Dhankavi Bible
उत्पत्ति 50
याकुब क मौत
तोत्यार युसुफ आपसा बाबा क मुयो पोर पोड़ीन रोड़्यु आरु ओको गुळा देदु। आरु युसुफ न हेनु वैद्यो क, जे हेरा चाखर्या हुता, हुकुम आप्यो की हेर बाबा क धड़ मा आनतर तेल भोर; दीयात वैद्यो न इस्राएल क धड़ मा गोंदायन्यो तेल भोर दियात। आरु ओका चाळीस दाहड़ा पुरा हुया, काहकी जेरा धड़ मा गोंदायन्यो तेल भोर देये, ओको ओतरात दाहड़ा पुरा लागतला छे; आरु मिसरी मानुस ओका लीय सत्तर दाहड़ा लोगुन कलपिया कोरता रोया। जब ओका कलेपणेन क दाहड़ा वीत गोया, ती युसुफ फिरोनन क घोराना क मनुष सी कोहने लाग्या, “काहमाईन तुमरा गिन क निगाह मार पोर होय ती मारी यी खबर फिरोन क सोमवाड़ु, मारु बाबु न यो कोहीन, ‘देख हाऊ मोरने मा छे,’ मेसे यु वायदु खावाड़्यु, ‘जो बिड़ो हांव आपसा जुगु कनान देश मा खुँदाड़लु छे हेना मा तु मेसे धुळु आपजी।’ ओतरान कोरीन हिमि मेसे होंयाँ जाईन मारा बाबा क धुळु आपनेन हुकुम आप, तेर वाद मा पोछू आत रोहीस।” ती फिरोन न कोयो, “जाईन आपसा बाबा क खादला वायदा क ओनसारे ओको धुळु आप।” ओतरान कोरीन युसुफ आपसा बाबा क धुळु आपने क लीय चाल्यो, आरु फिरोन क आखा कामकोरन्या, यानी हेरा घोर क पुरनिया, आरु मिसर देश क आखा पुनिया ओका पुठी चाल्या। आरु युसुफ क गर क आखा मानषे, आरु ओका भाई, आरु ओका बाबा क घोर क आखा मानुस वी पुठी गोया; बाखुन हुये आपस बाळ बोच्चा, आरु गाडरा बुकड़ा, आरु गाय बुईल क गोशेन देश मा छुड़ीन गोया। आरु ओका पुठी घुड़ागाड़ी आरु सोवार गोया, ओस कोरीन भीड़ घोने जोबोर होय गोय। जोत्यार हुये आताद क खलीहान लोगुन, जे यरदन नदी क पार छे, पुग्या, ती होया घोने जोबोर वीलाप कोर्या, आरु युसुफ न आपसा बाबा क लीय सात दाहड़ा क वीलाप कोरायो। आताद क खलीहान मा क वीलाप क देखिन हेना देश क मानुस कनानी न कोया, “यो ते मिसरी क काई घोनो वीलाप होसे।” कोरीन हेना जागा क नाव अबिलमिसरेम पोड़्यो, आरु हुयो यरदन क पार छे।
इस्राएल क पुर्या न ठिक चोत काम कोर्या जोसो हुयो हेनुक हुकुम आप्यो हुतो: यानी हुये ओको कनान देश मा ली जाईन मकपेला क हेनी जागावाळी गुफा मा, जी मम्रे क ओगोळ छे, धुळु आप्या; जेनाक अब्राहम न हित्ती एप्रोन क हात सी ओतरान कोरीन मुले लेदा हुता, की हुये बिड़ा क लीय हेन्दरी वावड़्यु जागु होय। आपसा बाबा क धुळु आपीन युसुफ आपसा भाष्यो आरु हेनु आखा भेळ, जु हेरा बाबा क धुळु आपने क लीय ओका पुठी गोया हुता, मिसर पोछा आया।
भाष्यो क हेमोत आपनो
जब युसुफ क भाईष्यो न देख्या की आमरु बाबु ते मोर गोयलु छे, ती कोहने लाग्या, “कदाचीत् युसुफ हिमी आमरे पोछोळ पोड़े, आरु जोतरी कुहराय हेर सी आपनु कोरला हुता आखा क बोदलो आपने सी लेये।” ओतरान कोरीन हुये युसुफ क पास यो कोय मुकल्या, “तारा बाबा न मोरने सी पेहेल आमुक यो हुकुम आप्यो हुतो, तुमु मानुस युसुफ सु ओस कोरीन कोहजु, की हामु वीनता कोरजे, की तु आपसा भाष्यो क गुना आरु पाप क माफ कोर; हामु तार सी कुहराय कोर्या हुता, बाखुन हिमी आपसा बाबा क परमेश्वर क दासो क गुना माफ कोर” हेन्दरी यी वात सोमळीन युसुफ रोड़ पोड़्यु। आरु ओका भाई आपसात वी ओका ओगोळ नेड़ा पोड़्या, आरु कोया, देख, हामु तारा दास छे। युसुफ न हेनुक कोयु, “मा बीहयु, काय हांव परमेश्वर क जागा पोर छे? बाखुन तुमु मानुस मारे जुगु कुहराय क वीचार कोरला हुता; बाखुन परमेश्वर न हेनी वात मा भोलान वीचार कोर्यो, जेरेसी हुयो ओसो कोरे, जोसे आज क दाहड़े प्रगट छे, की बेस का मानुस क जीव नी वाचलो छे। ओतरान कोरीन हिमी मा बीहयु: हांव तुमरु आरु तुमरा बाळ बोच्चा क पाळन पुषोन कोरतु रोहीस।” ओस कोरीन हेनुक सोमझाड़िन हेमोत आप्यु।
युसुफ क मौत
युसुफ आपसा बाबा क घराना भेळ मिसर मा रोहतु रोयु, आरु युसुफ एक सोव दस साल जीवतलु रोयु। आरु युसुफ एपरेम क परपोता लोगुन क देखने पायो आरु मनश्शे क पोता, जो माकीर क पुर्य हुतो, चे पोयदा हुया आरु युसुफ न हेनुक खुळाम लेदु। युसुफ न आपसा भाष्यो सी कोयु, हांव ते मोरने पोर छे; बाखुन परमेश्वर छाचीन तुमुक फोम राखसे, आरु तुमुक इन देश सी निकाळीन हेना देश मा पुगाड़ देसे, जेनाक आपने क हुयो अब्राहम, इसहाक, आरु याकुब सी वायदु खादलु होतु (इब्रा 11:22) ओळी युसुफ न इसराएलीयो सी कोयो की परमेश्वर छाचीन तुमुक फोम राखसे, हेनुक इना वाराम क वायदु खावाड़्यु, हामु तारा हाड़का क याँ सी हेना देश मा ली जासु (इब्रानियो 11:22) ओस कोरीन युसुफ एक सोव दस साल क होईन मोर गोयो; आरु ओका धड़ मा गोंदायन्यो तेल भोर देदा, आरु हुयो धड़ मिसर मा एक सन्दुक मा मेल देदा।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.