Dhankavi Bible
योहेजकेल 38
गोग राज्य परमेश्वरोन साधन
ओळी योहोवान यो बुल मारे यां पुग्यो: हे मानसोन ओवलीयाद, आपसो मुय मागोग देसोन गोग भेनी कोरीन, जो रोश, मेशेक, आरु तुबल सोहरोन डाहलो छे, हेरे वीरुद् भोगवानो वोगे गोथी वात कोर, आरु यो कोव, हे गोग, हे रोश, मेशेक, आरु तुबल सोहरोन डाहला, परमेश्वर ओसु कोवे: देख, हांव तारे वीरुद् छे। हांव तुसेक फीराय लावीस, आरु तारा जोबड़ाम आकड़ा नाखीन तुसे निकाळीस; आरु तारी आखी सेनाक वी घुल्ला आरु घुल्लान सोवारोक जे आखा की आखा कोवोच पेहेरलान एक मोटी गोड़दी छे, आरु जो फोरी आरु ढाळ लीन आखा की आखा तोलवार चालाड़नेवाळा होयसे; आरु हेरे पुठी फारस, कुस आरु पुतोक, जे आखा की आखा ढाळ लीन आरु टोप लागाड़ीन होसे; आरु गोमर आरु हेरा आखा टुळाक, आरु बोखेवरे भेनी नांबे नांबेन देसोन तोगर्मान घोरानो, आरु हेरा आखा टुळाक निकाळीस; तारे पुठी बेसका देसोन मानसे रोवसे।
कोरीन तु तीयार होय जा; तु आरु जोतरी गोड़दी तारे जु एकठी होये, तीयार कोरजी, आरु तु हेंदरो ओगोळवान्यो बोनजी। बेसका दाहड़ा वीतसे ने तुमुक काम पोर बुलावसु; आरु चेहला सालोम तु हेना देस मा आवीस, जो तोलवारोन होकोम सी छुटलो रोवसे, आरु तेरा रोवनीया बेसका देसोम गोथा एकठा होयसे; तु इसराएलोन बोयड़ा पोर आवीस जो एकसारकात उजाड़ रोवला छे; पुन होये देस देसोन मानसोन होकोम सी छुड़ावीन आखा की आखा बेफिकरीया रोवसे। तु होमलु कोरजी, आरु आंजीन तोसु आवीस, आरु आपसा आखा टुळा आरु बेसका देसोन मानसो भेळ वादळा जोसु देसो पोर छावाय जायीस।
परमेश्वर योहोवा ओसु कोवे: तेने दाहड़े तारो मोनोम ओसी ओसी वात आवसे की तु एक भुंनलो वीचार वी निकाळीस; आरु तु कोवीस, हांव वीगुर भीतड़ान गांवोन देसो पोर होमलु कोरीस; हांव हेनु मानसोन चा जायीस। जे बेफिकरीया रोवे; चे ओसा घोरोम रोवे जेंदरा च्यारु मेर भितड़ो नी होय, जेंदरा घोरोन साकोळ आरु सोहोरोन भोरान्यो झोपलो वी नी होय। काहाकी हापकीन तु हेनुक ठोगे आरु आपसो हात हेनु खोण्डोरोक वोदाड़े जे ओळी वोस गोया, आरु हेनु मानसोन वीरुद् जाय जे देसोम गोथा एकठा होयला होता आरु कोळीन डुटी पोर वोसला ढुरे आरु दिसरो धोन राखे। सोबा आरु दोदानोन मानसे आरु तोरसीसोन वेपारी आपसा देसोन आखा जुवान नाहार पुठी तारेसी कोवसे, काय तु लुटने आवे? काय तु धोन हापेकने, सोनो-चांदी चुटने, ढुरोक आरु दिसरो धोन ली जाने, आरु मोटली ठोग आपसो लेने कोरीन आपसी गोड़दी एकठू कोर्यु?
ओस कोरीन, हे मानसोन ओवलीयाद, भोगवानो वोगे गोथी वात कोरीन गोग सी कोव, परमेश्वर योहोवा ओसु कोवे; जेने टेमे मारा मानसे इसराएल बेफिकरीयो वोसलो रोवसे, काय तुसेक एरी खोबोर नी जोड़से? तु बोखेवरे भेनीन नांबे नांबेन जागा सी आवसे; तु आरु तारे पुठी बेसका देसोन मानसे, जो आखा की आखा घुल्ला पोर चोहोड़ला होसे एक मोटी गोड़दी आरु ताकोतवाळी सेना। जोसो वादळो कोळी पोर टुपारु कोरे, तोसोत तु मार मानसे इसराएल देस पोर चोढ़ाई कोरीस। कोरीन हे गोग, चेहला दाहड़ाम ओसोत होयसे, की हांव तारेसी आपसा देस पोर ओतरा कोरीन चोढ़ाई कोरावीस, की जोत्यार हांव देसोन देखता तारे लारे आपसाक चुखलो कोवाड़ो, ती चे मेसेक उळखी लेसे।
गोग राजा काजे परमेश्वर डोन आपे
परमेश्वर योहोवा ओसु कोवे; काय तु चोत राजा नी होय, जेरे वाराम हांव आपसा पावरीया इसराएलोन कागळीयान लारे कोवलो होतो? मारा ये पावरीया घोना साल लोगुन वीनता कोरता रोवे की हांव तारेसी आपसा खास मानसे इसराएलीयो पोर होमलु कोरावीस। तेने टेमे, गोग राजा इसराएल देसोन वीरुद् लोड़ायने आवसे। हांव आपसी रीस देखाड़ीस। परमेश्वर योहोवा यो बुल छे। हांव आपसी रीस आरु घाड़ायीन कोरता यो कोयु की तेने दाहड़े इसराएल देस मा मोटलो भुकोम होयसे। मार दोरसोन सी दोरीयान माछा आरु वादळान चील्ला, खेतोन जोंगली जोनवारे आरु होये आखा नानला जीवे जोतरा धोरती पोर रोवने वावा आखा जीवे आरु मानसे, आखा काप पोड़से आरु बोयड़ा हिट पोड़से; आरु बोयड़ान चोट्या नास होयसे, आरु आखा भितड़ा पोड़ीन धुळाम भेसकाय जासे। परमेश्वर योहोवान यो बुल छे की हांव हेरे वीरुद् तोलवार चालाड़ने जुगु आपसा आखा बोयड़ाक आयड़ीस आरु होरीक तोलवार हेरा भास्योन वीरुद् उठसे। हांव गोग राजान रुग आरु मोतोन डोन आपीस। हांव गोग आरु बेसका देसोन सिपायड़ा उपोर गारा, आगठो आरु गोंधोकोन पानी पाड़ीस। इने रीते हांव आपसाक मोटु आरु चुखलो कोवाड़ीस आरु बेसका देसो ओगोळ आपसाक उजेनतु कोरीस। तोत्यार होये जान लेसे की हांव योहोवा छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.