Dhankavi Bible
इब्रानियों 9
पार्थिव तम्बू मा सेवा
ओको पेहली वाचा मा भी सेवा क नियम हुता, आरू ओसो चुखलोस्थान हुता जो इनीये धरती क हुता काहकि एक तम्बू बनायो गयो, पेहल तम्बू मा दीवट, आरू हावज, की रूटा हुता; आरू वो चुखलोस्थान कोवायता छे। दिसरा परदा क पछव वो तम्बू होतो, जो यहोवा–भगवानन चुखलोस्थान कोवायता छे। उनमा सोनो की धूपदानी, आरू चार आरू सोनो छे आरू ढावलो वाचा क सन्दुक आरू इनमा मन्ना छे भराय हुयो सोनो क मर्तवान आरू हारून की लाकड़ी जिनमा फुल आय गयो होतो आरू वाचा की पट्टी होती। अतरान करीन ऊपर दुयू तो तेजोमय करूब हुता, जो प्राश्चाताप क ढाकने पर सहावु कर्या होया हुता; इन्दरो एक एक करीन वर्णन करने क हिमी मेखे नी छे।
यो चीज इनीये रीति छे तीयार होय त्योकी। ओको पेहल तम्बू मा पुजारा हर टेहाव भरायने करीन सेवा क काम सम्पन्न करता छे। पर दिसरा मा केवल डाहला पुजारा साल भर मा एक ही बार जाता छे, आरू बिना लुहूय करता नी जाता; जिनाक वो आपने करता आरू मानसे की भूल चूक क करता चढ़ावता छे। इनीये छे चुखलो आत्मा योही देखाडतो छे कि जव तक पेहल तम्बू उबो छे तक चुखलोस्थान क मार्ग प्रगट नी हुयो। यो तम्बू वर्तमान टेहाव क करता एक सपनो छे; जिनमा ओसी भेंट आरू बलिदान चढ़ावने जाता छे, जिनुछे आराधना करनेवावा क विवेक सिध्द नी होय सकता। काहकि वो केवल खाने पीने की चीज आरू भाति की स्नान विधि क आधार पर शारीरिक नियम छे, जो सुधार क टेहाव तक क करता नियुक्त कामो गयो छे।
यहोवा–भगवान क लुहूय की शक्ति
पुन जव मसीह आवनेवावी वारली वारली चीज क डाहला पुजारा हईन आयो, तो त्यो आरू भी मोटो आरू सिध्द तम्बू छे हईन, जो हात क बनायो हुयो नी मतलब इनीये सृष्टि क नी। आरू बुकड़ो आरू केवड्या क लुहूय यो क द्वारा नी पर आपने ही लुहूय यो क द्वारा, एक ही बार चुखलोस्थान मा भरायने कर्या आरू अमरकाय छुटकारो हासिल कर्या। काहकि जव बुकड़ो आरू बुल्यो क लुहूय यो आरू कलोर क रूखड़ो क विटुळ मानसे पर छाटने सी विटळ डील इनुक चुखलो करे। तो मसीह क लुहूय यो जो आपने आप क अमरकाय आत्मा क द्वारा यहोवा–भगवान क सामने निर्दोष चढ़ावने, तुमरे विवेक क मरला हुयो काम छे काय नी चुखो करसे ताकि तुमू जीवता यहोवा–भगवान की सेवा करू।
इनी कारण वो नोवली वाचा क मध्यस्थ छे, ताकि ओकी मरन क द्वारा जो पेहली वाचा क टेहाव क दोष छे छुटकारो देखने क करता होयी छे, बुलाया होया मानसे प्रतिज्ञा क लारे अमरकाय मीरास क करे।
काहकि वा वाचा बांधीन गयी छे वाँ वाचा बांधनेवावा की मरन क समझ लेने भी पाको छे। काहकि ओसी वाचा मरना पर पाक्की होयती छे, आरू जव तक वाचा बांधनेवावा जीवता रयता छे तव तक वाचा काम की नी होयती। इनी करता पेहली वाचा भी बिना लुहूय क नी बांधीन गयी। काहकि जव मूसा सब मानसे क व्यवस्था की हर एक हुकुम सोमवी त्योक्यो तो त्यो केवड्यो आरू बुकड़ो क लुहूय लीन, पानी आरू रातलो रूई आरू जूफा क साथे, इन किताब पर आरू सब मानसे पर छिड़की दिदा। आरू काँ, “यो उना वाचा लुहूय छे, जेरो हुकुम यहोवा–भगवान ने तुमरे करता देदी छे।” आरू इनी रीति छे त्यो तम्बू आरू सेवा क सब समान पर लुहूय छिड़कीया। सच ती यो छे कि व्यवस्था क लारे प्राय: सब चीज लुहूय क द्वारा चुखो करी जाती छे, आरू बिना लुहूय उहवने न पापन माफ नी।
मसीह क बलिदान द्वारा पाप माफ
अतरान करीन पाको छे कि सोरग मा करी चीज क सारखो रूप इन बलिदान क द्वारा चुखो कर जाय, पर सोरग मा करी चीज स्वय इनु सी वारू बलिदान क द्वारा चुखो करी जाती। काहकि मसीह ने उना हात क बनाय हुयो त्यो चुखलोस्थान मा, जो सच त्यो चुखलो स्थान क नमूना छे, भरायने नी कर्या पर सोरग ही मा भरायने कर्या, ताकि हामरे करता हिमी यहोवा–भगवान क सामने देखाय देय। यो नी कि वो आपने आप क बार बार चढ़ाय, जोसो कि डाहला पुजारा हर साल दिसरा क लुहूय करता चुखलोस्थान मा भरायने कर्या करता छे। नी तो धरती की उबजनो छे लीन ओको बार बार दुःख उठाड़नो पड़तो; पर हिमी युग क आखरी मा वो एक ही बार प्रगट होया छे, ताकि आपने ही बलिदान क द्वारा पाप क दूर कर देय। आरू जोसो मानुस क करता एक बार मरना आरू अतरान करीन बाद न्याय क हुयने नियुक्त छे। तसात् ईशु मसीह भी घण सवटा क पाप क उका पर लेने करीन एक बार बलिदान हयो; आरू जो लोगहन ओकी वाट देखे त्यान क छुटकारा क करता दीसरी बार बिना पाप आपसा पर लेदो हयो देखाय पड़से।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.