Dhankavi Bible
योहेजकेल 33
योहेजकेल इसराएलोन पोहरेदार
योहोवान यो बुल मारे यां पुग्यो: हे मानसोन ओवलीयाद, आपसा मानसो सी कोव, जोत्यार हांव काहनला देस पोर तोलवार चालाड़ीस आरु तेना देसोन मानसे कुदा आपसा गुवावी कोरनीयान तोसा नेवाड़से, तोत्यार कोदाम होये यो देखीन की एना देस पोर तोलवार चालनेवाळी छे, मोटलो फेपारीयो वाजाड़ीन मानसोक चोकचोया कोर देये, ती जो कुदु मोटला फेपारीयान बुल सोमळी नी चोकचोयो होये आरु तोलवारोन चालने सी मोर जाय, तेरो मोरनोन जोवाबदारी तेरीत रोवसे। होयो मोटला फेपारीयान बुल सोमयो होय, ती वी होयो चोकचोयो नी होयो, ती होयो आपसी मोतोन आपसु जोवाबदारी कोवाये। पुन कोदाम होयो पोहरेदारोन चोकचोया रोवनेन धियान कोरतो, ती आपसा जीवोक वाचाड़ लेतो। पुन कोदाम पोहरेदार यो देखिन की तोलवार चालनेवाळी छे मोटलो फेपारीयो वाजाड़ीन मानसोक चोकचोया नी कोरे, आरु तोलवार चालने सी हेनुमसी कुदु मोर जाय, ती होयो ते आपसा पापन फोसलो मोर जासे, पुन हेरा लुहुयीन लेखु हांव पोहरेदार सी लीस।
कोरीन, हे मानसोन ओवलीयाद, हांव तुसे इसराएलोन घोरानान पोहरेदार बोनावो; तु मार मुयो सी बुल सोमवी सोमवीन हेनुक मारे ओख्ये रोहीन चोकचोया कोर दे। हांव तारेसी कोय सोको, यो पापी मानुस मोरसे। तोत्यार तु मेसेक हेना मानुसोन चा जायीन मारे जुगु तीनाक चोकचोयो कोरनो जुवे। कोदाम तु हेना पापी मानुस काजे चोकचोयो नी कोरे आरु हेनाक आपसी जीवाय बोदेलने नी कोवे, ती होये पापीत मोरसे, काहाकी होयो पाप कोरलो छे। पुन हांव तारे जु हेरी मोतोन लेखु नीं मांगो। पुन कोदाम तु पापी काजे हेरी वाटोन वाराम चोकचोयु कोरीस की होयो आपसी वाट सी फीरे आरु होयो आपसी वाट सी नी फिरे, ती होयो ते आपसा ओधोरोम मा फोसलोत मोरसे, पुन तु आपसो जीव वाचाड़ लीस।
आपसान जीम्मेवारी
ओळी हे मानसोन ओवलीयाद, इसराएलोन घोराना सी यो कोव, तुमु मानसे कोवु: हामरा गुना आरु पापोन भार हामरे उपोर छितलो छे। आरु हामु हेरेन कोरता गोळने बाज रोया; हामु कोसा जीवतेला रोवसु? कोरीन तु हेनुसी यो कोव, परमेश्वर योहोवान यो बुल छे: मार जीवनोन आन खायीन भुरसु आपो, हांव पापीक मोरने सी काय वी खुश नी होयो, पुन ऐरेसी की पापी आपसी वाट सी बोदलीन जीवतेलु रोवे; हे इसराएलोन घोराना, तुमु आपसा आपसा भुंनला कामोन वाटो गोथा पोछा आवु; तुमु काहा मोरु?
