उत्पत्ति 4

केन आर हाबिल

1जब आदम आपसी घोरवाळी हेवा क पास गोयो ती होयी भारेपाये होईन केन क जन्म आपी आरु कोयु, “हांवने योहोवा क सहायता सी एक पुर्य क जनम देदो छे।” 2ओळतेन हुयी ओका भाई हाबील क वी जन्म देदी, हाबिल ते गाडरा बुकड़ा क गुळाळ्या बोन गोया, बाखुन केन भुमी क खेती कोरनेवाळो कीरसान बोन्यो। 3थुड़ाक दाहड़ा क वाद केन योहोवा क पास कोळी क उपज मा सी काहीन भेंट ली आयु (यहु 1:11) 4आरु हाबील वी आपसा गाडरा बुकड़ा क काई एक पेहली पयदावारीन पीलान क भेंट चोढ़ावने ली आयो आरु ओकी चोरबी भेंट चोड़ाया; ती योहोवा न हाबिल आरु ओकी भेंट क ते ग्रहण कोर्‌यो, (इब्रा 11:4) 5बाखुन केन आरु ओकी भेंट क हुयो कबुल नी कोर्‌यो। ती केन बेस रीसवाय गोयु, आरु ओका मुयो पोर उदासी छाय गोय। 6ती योहोवा न केन सी कयो, “तु काहा रीसवाय रोयु? आरु तारा मुयो पोर उदासी काहा छाय गोयली छे? 7काहमाईन तु भोलो कोरे, ती काय तारी भेंट ग्रहण न कोरी जासे? आरु काहमाईन तु भोलो नी कोरे, ते पाप झोपला पर छापायलो रोहे, आरु ओकी लालसा तारे भिनी रोहसे, आरु तुखे हेर पोर राज कोरनो छे।” 8ती केन न आपसा भाईस हाबील सी काहीन कोयो; आरु जब हुये खोयड़ा मा हुता, ती केन न आपसा भाईस पोर होमलु कोरीन मार देदो। 9ती योहोवा न केन सी पुछ्यो, “तारु भाई हाबील काँ छे?” हुयो कोयो, “मालुम नी; काय हांव आपसा भाई क राखवायु छे?” 10हुयो कयो, तु काय कोरलु छे? तारा भाई क लुहुय कोळी मा सि मेसे आयड़ीन मार सी वीनता कोरने बाज रोयो (इब्रा 12:24) 11ओतरान कोरीन हिमी कोळी जी तारा भाई क लुहुय तारा हात सी पिने क लीय आपसो मुय उगाड़लो छे, ओकी भीनी सी तु शापित छे। 12चाहे तु कोळी पोर खेती कोरे, ते वी ओकी उपज ओळी तुसे नी जोड़से, आरु तु कोळी पोर भटकने वाळा आरु भगोड़ा होयसे। 13ती केन न योहोवा सी कयो, “मारो डोन नी वेठाये ओसो छे। 14देख, तु आज क दाहड़े मेसे कोळी पोर सी निकाळो छे आरु हांव तारी निगाह क आड़ मा रोहीस आरु कोळी पोर भोटकने वाळु आरु भगोड़ा रोहीस; आरु जो काई मेसे मिळसे, मेसे मार देसे।” 15ओसो कोरीन योहोवा न ओका सी कयो, “जो काई केन क मारसे हेनासी सात गुणा बोदलु लीयु जासे।” आरु योहोवा न केन क लीय एक सोहलानी राख्यु ओसो नी होय की काई हेनाक मिळसे ने मार देये। 16ती केन योहोवा क ओगोळ सी निकोळी गोयु आरु नोद नावोन देश मा, जे अदन क उगेवनो भिनी छे, रोहने लाग्यु।

केनन अवलीयाद

17जब केन आपसी घोरवाळी क पास गोयो ती हुयी भारेपाये होयी आरु हनोक क जन्म देदी; ओळतेन केन न एक सोहोर बोसाड़्यो आरु हेना नगर क नाव आपसा पुर्या क नाव पोर हनोक पाड़्यो। 18हनोक सी ईराद पोयदा हुयो, आरु ईराद महुयाएल पोयदा हुयो आरु महुयाएल सि मतुशाएल, आरु मतुशाएल सी लेमेक पोयदा हुयो। 19लेमेक न दुय बायोर ईयाव कोर्यु: जीनामा सी एक क नाव आदा आरु दुसरा क सिल्‌ला छे। 20आदा न याबाल क जन्म देदो। हुयो हेनु मानशो क बाबो हुतो जो तंबु मा रोहता हुता आरु ढुरो क पाळन कोरने जीवन जीवता हुता। 21ओका भाई क नाव युबाल हुतो: हुयो हेनु मानशो क बाबो हुतो जी वीणा आरु पाळवी वाजाड़ता हुता। 22आरु सिल्‌ला न वी तुबल केन नामक एक पुर्या क जन्म देदो: हुयी पितळ आरु लुहड़ा क आखा धारवाळा होतीयार क गुपायनेवाळा हुता। आरु तुबल केन क बोहनीस नामाह होती। 23लेमेक न आपसी लाड़ी सी कयो,

हे आदा आरु हे सिल्‌ला मारी सोमळु;

हे लेमेक क घोरवाळी, मारु वात पोर कानटा लागाड़ु:

हांव एक मानुसक जे मेसे चुट लागाड़तो हुतो,

अर्थात एक जुवान क जो काई मेसे घायोल कोरता हुता, घात कोरलो छे।

24जब केन क बोदलु सातगुणा लीयो जासे।

ती लेमेक क सतहत्तर गुणा लेयो जासे (मत्ती 18:24)

शेत आरु एन

25आरु आदम आपसी घोरवाळी क पास ओळी गोयो; आरु ओको एक पुर्या क जन्म देदो आरु ओको नाव यो कोहीन शेत पाड़्यो की परमेश्वर न मारे लीय हाबील क बोदले, जेनाक केन मार्‌यो हुतो, एक आरु ओवलीयाद आप्यो (उत्प 5:3-4) 26आरु शेत क वी एक पुर्य पोयदा हुयो आरु ओको नाव एनोश पाड़्यो। तेने टेमे सी मानशे योहोवा सी वीनता कोरने लाग्या।