Dhankavi Bible
यहोसु 12
मुसा द्वारा पराजीत राजा
यरदन पार सुर्यदयक तरफ, मतलब अर्नान घाटी सी लीन अर्नोन बोयड़ा तक देश, आरु सब पुर्वी अराबाक जीन राजाक इसराएलीया मारीन ओकान देशक आपना होक मा कर लेदा हता चा या छे: एमोरीयाक हेशबोनवासी राजा सीहोन, जा अर्नान घाटीक कीनाराक अरोएर सी लीन, आरु उका घाटीक वीच माहयला नगरक छुड़ीन यब्बोक नदी तक, जा अम्मोनिया क सीमा छे, आदा गिलाद पर, आरु कीन्नेरेत नावन ताल सी लीन बेत्यशीमोत सी होईन अराबाक ताल तक; जो खारो ताल भी कयाड़तो छे, पुर्वक तरफ अराबा, आरु दक्षिणक तरफ पिसगाक ढलान क नेड़ला देश पर पोरबुता राखता हता। पछा वाचला होया रपाया मा सी बासान क राजा ओगक देश हतो, जो अशतारोत आरु एद्रेई मा रया करता हता, आरु हेर्मोन बोयड़ा, सलका, आरु गशुरीया, आरु माकीयाक सीमा तक कुल बासान मा, आरु हेशबोनक राजा सीहोन क सीमा तक आदा गिलाद मा भी पोरबुता करता हता, इसराएलीया आरु योहोवाक दास मुसा इनुक मार लेदु; आरु योहोवाक दास मुसा ओका देश रुबेनिया आरु गादिया आरु मनश्शे क आदा गोत्रा क लोगहन क आप देदा।
योहोसु द्वारा पराजीत राजा
यरदन क पश्चीमक तरफ, लबानोन क मैदान मा बालगाद सी लीन सेईरक चढ़ाईन हालाक पहाड़ तक देशक जीन राजान योहोसु आरु इसराएलीया मारीन उनाक देश इसराएलीयाक गोत्रा आरु कुलोक अनसारे डासीन आप देदा हता चा या छे: हित्ती, आरु एमोरी, आरु कनानी, आरु परीज्जी, आरु हिब्बी, आरु यबुसी, जा पहाड़ी देश मा, आरु नेड़ला देश मा, आरु अराबा मा, आरु ढालु देश मा, आरु जंगल मा, आरु दोखेवरे देश मा रयता हता। एक, योरीहो क राजा; एक, बेतेल क जु ऐ क राजा; एक, योरुसालेम क राजो; एक, हेब्रोन क राजा; एक, यर्मुत क राजा; एक, लाकीश क राजा; एक, एग्लोन क राजा; एक, गेजेर क राजा; एक, दबीर क राजा; एक, गेदेर क राजा; एक, होर्मा क राजा; एक, अराद क राजा; एक, लीब्ना क राजा; एक अदुल्लाम क राजा; एक, मक्केदा क राजा; एक, बेतेल क राजा; एक, तप्पुह क राजा; एक, हेपेर क राजा; एक, अपेक क राजा; एक, लश्शारोन क राजा; एक, मादोन क राजा; एक, हासोर ज राजा; एक, शिम्रोरोन क राजा; एक, अक्षाप क राजा; एक, तानाक क राजा; एक, मगिद्दो क राजा; एक, केदेश क राजा; एक, कार्मेल माहयन योकनाम क राजा; एक, दोर नावन उँचला देश मा दोर क राजा; एक, गिलगाल मा क गोयीम क राजा; आरु एक, तिर्सा क राजा छे; ओका प्रकार सब राजा इकतीस होया।
Source notes (1)
- Cross-reference गिनती 21:21-35; व्यवस्थाविवरण 2:26; 3:11
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.