Skip to content
BibleKenya

Dhankavi Bible

उत्पत्ति 36

एसाव क ओवलीयाद

एसाव जु एदोम वी कोवाये ओकी यि ओवलीयाद छे। एसाव न ते कनानी पुराय सी इयाव कोर्यु; यानी हित्ती एलोन क पुराय आदा क, आरु ओहोलीबामा क जी अना की पुराय, आरु हिव्वी सिबोन क नातीन होती। ओळतेन हुयो इश्माएल क पुराय बाशमत क वी, जी नबायोत क बोहनीस हुती, इयाव कोर्‌यो। आदा न ते एसाव क द्‍वारा एलीपज क, आरु बासमत न रुएल क जोन्म देदी। आरु ओहोलीबामा न युश, आरु यालाम, आरु कोरह क पयदा कोर्‌यो, एसाव क येत पुर्या कनान देश मा पोयदा होयला। एसाव आपसी घोरवाळी, आरु पुर्या पुरायटा, आरु घर क आखा जीवो, आरु आपसा गाडरा बुकड़ा, आरु गाय बुईल आदि आखा ढुरो, निदान आपसी आखी जायदाद क, जे हेना कनान देश मा एकठो कोरला हुता, लीन आपसा भाई याकुब क पास सी दिसरा देश क चाली गोयो। काहकी हेन्दरी जायदाद ओतरी होय गोयली, की हुये एकठा नी रोय सोक्या; आरु ढुरो क घोना सोटा होयने क कारण हेना देश मा, जाँ हुये पारका होईन रोहता हुता, हुये सोमाय नी सोक्या। एसाव जु एदोम वी कोवाये, सेईर नावोन बोयड़ा देश मा रोहने लाग्या।

सेईर नावोन बोयड़ा देश मा रोहनेवाळा एदोमियो क मुल मानुस एसाव क ओवलीयाद यी छे एसाव क पुर्या क नाव ये छे; यानी एसाव क घोरवाळी आदा क पुर्य एलीपज, आरु हेरीत एसाव क घोरवाळी बासमत क पुर्य रुएल। आरु एलीपज क ये पुर्य हुया; यानी तेमान, ओमार, सपो, गाताम, आरु कनज। एसाव क पुर्य एलीपज क तिम्ना एक रखेल होती, जीनासी एलीपज क द्वारा अमालेक क जन्म देदी; एसाव क घोरवाळी आदा क ओवलीयाद मा येत हुया। रुएल क ये पुर्या हुया; यानी नहत, जेरह, शम्मा, आरु मिज्जा एसाव क घोरवाळी बासमत क ओवलीयाद मा येत छे। ओहोलीबामा जी एसाव क घोरवाळी, आरु सिबोन क नातीन आरु अना क पुराय हुती, ओका ये पुर्या हुया: यानी हुयो एसाव क द्वारा युश यालाम आरु कोरह क जन्म देदी।

एसाव ओवलीयाद क अधिपती ये हुया: यानी एसाव क मोटलो एलीपज क ओवलीयाद मा सी ते तेमान अधिपती, ओमार अधिपती, सपो अधिपती, कनज अधिपती, कोरह अधिपती, गाताम अधिपती, अमालेक अधिपती एलीपज ओवलीयाद मा सी एदोम देश मा येत अधिपती हुया: आरु येत आदा क ओवलीयाद मा हुया।

एसाव क पुर्य रुएल क ओवलीयाद मा येत हुया; यानी नहत अधिपती, जेरह अधिपती, शम्मा अधिपती, मिज्जा अधिपती रुएल ओवलीयाद मा सी, एदोम देश मा येत अधिपती होया; आरु येत एसाव क घोरवाळी बासमत क ओवलीयाद मा होया।

एसाव क घोरवाळी ओहोलीबामा क ओवलीयाद मा येत हुया; यानी युश अधिपती, यालाम अधिपती, कोरह अधिपती, अना क पुराय ओहोलीबामा जी एसाव क घोरवाळी हुती ओकी ओवलीयाद मा येत हुया। एसाव जु एदोम वी कोहाये, ओका ओवलीयाद येत छे, आरु हेन्दरा अधिपती वी येत हुया।

