योहेजकेल 7

इसराएलोन चेहलो टेम साते छे

1पोरबु योहोवा क यो बुल मारे पास पुग्यो, 2“हे मनख्यान ओवलीयाद, समळ। पोरबु योहोवा इसराएल क धोरतीन वाराम ओसो कोवे छे: की नास हुयो; च्यारु खुना भेळ देस क नास आय गयलो छे। 3ए इसराएल, सोमोव। तारो चेहलो वी आय गयो आरु हांव आपसा रीस तारे पोर भड़कावीन तारा चालचालोन ओनसारे तुसे डोन आपीस; आरु तारा आखा भुंनला कामोन फोव तुसे आपीस। 4मारी गिनोन निंगा तारे पोर नी होयसे, आरु नी हांव गीन नी कोरो, आरु जव लगुन तारा भुंनला पाप तारेम बोनला रोहसे तव लगुन हांव तारा चालचलन क फोव तुसे आपीस। तव जान लेसे की हांव योहोवा छे।

5“पोरबु योहोवा ओसो कोवे छे: पिड़ा क वाद पिड़ा! देख, तारे पोर पीड़ा आवे छे। 6चेहलो आय गयलो छे, आखान चेहलो आवलो छे; त्यो तारे वीरुद्ध जागलो छे। देखु, त्यो आवेत। 7हे देसम रोहन्या, तारे लीय चक्र फिर चुक्यो, टेम आय गयो, दाहड़ा धड़े छे; बोयड़ा पोर खुशीन बुलन दाहड़ा नी, हुल्लड़न होयसे।”

8हेमी थुड़ाक दाहड़ा मा हांव आपसी जलजाहट तारे पोर भोड़कावीस, आरु तारे फोर आखो कोप उथलावीस आरु तारा चालचलन ओनसारे तुखे डोन आपीस। तारा भुंनला कामोन फोव तुसे भुगताड़ीस। 9मारी गिनोन निंगा तारे पोर नी होयसे आरु नी हांव तारे पोर गीन नी कोरीस हांव तारा चालचलन क फोव तुसे भुगताड़ीस, आरु तारा भुंनला पाप तारे मा बोनला रोहसे। तव तुमु जान लेसु की हांव योहोवा डोन आपने वाळो छे।

10“देखु, उना दाहड़ा, त्या आवेत छे! चक्र फिर चुक्यो, लाकुड़ फुग गोय, डाहवाय फुलो छे। 11लोड़ाय वोदती वोदती पापोन डोन बोन गुयो; उना मा सी काहीन नी वाचसे, आरु निजी हेनकी गोड़दी, नी हेनका धोन मा सी काहिन रोहसे: आरु नी उना मा सी कुदान लीय वीलाप समळाय से।”

12टेम आय गुयो, दाहड़ा धड़े आय गुया छे; नि ते मुले लेनेवाळा खुशी कोरे आरु नी वेचने वाळा शोक कोरे, काहकी हेनकी आखी गोड़दी पोर रीस भोड़की उठलो छे। 13चाहाय त्या जीवतला रोहे, तेवी वेचायली चीज क पास कोदी पोछो नी जोड़से; काहकी दर्शन नी यी वात देसन आखी गोड़दी पोर घोटसे, कुदु नी पोछो आवसे; कुय वी मानुस जो ओधोरोम मा जीवतला रोहे छे, ताकोत नी धोर सोकसे।

14“त्या नरसिंगा फुँक्या आरु आखो काहीन तीयार कोर देदो; पुन लोड़ाय मा कुय नी जातो काहकी देसन आखी गोड़दी पोर मारी रीस भोड़की छे।”

इसराएलन पापोन डोन

15“सोहोरोन खोयड़े वेरीन तलवार टांगाय रोय, आरु सोहोर क धड़े महामारी एने काळन साहळो छे। जे सोहोर क खयड़े खयड़ा मा छे, त्या वेरीन तलवार सी मोत क घाट उतार जातो छे: आरु जे सोहोर क धोड़े छे, हेनको महामारी आरु काळ खाय जाये छे। 16जे मानसे तलवार, महामारी आरु काळ सी वाच जाता छे, त्या बोयड़ा पोर ढास जाता छे। ये वाचला लोगहन ओसा छे मानु घाटो रोहनेवाळा पेरवा। होरीक वाचला मानसे आपसा आपसा ओधोरोम क लीय शोक मोनाय रोया छे। 17हेनका हात मा ताकोत नि रोयो। बीक सी हेनका पाय कोमजुर छे; 18त्या पोसतावो करने क लीय कोड़्या मा गोंटान छिंदरा पेहरीन। आतंक न हेनको ढाक लेदो छे। हेनका चेहरा सी ग्लानी टोपोक रोय। हेनका पोसतावान कारन आपसा मुनका क बुड़ देसे। 19त्या आपसी चाँदी वाटो मा नाख देसे, आरु हेनका सोना वीटोळ कोहायसे; योहोवा क जलन क दाहड़ा हेनका सोना चाँदि हेनको नी वाचाड़से, नी उनासी उनाक जीव निरसो होयसे, नी हेनको पेट भोरायसे। काहकी त्या हेनका ओधोरोम क ठुकर क कारण होयला छे। 20झुटा शान-सोकत क लीय त्या एना सोना चाँदी क गोहना बोनावता हुता। सोना-चाँदि सीत त्या घाड़ायीन मुरतीया आरु दिसरा घाड़ायन चीजे बोनावला हुता, एकालीय हांव एना सोना चाँदि क वीटोळ चीज बोनाय दिस, ओतरान कोरता हांव हेन्दरे जुगु वीटोव चीज मेकीस।

21“हांव यो सोनो चाँदि पारकान हातोम लुटोन रुप मा आप दिस। आखी कळी क भुण्डला हको लुट लेसे आरु सोना चाँदीन मुरतीया क वीटोळ कोर देसे। 22ओतरोत नी, हांव उनासी आपसो मुय फेरवी लीस, ताकी वीधर्मी मारा मन्दिर रुपी भंडारन जागा मा भोरायसे, आरु हेको वीटोळ कोर देसे।

23“त्या हेको खाली कोर देसे। आखा देस आरु योरुसालेम सोहोर लुहुयवाळो आरु लोड़ायन्या कामोन सी भोराय गुयो छे। 24एकालीय हांव राजोम आखा भुनला मुलुक क भोड़कावीस की त्या इसराएल पोर लोड़ाय कोरे। त्या आवसे, आरु इसराएलीयो क घोरो पोर होक कोर लेसे। ओसो हांव हेन्दरी मोटाय घाड़ाय क धुळा मा मिलाय दीस, आरु हेनका चुखलो जागो वीटोळ होय जासे। 25सत्यनास होयने पोर छे, तव हेरने पोर वी हेनको शांती नी जोड़से। 26पिड़ा पोर पीड़ा आवसे आरु उड़ती जाईन वातो पोर वात समवायसे; आरु लोगहन कागळीया सी दर्शन नी वात पुछसे, पुन पुजारा क पास सी वेवोस्थान, आरु डाहलाक पास सी सम्मती आपनेन ताकोत जाती रोहसे। 27राजा ते शोक कोरसे, आरु रईस उदास सारको छिंदरा पेहरसे, आरु देस क लोगहन क हाथ ढिला पोड़से। हांव हेनका चलन क ओनसारे हेनाका सी वेवहार कोरीस, आरु हेनकी कोमाय क सारको हेको डोन आपीस; तव त्या जान लेसे की हांव योहोवा चे।”