता क करता पश्चाताप कर; आरू जनता क चढ़ावा क भी चढ़ावीन उनाक करता पश्चाताप कर।”
एरकरता हारून वेदीक सामने जाईन आपना पापबलि क केवड़ा क बलिदान कर्या। आरू हारून क पोर्यो लुहूय क ओकान जु ली गोया, तव ओको आपनी आंगवी क लुहूय मा डुबाड़ीन वेदी क सिंगड़ा पर लुहूय क लागाड्या,अ आरू शेष लुहूय क वेदी क पाय पर रेड़ देदा; आरू पापबलि माहयली चरबो आरू गुर्दो आरू कावजा परली झिल्ली क ओकान वेदी पर धोपाड्या, जोसो योहोवा मूसा क हुकुम देदी हती। आरू मांस आरू खाल क ओकान पड़ाव सी बाहरते आग्ठा मा धोपाड्या।
तव होमबलिपशु क बलिदान कर्या; आरू हारून क पोर्या क लुहूय क ओकान हाथ मा आप्या, आरू ओको उकाह वेदी पर चार तरफ छिड़की देदा। तव हेका होमबलिपशु क टुकड़ा टुकड़ा करीन मुनका सहित ओकान हाथ मा आप देदा आरू ओकान उनाक वेदी पर धोपाड़ देदा। आरू ओकान आतड़िया आरू पायोक धुवीन वेदी पर होमबलि क ऊपर धोपाड्या।
तव ओका लोगहन क चढ़ावा क ओगव लीन आरू ओका पापबलि क बुकड़ा क जा उनाक करता हता लीन ओकान बलिदान कर्या, आरू पेहेल समान उकाह भी पापबलि करीन चढ़ाया। आरू ओको होमबलि क भी सामने ली जाईन विधि क अनसारे चढ़ाया। आरू अन्नबलि क भी सामने ली जाईन ओकामा सी मुठ भरीन वेदी पर धोपाड्या, यो भोर क होमबलि क बिना चढ़ायो गोयो।
बयल्यो आरू गाडरा, मतलब जु मेलबलिपशु, जनता क करता हता चा भी बलि कर्या गोया; आरू हारूनक पोर्यो लुहूय क ओकान हाथ मा आप देदा, आरू उको उकाह वेदी पर चार तरफ छिड़की देदो; आरू हेका बयल्यान चरबी क, आरू गाडरा मा सी चरबी वाळी छेमटी क, आरू जेकी चरबी सी आतड़िया ढाकली रवती छे ओकान, आरू गुर्दो समेत कावजा परली झिल्ली क भी ओकान हाथ मा आप्या; आरू हेका चरबा क छाती पर मेक्या; आरू ओको चो चरबो पर धोपाड्या, पुन छाति आरू डाखर्यो जाँघ क हारून मूसा क हुकुम क अनसारे हालळनेन क भेंट क करता योहोवा क सामने हालळीयो।
तव हारून क लोगहन क तरफ हाथ बढ़ावीन हेका सय बोरकोत देदा; आरू पापबलि, होमबलि, आरू मेलबलि क चढ़ावीन चो नेड़ो उतरी आयो। तव मूसु आरू हारून मिलापवाळा तम्बू मा गोया, आरू निकाळीन लोगहन क सय बोरकोत देदा; तव योहोवा न महिमा सब जनता क दिखाय देदो। आरू योहोवा क सामने सी आगठो निकळे आरू चरबा समेत होमबलि क वेदी पर भस्म कर देदा; ओका देखिन जनता जय जयकार क नारा लागाड्या आरू आपना आपना मुहय क बुरसे पड़ीन दण्डवत् प्रणाम कर्या।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.