लैव्यव्यवस्था नी कीताब 22

चढ़ावान पवित्रता

1पछु योहोवा मूसा सी कया, 2हारून आरू ओकान पोर्‍या सी कया की इसराएलियाक चुखी होई चीज सी जेका चो मार करता पवित्र करता छे अलग रया, आरू मारा पवित्र नावन वीटोळ नी करे; हाव योहोवा छे। 3आरू उना सी कय की तुमरी पीढ़ी पीढ़ी मा तुमरे सब वंश मा सी जो कुई आपनी अशुद्धता की दशा मा उना चुखी होई चीजक जु जाए, जेका इसराएली योहोवाक पवित्र करता छे, चो प्राणी मार सामने सी नाश कर्‍या जासे; हाव योहोवा छे।

4हारूनक वंश मा सी कुई काह नी होसे जो कोढ़ी होसे, या ओकान सफेदपाणी होसे, चो मानुस जव तक शुद्ध नी होसे जाए तव तक पवित्र होई चीज मा सी काहय नी खाए। जो लोथक कारण अशुद्ध होसे, या जेका वीर्य स्खलित होयो होसे, ओसो मानुसक जो कुई हाथ लागाड़े, 5आरू जो कुई काहनी ओसो रेंगनेहारे जन्तुक हाथ लागाड़े जेका सी लोगहन अशुद्ध होय सकता छे, या काहना ओसा मनुस क हाथ लागाड़े जेका मा काहना प्रकारन अशुद्धता होसे जो ओकाह भी लाग सकती छे 6ते चो प्राणी जो इनामा सी काहनाक हाथ लागाड़े सांजु तक अशुद्ध ठरल रवे, आरू जव तक जल सी स्नान नी करले तव तक पवित्र चीज मा सी काहय नी खाए। 7तव दाहड़ो बुडनेक होयने पर चो शुद्ध ठरसे; आरू तव चो पवित्र चीज मा सी खाय सक छे, काहकी ओकान खानो चो छे। 8जो जनावर आपने आपसु सी मरलो होसे या जंगली पशु सी फावड़ो गयो होसे उका खाईन चो आपने आपसुक अशुद्ध नी करे; हाव योहोवा छे। 9एरकरता याजक लोगहन म्हारा आपला नियमनमन पालन करे, ओसो नी होय की चा उनाक वीटोळ करीन पापन भार उठायो, आरू ओका कारण मर भी जाए; हाव ओकान चुखो करनेवाळु योहोवा छे।

10“पराया कुलक जन काहना पवित्र चीजक नी खानु जुवे, चाहे चु याजक क पाहन्‍तरीयो होसे या मजदुर होसे, तौभी चा कुई पवित्र चीज नी खाए। 11कदाम याजक काहना प्राणी ओकामा सी खाय सकता छे; आरू जु याजकक घर मा पयदा होये होसे चा भी ओकान खाना मा सी खाए। 12कदाम याजकक पोराय पराया कुलक काहना मानसो सी हियाव वाळी होसे, ते ची भेंटक होई पवित्र चीज मा सी नी खाए। 13कदाम याजकक पोराय विधवा या त्यागी होई होसे, आरू ओकान सन्तान नी होसे, आरू ची आपनी बाल्यावस्थाक रीतीक अनसारे आपना बासक घर मा रयती होसे, ते ची आपना बासन खाना मा सी खाए; पुन पराया कुलक एकदो ओकामा सी नी खाय नी सके। 14आरू कदाम एकदो मानुस काहना पवित्र चीज मा सी कहाय विसरीन काय जासे, ते चो ओकान पाचवो भाग बढ़ावीन उका याजक क भर दे। 15चा इसराएलियाक पवित्र करली होई चीजक, जेका चा योहोवाक करता चढ़ाया, वीटोळ नी करे। 16चा ओका आपनी पवित्र चीज मा सी खावाढ़ीन ओका सी अपराधक दोष नी उठाड्या; हाव ओकान चुखो करनेवाळु योहोवा छे।”

17पछु योहोवा मूसा सी कयो, 18“हारून आरू ओकान पोर्‍या सी आरू इसराएलिया सी समझाळीन कया की इसराएलक घराना या इसराएल मा रयनेवाळा परदशिया मा सी एकदो काह नी होए जु मानता या स्वेच्छाबलि करनेक करता योहोवाक कुई होमबलि चढ़ाया, 19ते आपना निमित्त ग्रहणयोग्य ठरनेक करता बुयल या गाडरा या बुकड़ा मा सी आरेगलो नर चढ़ायो जासे। 20जेका मा कुई भी दोष होय हेको नी चढ़ावनो; काहकी त्यो तुमरे जुगू मानने सारको नी रयसे। 21आरू जु कुई बुयल या गाडरा-बुकड़ा मा सी स्वेच्छाबलिन करता योहोवाक मेलबलि चढ़ाया, ते ग्रहण होयनेन करता पाको छे की चो आरेगलो होय, ओकामा कुई भी दोष नी होय। 22जु आंधवो या डिलन टुटलो या लुल्लो होसे, अथवा हेकामा रसौली या खवड़ा या खुजली होसे, ओसाक योहोवाक करता नी चढ़ावनु, ओकाक वेदी पर योहोवान करता हव्य नी चढ़ावनु। 23जेका काहनो बयल्यो या गाडराक कुई डिल जास्ती या कम मोटलो होसे ओकाह स्वेच्छाबलिन करता चढ़ाव सकता छे, पुन मन्नत पूरी करनेन करता चो ग्रहण नी होयसे। 24जेका आंडा दाबायला या कुचनाया या टूटला या काटला गया होसे ओका योहोवाक करता नी चढ़ावनु, आरू आपना देश मा भी ओसो काम नी करनु। 25इकामा सी काहनाक तुमु आपनो परमेश्वरन खानो जानीन एकदा परदेशी सी लीन नी चढ़ावु; काहकी ओकामा ओकान दोष छे, ओकामा दोष छे, एरकरता चो तुमरे निमित्त ग्रहण नी होसे।”

26पछु योहोवा मूसा सी कयो, 27“जव केवढ़ाक या गाडराक या बुकड़ान बच्चा सी पयदा होय, ते चो सात दाहड़े तक आपनी आयाक साथे रये; पछा आठवे दाहड़े सी ओगव चो योहोवाक भेंटन करता ग्रहणयोग्य ठरसे। 28चाहे केवढ़ी, चाहे गाडरा या बुकड़ा होये, ओकाक आरू बच्चाक एकुज दाहड़ा मा बलि नी करनु। 29आरू जव तुमु योहोवान करता धन्यवादन मेलमिलाप बलि चढ़ावु, ते उनी रीति सी करनु जेका सी चो ग्रहणयोग्य ठरसे। 30चा ओके दाहड़े खाये जासे, ओकामा सी काहय भी सोंदारे तक रयनु नी जुवे; हाव योहोवा छे।

31“एरकरता तुमु मारी हुकुमोन माननु आरू ओकान पालन करनु; हाव योहोवा छे। 32आरू मारा चुखो नाव वीटोळ नी ठरनु, काहकी हाव इसराएलियाक वीच मा पाको पवित्र माने जासे; काहकी हाव तुमरो चुखो करनेवाळु यहोवा छे, 33जा तुमुक मिस्र देश सी निकाळ लाया, जेका सी तुमरो परमेश्वर बवनु रवे; हाव योहोवा छे।”