Dhankavi Bible
उत्पत्ति 23
सारा नु मृत्यु आरु दफनावनो
सारा एक सोव सत्ताईस साल क होय गोय; आरु जोत्यार सारा क ओतरी ओमोर होयी, ती हुयी कीरयतरबा मा मोर गोय। यो कनान देश मा छे, आरु हेब्रोन वी कोवाये। ओतरान कोरीन अब्राहम सारा क लीय रोड़ने हुयां गोयु। ती अब्राहम धोड़ोन क पास सी उठिन हित्तीयो सी कोहने लाग्यु, हांव तुमरा वीच मा पाहन्त्रयु आरु पारका छे; मेसे तुमरे वीच मा बिड़ा क लीय ओसु जागु आप जु मारुत हय जाय, की हांव मारा मोरला क गाड़ीन मारा डुळा क ओट कोरो। हित्तीयो न अब्राहम सी कयो, “हे आमरा परमेश्वर, आमरी सोमोळ; तु ते आमरा वीच मा मोटू डाहलु छे। आमरा बिड़ा मासी जो तुसे पोटे तेनामा तारा मोरला क गाड़; आमरे मा सी कोय तुसे आमरा बिड़ा लेने सी नी रुकसे, की तु तारा मोरला क हेनामा गाड़ नी पाय।” ती अब्राहम उठीन उबु होयु, आरु हित्तीयो क सामने, जो हेना देश क मानुस हुता, वान्दीन कोहने लाग्यु, काहमाईन तुमरी यी मोरजी होय की हांव मारा मोरला क गाड़ीज आपसा डुळा क ओट कोरो, ती मारी वीनता छे की सोहर क पुर्य एप्रोन सी मार लीय वीनता कोरु, की हुयो आपनी मकपेला वाळी गुफा, जो ओकी जागा क धोड़े छे, हेरु पुरु रूप्यान दाम लीन मेसे आप देये, की हुयो तुमरे वीच बीड़ा क लीय मारु जागु होय जाय। एप्रोन त हित्तीयो क वीच होयां बोठलो हुतो, ओतरान कोरीन जोतरा हित्ती ओका सोहोर क झोपला सी होईन जाता हुता, तेनु आखा क ओगोळ हुयो अब्राहम क जोपाप आप्यो, “हे मारा मालीक, ओसो नी, मारी सोमोळ; हुयु जागु हांव तुसे आप दोम, आरु ओका जो गुफा छे, हुयी वी हांव तुसे आपो दोम; आपना जाती भाईष् क ओगोळ हांव हेनाक तुखे आप दोम; अत: आपसा मोरला क बीड़ा मा मेक।” ती अब्राहम न हेना देश क मानषो क ओगोळ वान्द्यु। आरु हेरी सोमोळतात एप्रोन सी कयो, “काहमाइन तु ओसो चाहे, ती मारी सोमोळ: हेना जागाक जो दाम छे, चो मे तुसे आपने हिन्डो हुयो मार जुळ मुले ली ले, ती हांव मारा मोरला क होयां गाड़दीस।” एप्रोन न अब्राहम क यो जोपाप आप्यो, “हे मारा पोरबु, मारी वात सोमोळ; हेनी जागा क दाम ते चार सोव शेकेल रीपिया छे; बाखुन मारा आरु तारा वीच मा यो काय छे? आपसा मोरला क बीड़ा मा मेक।” अब्राहम न एप्रोन क मानीन ओको होतरा रुप्या तुल दिदो, जोतरा हुयो हित्तीयो क सोमवतला कोयो हुतो, अर्थात् चार सोव ओसा शेकेल जे व्यापारी मा चालता हुता। ओस कोरीन एप्रोन क जागो, जो मम्रे क सामने मकपेला मा हुती, हुयो गुफा भेळ आरु हेनु आखा झाड़ो भेळ जो ओका मा आरु ओका च्यारु मेर पावी पोर हुता, जोतरा हित्ती ओका सोहोर क झोपला सी लागाड़ीन माहाय जाता होता, हेनु आखा क ओगोळ अब्राहम क हुकुम पाक्के रीते आय गोय। एर वाद अब्राहम न आपसी लाड़ी सारा क हेन मकपेला वाळी जागा क गुफा मा, जो मम्रे क अर्थात हेब्रोन क ओगोळ कनान देश मा छे, धुळु आप्या। ओस कोरीन हुयु जागु गुफा भेळ जु हेरेमा होतो, हित्तीयो क भीनी सी बीड़ा क लीय अब्राहमन हुकुम मा पाक्के रीते सी आय गोय।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.