योहेजकेल 9

योरुसालेम काजे डोन आपनो

1ओळी त्यो मार कानटा मा उचा बुल सी आयड़ीन कयो, “सोहोर क आदाकारी क आपसा आपसा हात मा नास कोरनेन होतीयार लीन धड़े आवु।” 2एना पोर छव मानसे बोखवरे भेनी उपेरला झपलान वा सी आपसा हात मा मारनेन होतीयार लीन आया; आरु हेनका वीन सोनोन छिंदरा पेहरला, कोड़्या मा लीखनेन दवात बाँदला एक आरु मानुस हुतो; आरु त्या आखा भवन क धड़े जाईन पीतळ क वेदी क धड़े उबो हुयो।

3तव इसराएल क परमेश्वर क सेक करुब, पोर सी, जेनका उपोर त्यो रोया कोरतो हुतो, भवन क डेवढ़ी पोर उठ आयो हुतो; आरु त्यो उना सोनोन छिंदरा पेहरला मानसो क जे कोड़्या मा दवात बाँदला हुता, आयड़िया। 4आरु योहोवा न उना सी कोयु, “एना योरुसालेम सोहोर क धड़े ओथान ओथा जाईन जोतरा मानसे उना आखा घाड़ायन कामोन कारन जे उनामा कोरे, दोम भोरता आरु दुखन कोरता आयड़े, हेनका माथा पोर सोहलानी लागाड़ दे।” 5तव त्यो मारा समळतेन दिसरा सी कयो, “सोहोर मा हेनका पोछोळ चालीन मारता जावु; कुदा पोर गीन नी कोरनो आरु नी एक वी मानुस तुमरा डुळा सी वाचीन ढासनो नी जुवे 6डाहला, जुवान, कुवारला, बाळ-बोच्‌चा, बायरा, आखाक मारीन नास कोरु, पुन जीना कुदा मानसोन माथा पोर ची सोहलानी होय, हेका धड़े नी जानो। मारा चुखला जागात सी शुरु कोरु। आरु त्या उना डाहला सी शुरु कोर्या जे परमेश्वरन भवनन अगळ हुता।”

7ओळी त्यो उनासी कयो, “भवन काजे वीटोळ कोरु, आरु आँगनाक धोड़ो सी भोर देवु, चालु, खोयड़े निकळु।” तव त्या निकळीन सोहोर मा मारने लाग्या।

8जव त्या मार रोया हुता, आरु हांव एखलु रोय गुयो, तव हांव मुयोन भुरसे हिट पोड़्यो आरु आयड़ीन कयो, “हाय पोरबु योहोवा! काय तु आपसी रीस योरुसालेम पोर भड़कावीन इसराएल क आखा वाचला वी नास कोरीस?”

9तव त्यो मार सी कयो, “इसराएल आरु योहुदा क घराना क भुनला काम बेसका जादात छे, याँ लगुन की आखो देस लुहुय सी भोराय गुयो छे, आरु सोहोर पाप सी भोराय गुयो छे। काहकी त्या कोवे छे, योहोवा न कळी को छुड़ देदो आरु योहोवा काय नी देखतो। 10एकालीय हांव हेनका कामोन फोव हेनकाज माथा पोर आपीस। हामं उना पोर गीनोन निंगा नी कोरीस। एक वी मानुस मारा डुळा सी वाचीन डासी नी सोकसे।”

11तेने टेमे हांव देख्यो की, जेरा कोड़्या मा लीटोन सांयोन डोब्बी बांदलो हुतो, यी खोबोर लायो, “पोरबु, जसो तु मेसे हुकुम आपलो हुतो, तसोज हांव कोर देदो।”