Dhankavi Bible
उत्पत्ति 15
अब्राम क साथ परमेश्वर नु वाचा
इनी वातो क वाद मा योहोवा क यो बुल दोर्शोन मा अब्राम क पास मा पुग्यो : “हे अब्राम, मा बीहये; तारी ढाल आरु तारो घोनो मोटो फोव मे छे।” अब्राम कयो, “हे भोगवान योहोवा, हांव ते निर्ओ ओवलीयाद छे, आरु मारा घर क वारीस ये दमिश्कवासी एलीएजेर रोहसे, अत: तु मेसे काय आपीस?” आरु अब्राम न कयो, “मक क तु ओवलीयाद नी दियो, आरु काय देखो की मारे घोर मा पोयदा होयलो एक जन मारो वारीस रोहसे।” ती योहोवा क यो बुल ओका पास मा पुग्यो, “यो तारो वारीस नो रोहसे, तारो जो निज पुर्यु रोहसे, वही तारो वारीस रोहसे।” आरु हुयो ओको खोयड़े लीजाईन कयो, “वादळा भीनी नीगाह नाखीन तारागण क गिन, काय तु ईनुक गिन सोके काय?” ओळतेन हुयो हेनाक कयो, तारा ओवलीयाद वी ओसा रोहसे (रोम. 4:18, इब्रा. 11:12) हुयो योहोवा पोर भुरसु करीयो; आरु योहोवा न इनी वार क ओका लेखा मा धर्म गिन्यो (रोम. 4:3, गला. 3:6, याकुब 2:23) ती हुयो हिनासी कयो, “हांव वही योहोवा छे जु तुखे कसदियो क ऊर सोहोर सी खोयड़े ली आवलु, की तुसे एना देश क होक आपो।” चो कयो, “हे भोगवान योहोवा, हांव कोसु जानो की हांव एरु होकदार्यु होईस?” योहोवा अब्राम सी कयो, “मारे जुगु तीन साल क एक कलोर, आरु तीन साल एक बुकड़ो, आरु तीन साल क एक गाडरा, आरु एक पिण्डुक आरु एक पेरवा क पिलो लीले।” ईनु आखा क लीन हुयो तीन्दरो वीच मा दी दुय टुकड़ा कोर दिदो, आरु टुकड़ा क आम्बा–साम्बा मेक दिदो; बाखुन चील्ला क हुयो टुकड़ा नी करीयो। जोत्यार मासवाळा चील्ला लोथो पोर आय लाग्या, ती अब्राम न ओको उड़ाय दिदो। जोत्यार दाहड़ु डूबने लाग्यु, ती अब्राम क बेसकी नींद आवी; आरु देखु, बेसकी बीक आरु घोने जोबोर आतंक होय गोयो (अय्युब 4:13-14) बती योहोवा न अब्राम सी कयो, “यो खोरी जान की तारा ओवलीयाद पारका देश मा वी हुलक्र्या बोनीन रोहसे, आरु तेना देश क मानुषो क दास हुय जासे; आरु हुये चे ओको चार सोव साल लोगुन वेला पाड़से ( निर्ग. 1:1-14, प्रेरी. 7:6) ओळतेन जीना देस क हुये दास होयसे तेनाक मे डोन आपीस आरु ओका वाद मा मोटो धोन चा गोथू लीन निकोळी जाइस (निर्ग. 12: 40-41, प्रेरी. 7:7) तु ते आपसा पितरों मा कुशल क सात वारु मिळ जाईस; तुखे आखा डाहवारा मा धुळु आपसे। बाखुन हुये चोथी पीढ़ी मा यां ओळी आवसे: काहकी हिमी लोगुन एमोरीया क ओधोरोम पुरो नी होयलो छे।” आरु ओसो होयो की जोत्यार दाहड़ु बुड गोयु आरु घोनो आंधारो होय गोयो, ती एक अंगीठी जीना सी धूवाडू निकवतलु आरु एक धोपोतली मशाल देखा पोड़ी जी तेना भुकरा क वीच मा होईन निकोळी गोय। इने दाहड़े योहोवा न अब्राम क सात मा वायदु बांध्यु, “मिसर क महनद से लीन परात नावोन मोटली नद लोगुन जोतरा देश छे (प्रेरी. 7:5) अर्थात केनियो, कनिज्जीयो, कदमोनियो, हित्तीयो, परीज्जीयो, रपायो, एमोरीयो, कनानियो, गिर्गाशियो आरु यबुसियो क देश हांव तारा ओवलीयाद क आपलो छे।”
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.