Dhankavi Bible
उत्पत्ति 21
इसहाक क जन्म
योहोवा जसो कयो तसोत सारा क फोम राख्यो की ओका सात आपनो बुल क ओनसारे करीयो। सारा अब्राहम सी भारेपाय होयी; आरु हेरा डाहवारा मा ओको नावाड़ले टेम पोर जु परमेश्वर तेनाक टाकलो हुतो, एक पुर्य होयो।1 अब्राहम न हेरा पुर्या क नाव जो सारा सी पोयदा होयो थो इसहाक पाड़्यो। आरु जोत्यार ओका पुर्य इसहाक आठ दिन क होयो, ती हुयो परमेश्वर क हुकुम क ओनसारे अब्राहम हेको खतनो करीयो। जोत्यार अब्राहम क पुर्य इसहाक पोयदा हुयो ती अब्राहम एक सोव साल क थो। आरु सारा न कयी, “परमेश्वर न मक घोनो खुश कोरलो छे; ओतरान कोरीन आखा सोमळनेवाळा वी मार सात मा खुश होवसे।” ओळी हुयी यो वी कोहि, “काय कुदु कदी अब्राहम सी कय सोकतो हुतो की सारा पुर्या क दुद पावसे? बाखुन देखु, मारसी ओका डाहवारा मा एक पुर्य पोयदा हुय गोयो।” चो पुर्य मोटो हुयो आरु ओको दुद छुड़ाय देदा; आरु इसहाक क दुध छुड़ावने क दाहड़े अब्राहम न मोटो भोज कोर्यो।
हाजीरा आरु इश्माएल क निकाळ्नो
ती सारा क मिसरी हाजीरा क पुर्य, जो अब्राहम सी पोयदा हुयो थो, हासतलो देखा पोड़्यो। ओस कोरीन हुयी अब्राहम सी कयो, “इनी दासी क पुर्या भेळ नीकाय दे; काहकी इनी दासी क पुर्य मारा पुर्या इसहाक क सात नी भेसकायसे।”2 यी वात अब्राहम क आपसा पुर्या क कारण बेस भुण्डी लागी। बाखुन परमेश्वर अब्राहम सी कयो, “हेना पुर्या आरु आपसी दासी क कारण भुण्डो नी लागे; जी वात सारा तुसे कोहि, तेनीक मान, काहकी जी तारी ओवलीयाद कोवायसे ची इसहाक सीत चालसे।3 दासी क पुर्या सी वी मे एक जाती उबजाड़ीस, ओतरान कोरीन की हुयो तारो ओवलीयाद छे।” ओतरान कोरीन अब्राहम न वेगोत उठिन रुटा आरु पानी सी भरलो चामड़ा क थयलो वी हाजीरा क आप्यो, आरु ओका कान्धा पोर मेल्यो, आरु ओका पुर्या क वी हेनीक आपिन ओको मोकोळी देदो। हुयी जात रोय, आरु बेरसेबा क जोन्गोल मा वाहरायने लागी। जोत्यार थोयली मा वाळो पानी सोर गोयो, ती हुयी पुर्याक एक झाड़ो तोळे छेड़ देदी। आरु हुयी हेना सी थुड़ी नाम्बे जाईन ओका वाराम यो वीचारीन बोठ गोय, “मेसे पुर्यान मोत देखनो नी पोड़े।” ती हुयी ओका सामने बोठीन आयड़ी आयड़ीन रोड़ने वाज गोय। परमेश्वर न हेना पुर्या क सोमळ्यो, आरु ओका दुत न सोरोग सी हाजीरा क आयड़ीन कया, “हे हाजीरा, तारे काय होय गोयो? मा बीहये; काहकी जा तारु पुर्यु छे चां सी ओकी ओवाज परमेश्वर क सोमवली छे। उठ, आपसा पुर्या क चूट आरु आपसा हात सी सोमाळ; काहकी हांव ओका द्वारा एक मोटी जाती बोनावीस।” ती परमेश्वर न ओका डुळा उगाड़ दिदो, आरु ओको एक कुवो देखा पोड़्यो; ती हुयी जाईन थोयली क पानी भोरीन पुर्या क पावी। आरु परमेश्वर हेना पुर्या क सार रोयो; आरु जव हुयो मोटो होयो, ती उजाड़ बयड़ा मा रयीन रोहीन धनुर्धारी बोन गोयो। हुयो पारान नावोन जोन्गोल मा रोहतो हुतो; आरु ओको आईश् न ओक लीय मिसर देश सी एक बायोर मांगाड़ी। तेनु दाहड़ा मा ओसो हुयो की अबीमेलेक आपसा सिपायड़ा पीकोलक सात लीन अब्राहम सी कोहने लाग्यो, “जो तु काय कोरे ओका मा परमेश्वर तारे साते रोवे; ओतरान कोरीन हीमी मेसे यां इना वारामां परमेश्वर क शपथ खाय की तु नी ते मार पुठी धुकु कोरीस आरु नि ते कोदी मेरा होको सी कोरीस, बाखुन जोसी गीन हांव तार पोर कोरलु तोसुत तु मार पोर आरु एना देश पोर वी, जीनामा तु रोहे, कोरजी।” अब्राहम न कयो, “हांव शपथ खाईस।” ती अब्राहम न अबीमेलेक क एक कुवा क वारा मा जो अबीमेलेक क दासो न ताकोतसी ली लेदा होता, उलाहना आप्यो। ती अबीमेलेक न कयो, “हांव नि जानो की कुन यो काम कोर्यो; आरु तु वी मेसे नि कोयु, आरु नी हांव आज सी पेहेल इना वाराम काय सोमळ्यु।” ती अब्राहम न गाडरा बुकड़ा आरु गाय–बुईल अबीमेलेक क आप्यो; आरु हिये दुयु आम्बा साम्बा वायदु कोर्या। अब्राहम न गाडरा क सात पुर्या ओलोग मेल्यो। ती अबीमेलेक न अब्राहम सी पुछ्यो, “ईनु सात पिला क, जो तु नेवाड़ रोयु, काय कोरीस?” हुयो कयो, “तु इनु सात गिदल्या क इने वाते गोवा जानीन मारा हातो सि ली के हांव यु कुवु खुंदलु छे।” हुये दुयु जे हेना जागा मा आपसा शपथ खादला, ओतरान कोरीन हेना जागान नाव बेरसेबा पोड़यो। जोत्यार बेरसेबा मा जोत्यार वाचा बान्धे, ती अबीमेलेक आरु ओको सिपायड़ो पीकोल उठीन पलीश्तीयो क देश मा पोछा गोया। ओळतेन अब्राहम न बेरसेबा मा झाऊ क एक झाड़ लागाड़्या आरु होया योहोवा सी जो जलमको परमेश्वर छे वीनता करीयो। अब्राहम पलीश्तीयान क देश मा घना दाहड़ा लोगुन हुलक्र्यु रोयु।
Source notes (3)
- Cross-reference इब्रानियों 11:11
- Cross-reference गलातिया 4:29-30
- Cross-reference रोमियो 9:7
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.