Dhankavi Bible
उत्पत्ति 18
अब्राहमन तीन पाहन्तरीया
अब्राहम मम्रे क बांज झाड़ क वीच बेस तोपो क टेमे तंबु क झोपला पोर बोठ रोयु होतु, ती योहोवा न ओको दर्शन दिदो: हुयो डुळा उचाकोरीन निगाह कोर्यो ती काय देख्यो की तीन मानुस ओका सामने उब रोया। (इब्रा. 13:2) “हे पोरबु, काहमाईन मार पोर तारी गिनोन निगाह होय ती हांव वीनता कोरो की आपसा दासोन चा गोथू झुणी जाय। हांव थुड़ोस जळ लीयावो, आरु आप आपसा पाय धुवीन इना झाड़ क नेचो आराम कोरो। ओळी हांव एक भुकरु रुटान ली आवो, आरु तीनासी आप आपसा जीव क तृप्त कोरजे, ती ओका वाद मा ओगा बोड़जे; काहकी आप आपसा दास क पास ओतरान कोरीन आवलु छे।” हुयो कयो, “जोसो तु कोयो तोसोत कोर।” ती अब्राहम तोत्यारुत तंबु मा सारा क पास गयो आरु कयो, “छाटीत दोस कीलु मोयदु लीन कुसोन आरु तेरा रुटा बोनाय ले।” ती अब्राहम गाय बुईल क टुळा मा दौवड़्यु आरु एक बेस वारु आरु वारु बछड़ो लीन आपसा दास क आप्यो, आरु तेनाक छाटू रान्दाड़्यु ती हुयो दुध आरु दही आरु बछड़ा क मांस, जो हुयु रान्दाड़लु हुतु, लीन हेरे ओगोळ वाट देदु; आरु आप झाड़ क नेड़ो पोलान चा उबो रोह, आरु हुये खाने लाग्या। हुये हेना सी पुछ्या, “तारी लाड़ी सारा कां छे?” हुयो कयो, “ची तंबु मा छे।” हुयो कयो, “हांव वसन्त ऋतु मे छाचीन तारेन्चा आवीस, आरु तारी लाड़ी सारा क एक पुर्य पोयदा होयसे।” सारा तंबु क झपला पोर जु अब्राहम क पोछो हुतो, सोमळती होती। (रोम. 9:9) अब्राहम आरु सारा दुयु बेसका डाळा होता; आरु सारा क मासिक धर्म बोन्द हुय गोया हुता। ओतरान कोरीन सारा मोनो मा हासीन कोहने लागी, हांव ते डावी छे, आरु मारु घोरवावु वी ते डावु छे, ती काय यो सुख होयसे (1 पत. 3:6) ती योहोवा न अब्राहम सी कयो, “सारा यो कोवीन काहा हासे की काय मारे, जो ओतरी डावी होय गोय, छाचीन होयसे?” काय योहोवा क लीय काय काम वातड़ो छे? सोय टेमो मा, अर्थात वसन्त ऋतु मा, हांव तारे पास ओळी आवीस, आरु सारा क पुर्य पोयदा होयसे (लुका 1:37) ती सारा बीहिन कोहने बाज गोय “मे नी हासी।” हुयो कयो, “नी; तु ते हासली हुती।” ओळतेन चे मानुस चां गोथा सी चाल्या आरु सदोम भीनी निगाह कोर्या की; आरु अब्राहम तेनुक वीदा कोरने क लीय ओका सात मा चाल्यो। ती योहोवा न कयो, “यो जो हांव कोरो, चो काय अब्राहम सी डुकाड़ी राखो? अब्राहम सी ते छाचीन एक मोटी आरु सामर्थी जाती उबेजसे, आरु कोळी का आखी जाती ओका लारे बोरकोत पावसे। काहकी हांव जानो की हुयो पासा पुर्या आरु घोरल्या क, जे ओका पोछोळ रोय जासे, हुकुम आपसे की चे योहोवा क वाटो मा अटल बोनला रोहु, आरु धर्म आरु नियाव कोरता रोहु; काहकी जो काय योहोवा न अब्राहम क वारा मा कोहलो छे ओको पुरो कोरे।” ओळी योहोवा न कयो, “सदोम आरु गमोरा कक आयड़नो वोद गोयो, आरु ओलो पाप बेस भारी होय गोयलो छे; ओतरान कोरीन हांव उतरीन देखिस की हेरे जोसो आयड़नो मारा कान्टा लोगुन पुगलो छे, हुये ठीक तोसोत काम कोर्या की नी; आरु नी कोर्या होय ती हांव हेना पारखी लीस।” ती चे मानुस होया सी मुड़ीन सदोम भिनी जाने लाग्या; बाखुन अब्राहम योहोवा क ओगोळ उबो रोय गोयो। ती अब्राहम हेरे धोड़े जाईन कोहने लाग्यु, “काय तु छाचीन भुण्डला पुठी वारलान वी नाश कोरीस? काहमाईन हेना सोहोर मा पोचास धोरमी होसे; ती काय तु छाचीन हेना जागा क नष्ट कोरीस आरु हेनु पोचास धोरमी क लीय जो हेरेम छे, नी छुड़ीस? ओसलो काम कोरने तार सी नाम्बे रोहे की भुण्डा क सात धोरमी क वी मार नाखीस, आरु धोरमी आरु भुण्डा दुयो क एकुज रोहसे। यो तार सी नाम्बे रोहे। काय आखी कोळी क नियाव कोरन्यु नियाव नि लोरे?” योहोवा न कयो, “काहमाईन मेसे सदोम मा पोचास धोरमी जोड़े। ती तीन्दरै जुगु तेना आखा जागा क छुड़दीस।” ओळतेन अब्राहम न कयो, “हे पोरबु, सोमोळ, हांव ते धुळा आरु रुखड़ु छे, तेवी हांव ओतरी हिमोत नी की तारसी वात कोरो। काहमाईन हेनु पोचास धोरमी मा पांच घोट जाय; ती काय तु पांचूत क घोटने क कारण तेनु आखा सोहोर काजे नाश कोरीस?” हुयो कोयो, “काहमाईन मेसे हेनुमासी चावीस ने पाच वी जोड़े, तीवी ओको नाश नी कोरो।” ओळी हुयो हेनासी यो वी कयो, “काहमाईन होयां चावीस जोड़े।” हुयो कयो, “ते हांव चावीस क कारण वी ओसो नी कोरीस।” ओळी हुयो कयो, “हे पोरबु, रीस झुण कोरे ती हांव काय ओळी कोहो। काहमाईन होया तीस जोड़े।” हुयो कयो, “काहमाईन मेसे होया तीस वी जोड़े, तेवी ओसो नी कोरीस।” ओळी हुयो कयो, “हे पोरबु सोमोळ, हांव ओतरी ढिठाई ते कोरलु छे की तार सी वात कोरो: काहमाईन हेरेमा वीस जोड़े।” हुयो कयो, “हांव वीस क लीये वी ओको नाश नी कोरो।” ओळी हुयो कयो, “हे पोरबु, रीस झुन कोरे, मे एक कावार आरु कोहिस; काहमाईन हेरेमा दोस जोड़े।” हुयो कयो, “ती हांव दोस क लीय वी ओको नाश नी कोरीस।” जोत्यार योहोवा अब्राहम सी वात कोर लीदो, ती जात रोयु; आरु अब्राहम आपसे घोर क जात रोयु।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.