हे मानसोन ओवलीयाद, आपसा मानसो सी यो कोव, जोत्यार धोरमी मानसो गुनु कोरे तोत्यार हेंदरो धोरोम हेनुक वाचाड़ नी सोकसे, आरु पापी आपसा भुंनला कामोक छुड़ देये ती होयो छाचीन पापोन डोन सी वाचसे। कोदाम धोरमी मानुस पाप कोरे ती हेरा धोरमोन काम हेनाक मोरने सी नी वाचाड़ सोके। कोदाम हांव धोरमी मानुस सी कोवो की तु जीवतेलु रोवीस, आरु होयो आपसा धोरमो कामो पोर भुरसु कोरीन भुंनला काम कोरे, ती हेरा वाराला काम हेनाक नी वाचाड़ सोके। हांव हेनुक फोम नी कोरावो। होयो आपसा भुंनला कामोम मोरसे। ओळी जोत्यार हांव पापी मानुस सी कोवो, तु छाचीन मोरीस, आरु होयो आपसा पाप गोथु फिरीन नियाव आरु धोरमोन काम कोरने लागे, कोदाम पापी मानुस, गिरवेन चीज पोछो आप देये, आरु हेंदरो माल पोछो आपे जेनाक होयो ठोग्यो होय, होयो भुनला कामोक छुड़ीन जीवाय आपने वाळा धोरमोन कायदान ओनसारे चालने लागे आरु ओळी भुंनला कामोक हात नी लागाड़े, ती चो छाचीन जीवतेलो रोवसे, आरु नी मोरे। जोतरा पाप होयो कोर्यो होसे, हेनुमा सी काहना वी गुनाक फोम नी कोरसे; होयो नियाव आरु धोरमोन काम कोरलो होय आरु ती होयो छाचीन जीवतेलो रोवसे।
ती वी तुमरा मानसे कोवे, पोरबुन चाल वारु नी होय; पुन हेंदरी चाल वारु नी होय। जोत्यार धोरमी आपसा धोरोम सी फिरीन भुंनला कामोक कोरने लागे, तोत्यार छाचीन होयो हेनुम गुचवायलोत मोर जासे। आरु कोदाम काहनलो पापी पाप कोरनो छुड़ देये आरु वारु वारु एने वारु रीते रोवने लाग जाय ती चो जीवेतेलो रोवसे। ती वी तुमु, कोवु, पोरबुन चाल वारु नी? हे इसराएलोन घोराना, हांव होरीन मानुसोन नियाव हेरी चालोन ओनसारे कोरीस।
योरुसालेमोन सोहरोन सोरनेन खोबोर
बेबीलोन मा निकोळनेन बारवे सालोन दोसवे मोहनेन पांचवे दाहड़े एक ओदमी मारेंचा आयो। चो योरुशोलेम सोहोर सी जीव वाचाड़ीन ढासीन आवलो होतो। चो मारे सी कोयो, योरुसालेम सोहोर नास होय गोयो। ओसो होयो की जेने दाहड़े होयो मानुस मारेंचा आयो तेने दाहड़ेन पेहले सांतो, योहोवान ताकोत मारे पोर उतरी। परमेश्वर मेसे बुले नी ओसु बोनायु। जेने टेमे होयो मानुस मारेंचा आयो, योहोवा मारो मुख उगाड़ देदलु आरु ओळी मेसेक बुलने देदु।
मानसोन पाप
तोत्यार योहोवान यो बुल मारे यां पुग्यो: हे मानसोन ओवलीयाद, इसराएलोन जागान तेनु उजेड़लाम रोवनेवाळा कोवे, ओबराहाम एकुत मानुस होतु, तीवी देसोक आदिकारी होयु; पुन हामु बेसका मानसे छे, कोरीन देस छाचीन हामरात् होकोम आप देदलो छे।
ओस कोरीन तु हेनुसी कोव, परमेश्वर योहोवा ओसु कोवे: तुमु मानसे मांस लुहुय भेळ खाय आरु आपसी निंगा मुरतीया भेनी कोरी, आरु तुमु मानसोक मारु। हांव तुमुक यु जागु काहा आपो? तुमु आपसी तोलवार पोर भुरसु कोरु आरु भुंनला काम कोरु, आरु आपसा आपसा धोड़े वाळा बायराक वीटोळ कोरु: ओळी काय तुमु हेना देसो पोर होक कोर सोकसु?
तु हेनु सी कोव, परमेश्वर योहोवा ओसु कोवे: हांव आपसी जीवायीन आन खाय्न वायदु कोरे की जे मानसे हेनु उजेड़ला सोहोर मा रोवे, चे तोलवार सी मार नाख्ये जासे। कोदाम काहनलो देस सी खोयड़े होयसे ती हांव तेनाक जोनवारीया सी मारवीस आरु खावाड़ीस। कोदाम मानसे कीला आरु दोरोम डुकायला होसे ती चे रुगटा सी मोरसे। हांव हेना देसोक उजाड़ुत उजाड़ कोर दिस; आरु हेरा ताकोतोन घाड़ाय जाती रोवसे; आरु इसराएलोन बोयड़ा ओसा उजेड़से की हेनु पोर होयीन कुदु नी चालसे। कोरीन जोत्यार हांव हेनु मानसो जुगु आखा भुंनला कामोन कोरता हेना देस काजे उजाड़ुत उजाड़ कोर दिस, तोत्यार होये जान लेसे की हांव योहोवा छे।
कागळ्यान खोबोरोन फोव
हे मानसोन ओवलीयाद, तारा मानसे भितड़ा धोड़े आरु घोरोन झोपलाम तारा वाराम वात कोरे आरु एक दिसर सी कोवे, आवु, सोमळु, की योहोवा भेनी सी काहनो बुल निकळे। होये पोरजान मानसोन तोसा तारेंचा आवे आरु मार मानसे बोनीन तारे ओगोळ बोठीन तारा बुले सोमळे, पुन होये हेनु पोर चालता नी: मुयो सी ते होये बेसका मोंग देखाड़े, पुन हेंदरो मोन लालुच मा लागलो रोवे। तु हेंदरी निंगाम मोंगोन गुळ्ळा गीत गावनेवाळो आरु वारु वाजाड़नेवाळो कोवाये, काहाकी होये तारा बुल सोमळे पुन हेनु पोर चालता नी। कोरीन जोत्यार यी वात छाचलीन होयसे, आरु होयी छाचलीन होयसे! तोत्यार होये जान लेसे की हामरे इचमा एक कागळ्यो आवलो होतो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.