योना नी कीताब 3

योना हुकुम क माननो

1तव योहोवा न यो वचन डिसरी वार योना क पास मा पुगीयो; 2उठ उना बड़ा शहर नीनवे भेणी जा, आरु जो वात हांव थार सी कयीस, हेको उना मा परचार कर। 3तव योना योहोवा न बुलन अनसारे नीनवे भेणी गयो। नीनवे एक बेसको मोटो सोहोर होतो, नीनवे सोहोर मा फीरने कोरीन तीन दाहड़ा लाग्या। 4योना सोहोरम भोराईन एक दाहड़ान वाट पुरी कोर्‌यु, आरु यो पोरचार कोरतु गोयु, “हेमी गोथा चावीस दाहड़ा वीत जासे नीनवे काजे नास कोर देसे।” 5तव नीनवेन लोगहन परमेश्वरन बुलन भुरसु करीया; आरु उपासन परचार हुयो आरु मोटला गोथा नानला लोगुन आखा गोन्टा पांगरीया। 6तव यी खोबोर नीनवेन राजान काने लागी; आरु चु राजगादी पोर गोथु उठीन आपसा राजान छिन्दरा निकावीन गोन्टो पान्गरी लेदु, आरु रुखड़ा पोर बोठ गोयु। 7राजा मुखीन वात लीन नीनवे मा इनी हुकुमोन डोन्डी पीटाड़ देदु “काय मानुस, काय गाय बुईल, काय गाडरा-बुकड़ा, एने दिसरा ढुरे, कुदु काय वी नी खाय, चे नी खाय आरु नी पानी पीये।” 8मानसे आरु ढुरे दुयु गोन्टा पान्गरे, आरु चे परमेश्वर सी वीनता रोड़-रोड़ीन कोरे; आरु आपसा गोलोत वाट गोथा फीरे; आरु तीनु लोड़ाय सी, जे चे कोरता होय, पोसतावु कोरे। 9होय ती, परमेश्वर गीन कोरे आरु आपसी मोरजी बोदली देये, आरु तेरी भोड़ेकली रीस धीरी पोड़ जाय आरु हामु नास होयने सी वाच जाजे 10जोत्यार परमेश्वर हेन्दरा कामोक देख्यु, की चे भुन्डली वाट सी फिर रोया, ती परमेश्वर आपसी मोरजी बोदली देदु, आरु हेन्दरो जो नुकसानी कोरने नोक्‌खी कोरलु, चो नी कोर्‌यु।