Dhankavi Bible
यहुन्ना 17
ईशुन डाहला पुजारान प्रार्थना: खुदन करता
ईशु यी वात कयो आरू थार डुवा आकाश तरफ उठावीन कयो, “हे बास, ची घड़ी आव पुगी छे; आपसा पोर्या महिमा कर कि पोर्य भी तारी महिमा करे, काहकि तु ओका सी सब मानसो पर हक देदु, कि जीनुक तु ओका सी देदु छे तीनु सबह त्यो अमरकाय जीवन आपे। आरू अमरकाय जीवन यो छे कि चाँ तुखे एकुत् सच्चा यहोवा–भगवान काजे आरू ईशु मसीह काजे, जीनाक तु मोकल्या छे, जाने। जो काम तु मखे करने काजे देदु हतु, उका पूरो करीन हाव धरती पर तारी महिमा कर्यु छे। हिमी हे बास, तु आपने साथे मारी महिमा उका महिमा छे कर जी जगतन सृष्टिन पेहल, मारी तार साथे हती।
“हाव ते तारो नाव चाँ मानसो पर प्रकट कर्यु छे जीनाक तु जगत मा रईन मखे देदु। चाँ तारा हता आरू तु हेको मखे देदु, आरू चाँ तारो वचन काजे मान लेदा छे। हिमी चाँ जान गया छे कि जो काहय तु मखे देदु छे चो सब तार तरफ छे; काहकि जो वचन तु मखे देदु, आरू चाँ ओका सी मान्य कर्यु, आरू सच सच जान लेदु छे कि हाव तार तरफ रईन आयु छे, आरू विश्वास कर लेदु छे कि तुच मखे मकल्यु। हाव ओको करता रावन्या करतु छे; संसारन करता रावन्या नी करतु पुन ओको करता जीनुक तु मखे देदु छे, काहकि चाँ तारा छे; आरू जो काहय मारो छे चो सब तारो छे, आरू जो तारो छे चो सब मारो छे, आरू ओका सी मारी महिमा प्रगट होईली छे। हाव हिमी जगत मा नी रयो, पुन या जग मा रयछे, आरू हाव तार जु आवतु छे। हे चुखलो बास, आपसा ओको नाम छे जो तु मखे देदु छे, ओको रक्षा करीन चाँ हामरे समान एक हुयो। जब हाव ओको साथे हतु, ते हाव तार ओको नाम छे, जो तु मखे देदु छे ओको रक्षा कर्यु। हाव ओको पूस तास कर्यु, आरू विनाशन पोर्या काजे छुड़ ओकामा रईन कोय नष्ट नी होया, एरकरीन कि चुखलो शास्त्र मा जो कयो गयो चो पूरो हुयो। हिमी हाव तार जु आवतु छे, आरू यी वात जगमा कयतु छे, कि चो मारो खुशी आपसु मा पूरो जड़से। हाव तारो वचन हेको पुगाड़ देदु छे; आरू संसार उकासे बैर कर्या, काहकि जोसो हाव संसारन नी, तोसाज चाँ भी संसारन नी। हाव यी रावन्या नी करता कि तु हेको जगत रईन उठाव ले; पुन यो कि तु हेको ओको शैतान रईन बचाढ़ीन राखे। जोसो हाव संसारन नी, तोसाज चाँ भी संसारन नी। सच्चाई द्वारा हेको चुखलो कर: तार वचन सच्चाई छे। जोसो तु मखे जगत मा मकल्यु, तोसोज हाव भी हेको जगत मा मकल्यु; आरू ओको करता हाव आपने आपसु चुखलो करतु छे, ताकि चाँ भी सच्चाई द्वारा चुखलो कर्या जाछे।
“हाव केवल हेकोन करता रावन्या नी करता, पुन ओको करता भी जो ओको वचन क द्वारा मखे पर विश्वास करसु, क चाँ सब होय; जोसो तु छे बास मखे मा छे, आरू हांव तुखे मा छे, तोसाज चाँ भी हामु मा छे, तोसलाप संसार विश्वास करे कि तुज मखे मकल्यु छे। ची महिमा जी तु मखे देदु हाव हेको देदु छे, कि चाँ तोसाज छे जोसा कि हामु एक छे, हाव ओकामा आरू तु मखे मा कि चाँ सिद्ध होईन एक होय जाछे, आरू संसार जाने कि तुझ मखे मकल्यु, आरू जोसो तु मखे पर मोंग राखे तोसोज उकासे मोंग राखु। हे न्यायी बास, हाव चाहतु छे कि जीनुक तु मखे देदु छे, जा हाव छे वा चाँ भी मार साथे रोवे, कि चाँ मारी ओको महिमा देखु जो तु मखे देदु छे, काहकि तु जगन उत्पत्ती छे पेहल मखे जु मोंग राख्यु। हे न्यायी बास, संसार मखे नी जान्यु, पुन हाव तुखे जान्यु; आरू चाँ भी जान्या कि तुझ मखे मकल्यु छे। हाव तार नाव ओका सी कयो आरू कयतु रोवी कि जो मोंग तुखेह मखे छे हतो चो ओकामा रोवे, आरू हाव ओकामा रोवे।”
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.