सेईर क ओवलीयाद

(1 इतिहास 1:38-42)

सेईर ज होरी नावोन जाती क हुतो, ओको यो पुर्य हेना देश मा पेहले सी रोहता हुता; यानी लोतान, शोबाल, सिबोन, अना, दीशोन, एसेर, आरु दीशान: एदोम देश मा सेईर क येत होरी जातीवाळा अधिपती हुया। लोतानन पुर्यो, होरी आरु हेमाम होया; आरु लोतानोन बोहनीस तिम्ना होती। शोबाल क ये पुर्या हुया: यानी आल्वा, मानहत, एबाल, शपो, आरु ओनाम। आरु सीदोन क ये पुया हुया: अय्या, आरु अना; ये चेत अना छे जेको जोंगोल मा आपसा बाबा सिबोन क गदड़ा क चारता चारता तातला पानी क झोरना मा मेवलो। आरु अना क दीशोन नावोन पुर्या हुया, आरु हेना अना क ओहोलीबामा नावोन पुराय होयी। दीशोन क ये पुर्या हुया: हेमदान, एशबान, यित्रान, आरु करान। एसेर क ये पुर्या हुया: बिल्हान, जावान, आरु अकान। दीशान क ये पुर्या हुया: ऊस, आरु अरान। होरीयो क अधिपती, ये हुया: लोतान अधिपती, शोबाल अधिपती, सिबोन अधिपती, अना अधिपती, दीशोन अधिपती, एसेर अधिपती, दीशान अधिपती, सेईर देश मा होरी जातीवाळा येत अधिपती हुया।

एदोम क राजा

ओळतेन जोत्यार इसराएली पोर कोय राजा न राजा न कोर्या हुता, ती वी एदोम क देश मा ये राजा हुया बोर क पुर्या बेला न एदोम मा राज कोर्या, आरु ओकी देश क नाव दिन्हाबा छे। बेला क मोरने पोर, बोसरानिवासी जेरह क पुर्या योबाब ओका जागा पोर राजा हुयो। योबाब क मोरने पोर, तेमानिया क देश क रोहन्या हुशाम हेना जागा पोर राजा होयु। ओळतेन हुशाम क मोरने पोर, बदद क पुर्या हदद हेना जागा पोर राजा हुया यो चोत छे जेना मिद्यानियो क मोआब क देश मा मार लेदो, आरु ओकी राजधानी क नाव अबीत छे। हदद क मोरने पोर, मस्रेकावासी सम्ला हेना जागा पोर राजा हुयु। ओळतेन सम्ला क मोरने पोर, शाऊल जु महानद क तटवाळा रहोबोत नगर क हुतो, हेना जागा पोर राजा हुयो। शाऊल क मोरने पोर, अकबोर क पुर्य बाल्हानान हेना जाग पोर राजा हुयु। अकबोर क पुर्य बाल्हानान क मोरने पोर, हदर हेना जागा पोर राजा हुयु आरु हेनी राजधानी क नाव पाऊ छे; आरु ओकी घोरवाळी क नाव महेतबेल छे, जु मेजाहाब क नातीन आरु मत्रेद क पुराय हुती। ओळतेन एसाव ओवलीयाद क अधिपतीयो क कुलों, आरु जागा क ओनसारे ओको नाव यो छे तिम्ना अधिपती, अल्वा अधिपती, यतेत अधिपती, ओहोलीबामा अधिपती, एला अधिपती, पीनोन अधिपती, कनज अधिपती, तेमान अधिपती, मिबसार अधिपती, मग्दीएल अधिपती, ईराम अधिपती एदोम ओवलीयादियो न जु देश आपसु कोर लेदु होतु, ओको निवास जाग मा हेन्दरा येत अधिपती हुया; आरु एदोमी जाती क डाहलु मानुस एसाव छे।

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.