Skip to content
BibleKenya

Dhankavi Bible

उत्पत्ति 46

याकुब क मिसर क लीय जानो

ती इस्राएल आपसो आखो काई लीन बेरसेबा क गोयो, आरु होंया आपसा बाबा इसहाक क परमेश्वर क बलीदान चोड़ायो। ती परमेश्वर न इस्राएल दी रात क दर्शन मा कोयो, “हे याकुब हे याकुब।” हुयो कोयो, “काय हुकुम।” हुयो कोयो, “हांव परमेश्वर तारा बाबा क परमेश्वर छे, तु मिसर मा जाने सी मा बीहये; काहकी हांव तार सी होंयाँ एक मोटी जाती बोनावीस। हांव तारे पुठी पुठी मिसर क चालता छे; आरु हांव तुसे होंयाँ सी ओळी ली आवीस; आरु युसुफ आपसा हातो सी तारा डुळा क बोन्द कोरसे।” ती याकुब बेरसेबा सि चाल्यो; आरु इस्राएल क पुर्या आपसा बाबा याकुब, आरु आपसा बाळ बोच्‌चा, आरु बायरा क हेनु गाड़ीया पर, जे फिरोन न हेन्दरे जुगु ली मुकोल लो हुतो, चोड़ावीन चाल देदा। याकुब आपसा गाडरा बुकड़ा, गाय बुईल, आरु कनान देश मा आपस एकठो कोरला आखा धन क लीन मिसर मा आया। आरु याकुब आपसा बेटा बेटिया, आरु पोता पोती, यानी आपसी ओवलीयाद भोरीन आपसे पुठी मिसर मा ली आयो।

याकुब क सात मा जे इसराएली, यानी हेरा पुर्या, पोता, आदि मिसर मा आया, हेन्दरा नाव ये छे याकुब क मोटलो रुबेन हुतो। आरु रुबेन क पुर्य हनोक, पल्लु, हेस्रोन, आरु कर्म्मी हुता। शिमोन क पुर्या, यमुएल, यामीन, ओहद, याकीन, सोहर, आरु एक कनानी बायोर सी जोनम्यो शाऊल वी हुतो। लेवी क पुर्या गेर्शोन, कहात, आरु मरारी हुता। यहुदा क एर, ओनान, शेला, पेरेस, आरु जेरह नावोन पुर्यु होयु होतु; बाखुन एर आरु ओनान कनान देश मा मोर गोया हुता; आरु पेरेस क पुर्य, हेस्रोन आरु हामुल हुता। इस्साकार क पुर्या, तोला, पुव्वा, योब, आरु शिम्रोन हुता। जबुलुन क पुर्या, सेरेद, एलोन, आरु यहलेल हुता। लीआ क पुर्या जे याकुब सी पद्दनराम मा पोयदा होया हुता, ओका पुर्या पोता येत होता, आरु एरे सी सोटा ओको ओकाज सात एक बेटी दीना क वी जन्म दिदो, याँ लोगुन ते याकुब क आखा ओवलीयाद डेड़ वीस ने तीन मानसे हुया। ओळी गाद क पुर्या, सपोन, हाग्गी, शुनी, एसबोन, एरी, अरोदी, आरु अरेली हुता। आशेर क पुर्या, यिम्ना, यिश्वा, यिश्वी, आरु बरीआ हुता, आरु ओकी बहीन सेरह हुती; आरु बरीआ क पुर्या, हेबेर आरु मल्कीएल हुतो। जील्पा, जेनिक लाबान न आपसी पुराय लीआ क आप्यो हुतो, ओका पुर्या पारी आदी येत हुता; आरु ओका द्वारा याकुब क सुव्वे जीवे पोयदा हुया। ओळी याकुब क घोरवाळी राहेल क पुर्य युसुफ आरु बिन्यामीन हुया। आरु मिसर देश मा ओन क याजक पोतीपेरा क पुराय आसनत सी युसुफ क ये पुर्या पोयदा हुया, याणी मनश्शे आरु एपरेम। बिन्यामीन क पुर्या, बेला, बेकेर, अश्बेल, गेरा, नामान, एही, रोश, मुप्पीम, हुप्पीम, आरु अर्द हुता। राहेल क पुर्या जे याकुब सी पोयदा हुया ओका येत पुर्या हुया; ओका सब पुर्या पारी चोवदे जीवे हुया। ओळी दान क पुर्य हुशीम हुतो। नप्ताली क पुर्याम यहसेल, गुनी, सेसेर, आरु शिल्लेम हुता। बिल्हा, जेनाकक लाबान न आपसी पुराय राहेल क आप्यो हुतो, ओका पुर्या पारी येत हुता; ओका द्वारा याकुब क ओवलीयाद मा सात जीवे हुया। याकुब क निज ओवलीयाद क जे जीवे मिसर आ आया, चे ओका उहड़ीसा क छुड़ीन सब मेळीन छियासठ जीवे हुया। आरु युसुफ क पुर्या, जे मिसर मा हेरेसे पोयदा हुया, चे दुय जोना हुता; ओस कोरीन याकुब क घोराना क जे मानुस मिसर मा आया हुता चे आखा मिळीन सत्तर हुया।

याकुब आरु हेनको घरानो मिसर मा पुगनो

ओळी हुयो यहुदा क आपसे ओगोळ युसुफ क पास मुकली देदो की हुयो ओको गोशेन क वाट देखाड़्या; आरु गोशेन देश मा आयो। ती युसुफ आपसी घुड़ागाड़ी जुपाड़ीन आपसा बाबा इस्राएल सि मीळने कोरीन गोशेन देश क गोयो, आरु हेरेसे मिळने कोरीन हेरे गोळे सी लीपटाय गोया, आरु काईन वार लोगुन ओका गोळा सी लीपटाईन रोड़ता रोया। ती इस्राएल न युसुफ सी कोयो, “हांव हिमी मोरने सी वी खुश छे, काहकी तुसे जीवतलु देख्यु आरु तारो मुय देख लेदु।” ती युसुफ न आपसा भाई सी आरु आपसा बाबा क घोराना सी कोयो, “मे जाईन फिरोन क यो खोबोर आपीस, ‘मारा भाईस आरु मारा बाबा क आखो घोराना क मानषे, जे कनान देश मा रोहता हुता, चे मारे पास आय गोयला छे; आरु हुये मानुस गुवाळ्या छे, काहकी हुये ढुरोक पाळता आवला छे; ओतरान कोरीन हुये आपसा गाडरा बुकड़ा, गाय बुईल, आरु जो काई ओको छे, आखो ली आवला छे।’ जब फिरोन तुमुक बुलावीन पुछे, ‘तुमरो उद्यम काय छे?’ ती यो कोहजु, ‘तारा दास लड़कपन सी लीन आज लोगुन ढुरो क पाळता आया छे, बाखुन आमरा डाहडा वी ओसात कोरता हुता।’ इनासी तुमु गोशेन देश मा रोहने पावसु; काहकी सब गुवाळ्या सी मिसरी मानुस घाड़ाय कोरतला छे।”

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.