Dhankavi Bible
यहोसु 5
इसराएलीयान क खतना करनो आरु फसह माननु
जव यरदन क पश्चीम क तरफ रतने वाळा एमोरीया क सब राजा, आरु दरीया साथे रयनर वाळा कनानिया क सब राजा यो सोमव्या, की योहोवा भगवान इसराएलीया क पार होयने तक उकान सामने सी यरदन नदीन पाणी हटाकर सुखलो राखलो छे, तव इसराएलीया क डरन कारण मन हरबड़ाय गयो, आरु उना क जीव मा जीव नी रयु।
उना टेमे योहोवा भगवान योहोसु सी कयो, “चकमक सी छुरीया बनावीन दिसरी वार इसराएलीया क खतना कराव दे।” तव योहोसु चकमक क छुरीया बनावीन खलड़िया नावन टीले पर इसराएलीया क खतना कराया। आरु योहोसु जो खतना करायु, ओका कारण यो छे, की जोतरा युद्ध क योग्य मानसे मिसर सी निकळ्या हता चा सब मिसर सी निकळने पर जंगल क रस्ता पर मर गया हता। जा मानसे मिसर सी निकळया हता उना सब क खतना होय गया हता, पुन जोतरा उनाक मिसर सी निकळ ने पर जंगकन मार्ग मा पयदा हुया उना मा सी कुनीन नी खतना होयो हतो। 1काहकी इसराएलीया ते चालीस साल तक जंगल मा फिरता रया, जव तक उकान सब जाती क लोगहन, मतलब जोतरा युद्ध क योग्य लोगहन मिसर सी निकळ्या चा खतम नी होय गया, काहकी हेको योहोवा भगवान नी मानी हती; एरकरता योहोवा भगवान शपथ खाईन उनाक कयो हतो, आरु उकामा दुध आरु माखान धार वयती छे, चो देश हाव तुमुक नी देखाड़ने। ते उना लोगहन क पोर्यो जेका योहोवा भगवान उकाम जागा पर पयदा कर्या हता, उकान खतना योहोसु सी कराया, काहकी रस्ता मा उकान फातोरकाती नी होयने क कारण चा खतनारहित हता। आरु जव उका सब जाती क लोगहन क खतना होय गयो, तव चा आरगाय होय जाने तक आपना आपना जागा पर छावनी मा रया। तव योहोवा भगवान योहोसु सी कयो, “तुमरी नामधराई जी मिसरीया मा होई छे उका हाव आज सेठु कर्यु छे।” एर कारण उका जागा क नाव आजुन दाहड़े तक गिलगाल पड़्या छे। 2
एरकरता इसराएलीया गिलगाल मा डेरा नाखला रवे, आरु हेको योरीहोन मैदान मा मयनान चोवदवे दाहड़े सांतेन टेमे फसहन तीवार वाळीया। आरु तीवार क दिसरे दाहड़े चा उका देश क कमाय मा सी अखमीरी रोटो आरु उके दाहड़े सी भुंजला दाना भी खाने लाग्या। 3आरु जेका दाहड़े चा उका देश क कमाय मा सी खाने लाग्या, उना दाहड़े सबेरे क मन्ना बंद होय गया; आरु इसराएलीया क ओगव पछा कभी नी जोड्यो, पुन उके साल हेकोने कनान देशन कमाय मा सी खादा।
योहोसु आरु तलवार लीन एक मनुस
जव योहोसु योरीहो क जु हतो तव उको आपना डुवा उठाव्या, आरु काय देख्या, की हाथ मा नंगी तलवार लीन एक मानुस सामने उभु छे; आरु योहोसु उकान जु जाईन पुछा, “काय तु आमरे तरफ सी छे, या आमरा बैरीया तरफ का?” तव उकाह उत्तर देदु, हांव कुदा वोवकु नी होय। हांव पोरबुन सेनान मुखी छे आरु हेमी यां आवलु छे। योहोसु तोत्यारुत् नेचु पोड़ीन हेनाक वांद्यु आरु हेरेसी पुछ्यु, “मालीन, मेस पावोर जुगु तारो काय हुकुम छे?” योहोवा क सेनिक क प्रधान योहोसु सी कयो, “आपना खासड़ा पायम सी उतार नाख, काहकी जीन जागा पर तु उबा छे चा चुखली छे।” तव योहोसु तोसुज कर्या।
Source notes (3)
- Footnote गिनती 14:28-35
- Cross-reference नीरगमन 12:1-13
- Footnote निर्गमन 16:35
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.